【緬甸 11d10n】Day4-6 茵萊湖 [Inle Lake] 及 週邊

Day4，2016年10月17日 (星期一)

夜車SNT EXPRESS無中途趕我地落車，而好隱定地好快就到左瑞良，4:00am。
呢個係餐盒仔。

因為架車係去東枝，經瑞良，

所以我地要係 瑞良既SNT EXPRESS中途站，轉SNT EXPRESS提供既籠車入良瑞。

呢度海拔有880m，加上夜晚，重點係岩岩坐完夜巴，
所以我既裝束係好似高原小朋友咁，有帽、有外套，但唔會感覺到熱。

等左無耐，籠車就到了，終於可以試下呢隻車。

坐住佢入良瑞，當然就會…遇到收費站，
其實坐乜都要收，因為係Inle Zone既門票，
每人放低12,500Ks，就繼續入了。

籠車司機問我地住邊，我地話未知，佢就話會帶我地去d酒店問下價。

到左Remember Inn，老闆話有16us、20us、25us、35us既房，
但佢地得番35us 有 balcony 既房，但我地唔洗 balcony…
佢話，呢個時間無房，但有人會checkout，今日下晝就會有房，
我地可keep luggage 先，我地都話OK。

佢望望下，發現原來有間G2係未有人住，
$20us/晚，我地住2晚，就執好野比我地入去。
佢話我地可以照食早餐，今日唔計房錢，我地thanksthanks就入左去。
Check好係咪有熱水，OK就住了。

全日無沖涼洗頭好核突，加上夜巴未訓得好夠，沖好涼就繼續訓，9點幾先醒。
一醒，就上天台食早餐，呢度早餐好好食啊，好野，唔怕餓了。
食左個多士、蛋。有生果同果汁。

就問可唔可以 包船 ，老細話，今日d船租晒了，聽日吧，聽日都有festival。
聽日festival係最後一日，5:30am開始坐船，之前check過7:00am開始有巡遊。

佢寫左包車去Kakku Pagoda既價錢，同埋包船既價錢，我地望一望，OK了。
包車要經東枝，上山，50,000Ks無講價。
另外Pagoda既Entrance Fee $3usd/人，Guide $5usd。
因為festival，所以由平時萬幾Ks，變到船家要30,000ks/船，都唔講價了。

由於聽日先有船，咁今日就去左kakku pagoda先，
於是第1日係inle lake係完全無去過個lake架XD

唔洗30mins架車就到左酒店了，我地上車，經過好靚既風景，上山，
經過東枝，去買飛、租guide，再入田園，呢度真係舒服又靚 ~

Guide同 我地吹水，佢住東枝，同埋係東枝大學讀英文系的，
話呢一帶最多野學的大學就是東枝大學。

東枝最出名有2個比賽，都係同天燈/煙花有關的，大大個放上天鬥靚既比賽。
之前上網睇過呢個比賽，guide話比賽係11月先有，依家10月係未有啊。

東枝盛產garlic同埋唔記得左乜野XD 呢度d屋2層，住係上面，
除左通風d之外，最緊要係下層係放糧食，好似倉庫咁的。

架車一路行，行左兩三個鐘(？)就到左Kakku Pagoda了，

本身我未望到，一另轉頭，我「哇！？？？！」因為真係幾密集下。

黎到呢度，我地有個guide一路講野一路帶住行，
其實我地勁想賣甩個guide，因為佢用英文講既佛名，我都唔識聽，
所以邊座佛塔係屬於咩，我都唔係好清楚。
如果中文都可能會有d認知。不過有時有d故仔講下又幾好聽既。
同埋佢有介紹下呢度既歷史，點樣發現咁。

一路行行到尾有個落山既路，
下面有條河流，好似印象中記得話係sun village(？)，
沿住兩邊係草既河可以遊船去唔知邊度。

敲3下會帶來好運 好似係。

係唔同角度睇kakku，係入面穿插，
如果係小朋友可能可以玩捉迷藏(//誤//)。

成個pagoda前面有個幾核突既池，可能礦物質豐富…嗯…
不過有水既地方，就係可以影倒影既地方，所以，嗯…OK！

其實都唔記得兜左幾耐，跟住就去食野食野食野，
2500Ks一碗粉麵，都算幾大碗，嗚 ~ 粉麵 ~ 心心眼。

食完野之後就行多陣回程，回程期間經過一條shan village，

落車行下咁，不過無乜人。d屋仔掛住一排lattern，都係因為full moon day啦。

返到酒店已經四點幾，想去租單車，但是7點要還，就算了。

而地面一片濕，原來頭先3點幾4點呢度落左場大雨，
嗯，好彩去左遠一遠，避左場雨。XD

由住個度，即係良瑞鎮行去湖區，10-15分鐘左右，
好多人兜售日落 同埋 聽日既boat trip。

係 茵萊湖 既街道上見到有船家係度r人，聽佢up下，
佢話節日好睇，$23,000ks/人，兩人$46,000ks，仲要唔是包船。
我心諗，你食水真深啊。好彩我地已經book好左姐……

經過串燒檔再食左雞翼。
呢度d狗好有趣，會等你d雞骨食。
千祈千祈隻手唔好放低咁拎住d骨，有d心急既狗會跳上黎咬骨，
跳太高可能會咬到手指 (利申：第2日已奶野)，
係口度食完直接掉落地就得，佢地自己會好乖咁咬。

呢日我地得番好少錢，係街邊檔食下野，curry chicken rice個d。
都係1000ks左右，食。

跟住見到人放天燈，燒樹枝XDDD，
我未見過一個天燈未放到上好高既天就熄左火跌左落黎XD
仲要唔係因為燒著左，係支樹枝燒晒無得再燒所以無火XDDD

呢度d天燈幾靚，係火之餘、仲吊住左串爆竹類既物體，
所以一路飛天，佢一路bakbak聲咁響，有條長長條連住個天燈，好靚喔。

食完之後，返到酒店再問酒店老細邊度有得兌錢，
銀行匯率係最好的，應該1usd: > 1270ks，但呢個時間已經收晒檔了，
老闆講左間依家(9點幾)仲開緊既店，係湖區既街上的，
我地去到就兌左100usd了，匯率係1usd:1230ks，其實都只係爭少少。

夠錢聽日遊船既話，我地就可以去訓教等聽日了。
要5:30am就落到去喇！！於是老闆問定我地要咩早餐，
等我地聽朝可以帶去船上面食。

我本身想叫個湯麵，老闆話帶唔到上船啊，我心諗：又係喎，我做乜事。
於是就改左叫個炒飯，好大盒啊呵呵，開心。同行就簡左食honey pancake。

Day5，2016年10月18日 (星期二)

好準時咁5:30am落到去，點解我可以咁準時咁早醒到既？太神奇了。
拎住個飯盒就跟住船家出發，上船。呢個時候仲未日出，
於是，我地就知道我地將會係船上面睇日出喇喇喇。 XD

平日未有節日係8點幾9點先出船，因為個龍舟巡遊係7am開始，
所以我地就5:30am出發了，要霸個靚位喔！

酒店已包好早餐比我地，好貼心呀。

船開動了。太陽都出來了。好厚雲。

於是就黎著 《日出與炒飯》 既合照。

一路食食食睇睇睇，有d漁夫係度網魚咁。

由支流度出湖，去到湖既某一處可以見到好多停係度既船。
睇黎呢度就係龍舟巡遊既地方了。

而我地個船家同另外兩個船家傾傾下計，突然入左去一個木屋柵下面XD
跟住爬船到一條樓梯叫我地上去。

嗚呀！！船家帶我地去左私家位高台睇巡遊！成個木高台得3架船既人，
而見到下面河道係泊左唔知有無50架船仔好逼 XDDD

有乜特別呢？因為佢地係用腳黎趴趴趴趴趴趴趴趴架！！

我地行行企企左一陣，就開始係遠處有d音樂，然後第一架龍舟就出來了。

 跟住一架拉住一架，d音樂勁歡樂，一路行行行，
到最後最大架的龍舟就出來了。

女仔船用手趴的，得佢地可以坐咁 XD。

完左後面，船隻開始散。

巡遊 完之後，前面d龍舟隊會分散行動，係每條村既支流巡遊，
到lunch時就會再聚集，然後再分散行動，所以呢日遊船時，
間唔中都會撞到佢地啊，佢地勁有力氣咁嗌，無渣流灘  ~ XDD。

睇完之後我地就開始遊船，
其實我發覺如果唔係自己指定左d地方，茵萊湖會去既地方，
勁似大陸跟團時帶你地去既手信店個d feel。

vy out fo hahahahahahaha 

首先去左lotus手織工作坊，睇完佢地點樣整lotus、cotton同silk之後，
就會隔離有間店，等你摸下d布，又叫你買下咁，賣到貴一貴。 即走。

跟住下一站係雪茄店，.v. .v. .v.。

跟住中午去左Phaung Daw Oo Pagoda，

入去Pagoda見到d人買d金葉係中間度貼，
原來貼完之後，今日稍後或聽日會放入金雞龍船度。
而金雞龍船就泊左係附近。

跟住d船隊食午餐。

呢d水，掂一掂都好似會出事。
重要好多當地人食完賓郎之後，成口紅色lur落河度。

完左之後，船家話下站係long neck長頸人既木屋，
同行話其實有個地方想去，係山上面有好密佛塔既pagoda，
佢係支流，要逆流而上，都幾遠下，坐船應該半個鐘左右，
再要行半個鐘咁，來回都2粒鐘。船家又肯wo，加分加分。

 跟住我地就開始逆流而上咁去Shwe Inn Dein Pagoda。
 d水一路行一路紅，超污糟XD

呢日超曬，我又唔記得防曬要防埋腳面，依家仲係一pat黑色的。
上岸了，我對鞋又甩了，赤腳跑跑跑跑跑；
船家帶我地到market門口指一指遠邊話個度就係，
佢係shadow既地方等我地，我地okok咁就走了。

同行幫我痴到對鞋實一實，只要唔掂水就無事。

沿途見到有褲，問佢幾錢，佢話12500ks，
心諗：哇我平日包一日船都包到咁濟了 。
即走，佢就：「9000ks! ~~~ 8000ks! ~~~~ 6000ks!!! many discount!!!!」
sorry除非你1ks如果唔係都唔想理你了，一開始開成12500ks都有。。。

上山上山上山上山上山，記得經過market後要行左邊，唔係右邊。
右邊得幾支，唔多，10支以內。左邊一路向前，比500ks camera fee同video fee，
再入 ，沿住d "東南亞版鳥居" 一路行，兩邊都係賣野既地方。
係呢 度買左條褲，4000ks。

沿途都好多塔，但我地目標係山上面好密個堆，
本身以為要行好耐，我地向住另一排 "東南亞版鳥居" 一路行，
行左無耐就到了，完全唔覺自己行得好高。

呢度既塔就真係密了，新舊交替，好有廢墟feel得黎係盡頭又係新淨個d。
難得黎到，我地係度stay左幾耐下，應該都2粒幾鐘。船家應該悶瓜了。

係度影影影玩玩玩行行行錄錄錄，又斟下水咁。
到落山，經market返返去岸既時候，船家訓醒了。

佢口upup左句："too late now..." 不過都無講d乜，
仲肯帶我地去long neck同貓跳寺，
可惜佢話依家貓跳寺jumping cat既cat已經唔識跳了。 不過都照帶我地。
其實真係幾好，明明我地都係度r到超左好耐時間XD

出一出番湖，佢速度開始快了 (因為順流既關係定係心急呢..XD)
去到long neck有d失望因為我覺得我條頸同佢既長度唔係爭好遠，
所以最後係相都無影就好快走左，走之前買左個inle lake木雕公仔3,000ks。

最後4點幾左右到左貓跳寺，由於5點半日落，我地係度磨下磨下，
又影下貓又坐下又hea下又行于market又睇下d水又睇下太陽。
呢度幾好坐，行既時候d木聲好好聽。
d貓好識搵位，專登企係太陽光下面等人影咁XD
不過d貓果然已經無再跳了。

 係度r下r下，就5點幾，日開始落了，就上船，
船家一路開一路開一路開一路開返返去良瑞鎮，都要大半個鐘。
而呢個時候就日落了，雖然雲都好多，不過太陽係度架！

就黎返到良瑞時，見到d居民用呢度d水黎洗頭沖身。
但諗起d食定璸瑯既大叔lur左d紅色痰出來、仲有d垃圾係度浮下浮下，
我忍唔住諗：乜呢d水真係可以用黎洗頭既咩……
不過其實都真係無辦法，係無乜乾淨水既情況之下，
用呢d水可能比完全唔洗頭唔沖身... 都算係乾淨dd既？

 今日天氣都好，起碼無落雨啊。
落左船之後，多謝船家，比左d tips佢因為今日都用左佢13個鐘咁濟。
梳洗下，就出番黎湖區附近一間靚靚餐廳食菜。

呢個trip最貴個餐，一個人20,000-25,000Ks，個包裝係好靚XD
用龍舟上面放滿一碟碟既野食。

呢度只係set入面其中一round，有3 round。

d野食都唔錯，仲要好多款，又有前菜、主菜、湯(雖然緬甸d湯怪怪地)、甜品。
可惜呢度近湖好多蚊，好想一巴巴車落去d蚊度。
食食食食食，滿足 ~ 哈哈 ~ ~ ~ ~ ~。

跟住就返去，食串燒。
今次食雞翼時隻手拎住支骨放低左…搞到隻狗跳上黎咬到隻手指……
同行幫手支d血出黎 之後，好彩我有帶消毒噴霧液體膠布，封好佢。
然後就返酒店再清洗。

呢日，再兌多100usd備用。
然後就同老闆講book去bagan既巴士，佢話巴士呢個鐘數收左，聽日再問。

於是就返房訓了。

Day6，2016年10月19日 (星期三)

呢日朝早，我地就去買巴士飛再食早餐。
Normal bus就11,000ks，VIP bus就~20,000ks(好似係)，問我地要邊隻。
我地梗係normal bus算。

分別係：
normal bus 就normal d (廢話)，
VIP bus係 2-1座位，normal bus 係2-2座位。
另外，無餐、無廁所之類。但張凳都係舒服既。
不過唔知關架車事定真係normal同vip既分別，
normal bus 呢次坐，架車好似就散咁，即係香港小巴個d feel，
行d無咁好既路，架車就會散件聲，keep住散件聲咁，但我又訓到唔知點解XD。

買完之後，我地checkout再keep行裝係度，跟住我地就去租單車。
今日目標係，遊 villages！！

租單車架店比左個map我地，介紹左沿途既景觀。
向西行main road，再南行大路兜一兜南面一座小山上既pagoda，可以係山上睇落湖區。
落番山，北上番少少有個villages可以坐船過對面，
對面碼頭會有條400幾米既橋去另一個village，再係個度向北行，
經red mountain酒莊(或直接skip)，再向西返main road，
就可以返返良瑞鎮，即係原本呢度。

(示意圖)

其實本身係想有round trip的，其中一段路係要過湖，
不過個條村d船家食水深，話半粒鐘過對面要9,000ks，所以唔想理佢，
而且對面只係有條橋係想去，為左去一去就9,000ks養肥個船家too bad。
所以變左做return trip。

(示意圖)

好，我地向西邊出發之後轉去南面。
難得經過郵局(是次trip唯一見到既一間)，就買左20張stamps。
不過之前賣左10張比fds，得番10張係仰光寫同寄。

本來只會去一個village，不過我地兜左一條路去多一個village。
但呢度本身唔預單車會行，所以呢度我有感自己係玩緊越野車，
沿途的確好靚，不過因為要睇路都好難欣賞到風景，嗚嗚。

有一堆超密集鴨仔、有田、有屋、有好nice既人、小朋友，
有用呢度d泥水黎洗碗既姐姐…

一路踩一路都覺得呢條唔是人踩的路，心諗：「說好的悠閒推介踩車路線呢？」
之後發現呢條路係同行自己加上去既XDDDDD
遊多個村，係幾得意既。嗯，可一，不可再。嗚呀 ~~~~~~~ ~~~ ~~~

上番石屎路之後，就有番正常既踩車mood。
不過真係頭先d景係靚d，呢度兩邊都係樹，無乜野睇。

有個上斜位，呼呼呼呼呼呼呼，上到去再兜一兜就是hotspring了。
可以入去浸一浸但我地無咁做。XD

一路向前踩踩踩，然後接近山既pagoda，就泊車行上山了。
呢度係一間超誇張湖邊酒店，係緬甸茵萊湖版既馬爾代夫(?)，
佢有個碼頭，最誇張係有個水閘，由酒店直出茵萊湖。。。
嗯，有錢人住既地方。

沿石級上山兩邊都有蠟，應該因為full moon day點過燈黎。

上到山既大門，超臭，原來有pat垃圾(esp.橙)係門口。
佢地係點樣頂得順呢d味的…… 好彩再行入少少就無味了。

高空睇湖區係唔錯的幾靚，不過未到wawawa，
但湖邊有大草上面有稀疏屋仔，幾有feel，靚喔。

係度兜左個圈就落山繼續踩車了，踩去條村度。
沿途有人問cross the river？跟住問價，話9,000ks，
sor，即走，頭也不回。

繼續遊村 ~ ~ ~ ~ ~寫意。
遊完村因為唔過橋，所以就原路兜番轉頭了。

踩踩踩踩踩踩踩踩踩踩踩踩踩踩，都差唔多時間。
食左個晚餐先！

今晚食左個幾好食的麵好味好味，再叫左杯 TEA MIX，係香港既奶茶FEEL，
但應該唔係話似香港茶走個隻，因為唔係落左煉奶。
(結果最後係仰光先試到真正既緬甸奶茶 XD)
同行食左個好似香港係屋企煮既超大碗普普通通豬肉菜米粉XD

還完車，去返酒店拎野，去個廁所洗腳抹身，就係時候上籠車去轉夜巴。
今次係，Normal Bus！

(圖)

都係舒服既，冷氣無咁凍，唔洗變高原人XD。

就咁樣，呢一次，又要同茵萊湖講「BYE」了。

- 茵萊湖 [Inle Lake] 及 週邊 完  -