Day 8：2018年7月3日 星期二
地點：蘇黎世
朝早起身，有兩樣野首先感覺到的。
第一係，個上唇好似有d奇怪，於是去照鏡。
哇，係孖潤腸呀！！！
跟住即係問保險，如果我係瑞士因為曬相睇醫生有無得claim。
之後就係check下，如果無得claim，
咁要幾錢，洗唔洗500CHF XD...
因為真係太恐怖，有諗過會唔會唔比我出入境。
後來保險個邊覆話有醫療需要就可以。
但諗諗下，今日都上機了，
不如香港睇好d，一是語言不通、二是我都唔知。
同行都有曬傷，不過主要係脫皮，同細細水泡。
因為佢上少女峰係0防曬，
仲要短褲短褲咁上，係極猛太陽同雪地反光下全面曬足6個鐘。
而我有防曬 (除左個嘴)，所以嘴就出事了，
而且出大事……腫到………
我覺得今日我刷到牙食到野係奇蹟，
不過好彩係上唇既上部、下唇既下部有事，
中間無事，唔影響食野。
( p.s. 落機後第二朝睇醫生，開左藥。
5日後既今日，我依然未完全康復。
雖然有d位已經無事，
但仲有幾個水泡位都準備緊結焦，不過已經消腫了。
以後去呢d地方，真係要加緊防曬呢。 )
於是呢日，我係決定全日都會戴住口罩先出門。
第二件事係，今日係咁聽到「火車聲」。
我以為咩野火車咁密，但諗諗下，條火車軌近近我地酒店近成咁喎。
之前住火車隔離都唔嘈，今日居然咁嘈？
於是一打開窗簾，OK FINE，原來係打雷聲 XD
琴日先話日日超好天、唔介意落下雨，
今日即刻落雨。
哈哈，不過對於曬傷左既我黎講都係好事，
可以舒服咁樣逛下 (雖然其實都諗住戴口罩)。
不過陰天就夠啦，何需落雨呢？
不過好搞笑，琴晚仲係超天晴，
今日話變就變 : P
於是乎，就等佢無咁大雨先check out。
呢個時候同行就拎左部 printer出黎，一齊簡d相印出黎。
之前列支敦士登同少女峰頂站都寄過postcard，
之後決定係「地面」簡d相黎印，再寄多次返屋企。
寫好野，又搞掂完執完野，
見雨細了，就落去check out了。
check out好快就搞掂，
比埋city tax就keep luggage。
期間望下d紀念品，呢架巴士超cute cute。
其實想買瑞士軍刀，但多功能d個d真係幾貴下，
30CHF內既好少功能，得 交剪、指甲鉗同指甲挫。
之後就開遮慢行，黎到酒店附近一間郵局。
見到個牌寫住d號碼，就知呢度唔係排隊，而係拎籌。
望到部機疑似係拎籌，於是click左張飛出黎。
好快就到我，買左郵票，然後貼係已經寫好既postcard上面。
黎到Zurich，因為個嘴腫左所以無乜話想食野。
而咁岩COOP無雞脾，得雞翼同雞胸。
望到呢個好似係Tunisia食果個「咕支咕支」，
好搞笑，不過無食。
(點知之後飛機機有…)
望一望之後無乜特別野想買，就行出Zurich HB。
係瑞士既旅行已經去到第8日，
呢日先第1日踏入蘇黎世市區、蘇黎世舊城區 XD
好野，終於無雨了，天陰陰好舒服。
係一種現代與中世紀交錯既越市，
好得意，雖然未話靚，但有種古老得黎又好發達既感覺。
蘇黎世唔係首都，但係佢係瑞士最大既城市。
伴隨上電車又行下，無乜目標之下，
同行話不如去河邊湖邊睇下。
正合我意 ^3^ 於是黎到呢度。
好多鴨。
呢度d水依然係超清，呢度真係無一度d水係唔清架！！
連大城市都咁清！！
碼頭有人上船，遊下船河。
湖邊都有人餵鴨仔。
哎也，我地個排 1.8CHF包未食晒，
唔知有鴨咋，如果知就唔棄置係酒店，直接拎出黎餵鴨啦。
好多天鵝係度梳毛，好搞笑。
仲有d游出去同d鴨仔一齊覓食，個頭伸下伸下咁。
好舒服呀~
極多天鵝。
之後諗諗下，雖然孖潤腸中，但都會肚餓，
於是就係trip advisor簡下，Zurich舊城區有咩野瑞士野食。
找到了，於是就上電車向Raclette Factory - Rindermarkt進發。
坐電黃係Rathaus落車，之後係附近逛逛先。
然後上坡。
唔洗一陣就黎到餐廳門口。
係一間主要食烤芝士既餐廳。
可以自選芝士底、要咩配料，又或者選餐廳推介。
叫左1個推介、同埋1個自選。
呢個推介叫 HEIDI，13.5 CHF。
之後係自選。
Blue Cheese + Pepper Cheese + Bread + Potato + Mashed Potato + Bacon，
18.5 CHF
大約10分鐘就上菜了，我都要除口罩黎食了。
好豐富！！
好味呀好味呀，而且今次無酒味 XD
全個餐都係極邪惡拉絲 ~~ XD
食完之後就再出去行，因為呢度好近 林登霍夫山 (Lindenhof)，
係一個Viewpoint，所以就行上山了。
首先要過左對向河先。
本身見到樓梯我是拒絕的，好彩之後有斜路XD
慢慢行上去。
回望，又係鐘樓 ~
上到頂了，d樹葉落地，好靚啊。
有種錯覺以為依家係秋天 XD
呢度好開揚 ~ 望到河兩邊 ！！
仲可以捕住電車經過 ^口^！！
係我地頭先落車既地方呀。
嗚哇哇，最鐘意上山睇城景，巧靚靚。
而大家有無發現，天空開始變到好藍？
係呀，係開始有太陽呀！
而我係「唔好呀！！！」 (咩料我咁反常XDDD)
繼續睇靚景。
回望，仲有一群雀。
望望另一邊天空，呢邊仲有雲。
仲有直升機飛完過去之後，
係度唔知搞緊乜，佢定左係同一個位飛飛下咁。
睇完就落番地面，慢慢行返Zurich HB。
火車站前大街係個熱鬧既地方，同時有好多電車來往。
瑞士真係一個好好既地方，
除左物價之外，真係好鐘意呢個國家。
完善既鐵路、極靚既風景，T口T！瑞士啊啊啊！
呢個時候都三點幾了，而我地六點機，
打算預早兩個鐘左右到機場。
不過黎到Zurich HB，當然望望呢個繩網展品。
呢個繩網好出名，之前香港都有出現過展覽。
好正，穿過個通道可以入去HEA，會有個好大既圓形休息地方，
有人訓係入面、有人睇書、傾計。
而我地經過繩網之後，
再去一去Zurich 既 Tourist Center (臨走先黎去XDD) 兜個圈，
然後就上火車了，返酒店拎luggage。
順帶1提，呢度好多紀念印章，
我地無專登去搵，但見到有都會印一個黎儲。
有儲印癮既人要留意啊！可以帶定一本簿仔 ~~~
Zurich HB去機場好近，大約22min，
我地酒店本身係機場同市區之間，所以都算係順路。
瑞士，感謝你比我一個完美既旅程 T口T (曬傷除外)
當然仲有感謝只要我將 地名 交出，
就可以準確無誤既搵車同帶路 既 同行 ^3^ ~
同蘇黎世Zurich講再見之後，就要同埋瑞士講再見了 T口T
再見瑞士 ~~~~~~ T口T！
- Day 8 完 -
