地點：東西巷 及 逍遙樓、船遊 一江四湖、魯家村
一江：灕江 (途經 象鼻山、伏波山、疊彩山)
四湖：榕湖、桂湖、杉湖、木龍湖
住宿：維也納酒店桂林機場路店
因為坐高鐵，
如常坐火車到落馬洲站後，過關。
過關時有段小插曲，深圳個邊既關口人員話我個樣同張證唔似 XD
因為本身證件相係好樣衰、個時影相又要夾起頭髮，
而今日出發時，有執靚d個樣先出門，而且呢幾個月又瘦左，
自己睇番都幾唔同。
入左詢問室幾分鐘，有兩個人對一對你個樣，
又用香港身份證對一對，又問登記時既屋企電話幾多號，
之後再過多陣叫我得閒去登記番個指紋 / 見我張證都就過期就快d換過張證，
我話我趕住去高鐵站，遲d先，跟住就放左我走了。
福田口岸係集合既地方，達陣時間係9:53am。
之後，係深圳地鐵福田口岸站，
坐地鐵4號線直接黎到深圳北站，大約20分鐘。
安檢之後，就入站，食少少野。
高鐵站每個餐平均都50-60$，比起都7年前去湖南張家界時，
真係貴左好多啊。
呢個比較平民價，一個墨西哥卷類既野，$16。
但，又要講句「都唔好食既」。
d雞好假，好唔雞，好似去齋館食齋雞咁，
我都知聽日(22號)係佛誕，但唔洗咁掛…
所以食唔晒就掉了。
提前15分鐘開始檢票，然後就可以去月台上車了。
無幾耐就開車。
天氣好好，當時CHECK過天文台話桂林個邊落雨，
係度諗明明只係短短3個鐘高鐵車程，距離500km左右，
一陣一路坐一路由天晴變天陰一定好SAD。
但原來有d地方，你唔去到，都唔知個邊天氣係點。
係以前既旅行都有過類似，例如話緬甸落大雨，但個次除左仰光都係天晴。
黎到賀州附近，個天都仲係好靚，而且d喀斯特地貌都出現了。
落車一刻，天氣仲係好好！
所以即使真係超熱，但其實心情好好。
跟住路牌黎到出口。
之後就上旅遊巴黎到東西巷啦，東西巷門口就係逍遙樓。
呢度有一個鐘左右可以遊下，其實東西巷就好細，
不過飲下野食下野就好快過左一個鐘。
日頭無乜人，因為通常都係日頭睇完景，
夜晚先會返市區架嘛。
東西巷係F形既街道，即係1直街、2橫街。
所以無乜可能會迷路。
都有d攤檔係開左，賣下手工野。
因為天氣真係好靚，所以好曬又熱，就去買左杯凍紅茶飲。
個價錢同香港有得揮啊，依家大陸d野已經唔再平了，
而且有平既話，質素都唔會好得去邊了。
由於大陸好多野都好甜，
怕佢好多糖所以叫小甜，但結果都係有d甜，但都好有茶味。
本身見到佢落左好多冰，但因為茶係熱，
所以冰溶晒，早知叫多冰，咁先消暑嘛。
一路飲一路再行。
對面d餐牌，第1道菜是咪刀拍青瓜d fd黎。
個價唔平啊！
於是去左小食檔仔叫左個魷魚串串，$10/5串，
呢個就度度都有，深圳東門都有。
唔知集齊左幾多periodic table既elements呢？
即使飲飲食食都好快就行完，於是就上逍遙樓。
因為唔可以飲住野上，而飲野勁慢既我，要放棄左杯野先上去，
所以我就叫友人上去完，我飲多陣就上去。
結果都係飲唔晒淨番少少，唔理了，掉左 > <，跟住跑上樓。
呢條係解放橋，跨漓江既一條橋。
不過個景都無乜特別，係城景咁，d山都唔太特別，
所以好快就落番地面，然後岩岩好一個鐘了。
上番車，幾分鐘後到了解放橋附近既碼頭上船，開始船遊一江四湖。
 |
| (網絡圖片) |
首先整張地圖解說下，一江四湖係圍住桂林市既一條環城水道。
今次係解放橋碼頭上船，會兜一兜去桃花江江口既象鼻山，
然後沿灕江穿過解放橋、伏波山，轉入木龍湖，
由木龍湖升船機將架船升上上游，然後經過疊彩山、幾條小橋去到桂湖、榕湖，
最後係杉湖日月雙塔既日月灣碼頭上船。
簡單黎講，就係逆時針遊一圈。
 |
| (網絡圖片) |
呢一張地圖都好正，貼埋先。
好，睇完地圖，黎番我地上船既碼頭。
有人係度游水。
我地上船既地方。
上船了，只有一層。
大家都開晒遮，因為真係好曬，而我當然……睇景。
兩江係指漓江同桃花江，因為我地唔行桃花江，
所以我地行一江四湖。
出發了，向象鼻山進發。
但！！因為係下晝，所以逆光呀！！
因為逆光，所以影向象鼻山方向時，個天好白。
呢個就係象鼻山了。
係小學教科書有講既象鼻山呀，個洞好人工，哈哈。
有d人會係象山公園景區，上山玩。
因為象鼻山係桃花江口，而我地唔去桃花江的，
所以會兜返轉頭，向北去木龍湖。
向番後望。
呢個就係頭先個象鼻山，再見了。
之後經過伏波上，如果去伏波山景區，都係有得上山架。
船經過木龍湖口。
黎到升船機，等多架船黎之後，一齊升上上游。
黎到彩疊山，同樣逆光中。
呢個木龍湖有d建築仔可以望下。
藍天心情好。
依度開始會經過好多條橋，呢度係其中一條橋底既畫。
另一條橋底就有浮雕。
之後都無乜特別影，邊遊船邊睇下，
最後黎到日月雙塔既杉湖。
到日月灣碼頭之後，就上船了，
整體景觀就一般啦，主要係睇下桂林市區出名既名山。
有人會夜遊兩江四湖，夜遊就山石睇少d，建築睇多d咁，
睇你鐘意日頭既山水 定係 夜景建築啦 ~
遊船大約70分鐘，上船之後又上番旅遊巴，向魯家村進發，
大約坐30分鐘就到魯家村，旅遊巴會停係門口，附近就有個巴士站。
一個無乜保養既村口地圖，呢度落車後有九個字左右行，
之後就係呢度食晚餐。
因為條村好細，十分鐘唔洗就其實已經可以行完一個圈。
經過S形風雨橋，就黎就魯家村，
雖然係村，但都睇得出係幾現代的村落。
到了魯家村。
日光日白無乜人，不過其實都係一條普普通通既村仔。
呢度出名豆腐，就叫左個煎豆腐。
專登去風雨橋個邊食住睇黃昏既山水。
簡單食完就入返魯家村，再兜多個圈就去食晚餐既地方。
旅行團當然食圍餐，無咩好評論，都係農家野，
有好多豆腐野食，豆漿、豆花、豆腐、豆腐魚、豆腐湯等等。
食完坐多半個鐘，去到桂林既臨桂區個邊既維也納皇家(機場)酒店，
叫得機場酒店，就當然好近桂林既兩江機場。
點解住呢度呢，當然係因為錢既問題!!!！(亂UP)
佢地話因為呢度距離 桂林市象山區 以 西北 一個鐘左右車程，
而龍勝縣都係桂林既西北，所以呢度去龍勝縣可以少一個鐘車程，
咁聽日去龍脊梯田就唔洗坐太耐車就已經可以到了。
由於唔係市中心，所以附近都無咩好行，
8點幾返到酒店之後，沖完涼睇下電視睇到11點幾早d訓，
聽朝7點就要起身食早餐，8半就要出發啦。
最後要講一講，有套電視係臨桂電視台播，幾好睇，
叫「另一個你」，2晚睇左23-28集！！！
但上網搵唔到哦哦哦，可能因為係地區電視台，所以唔出名吧。。。
唔知返到香港，仲有無得睇呢 XDDD
應該無了，有晚住陽朔都睇唔到。
- Day1 完 -
沒有留言:
發佈留言