2018年5月23日星期三

【中國廣西 4d3n】Day3 陽朔 (世外桃源、銀子岩、遇龍河、陽朔西街、陽朔碼頭)

Day 3:2018年5月23日 星期三
地點:陽朔 (世外桃源、銀子岩、遇龍河、陽朔西街、陽朔碼頭)
住宿:陽朔新西街大酒店

今朝一樣要好早起身,所以一樣叫友人落去食早餐先,
然後眼訓賴床到直情只係食左30秒早餐就要上車出發。

同樣,8點半出發!


但我趕得切起身影窗景,呵。

但見到個天空,就知,哎,瀨野啦。


鏡頭一轉,已經係一個鐘頭車程後既事,
黎到桂林市同陽朔中間既景點,叫做世外桃源。

世外桃源,名稱來自晉代陶淵明既《桃花源記》一文,
景區係以呢篇文為藍本去規劃。

如果無記錯內容大約係,
當時既佢坐船經過山洞後黎到一個充滿桃花既地方,
見到好多純樸既人民,同佢地傾計之後,
發覺入面生活既人完全唔知出面既情況,更加以為個時仲係秦朝。

入面既人同佢講,千祈唔好話比人出面既人知有呢個地方,
陶淵明應承左,但出到去已經話比人知呢個地方既存在,
然後仲派人沿路去搵,結果已經搵唔返個地方了。


但所謂世外桃源,其實已經係多人都傻既地方了。

之前幾日d景點都無人,以為淡季,
但到了今日,我錯了,可以用人滿為患黎形容。


每個有小數民族既景點必定會有既唱山歌、跳舞。


水係幾清既。


穿過文中既山洞,山洞都唔短架,而且全黑。


過左黑黑既山洞,進入桃花源。


有人問呢d花係真定假,船家話「四季桃花」。
唔,係標準既中國式答案。


桃花島。


水道。


繼續係水道。


呢度有民居,所以會有人洗衫洗腳。


船上面,
有人話:「哇,洗腳洗頭洗衫都係同一條河呀?」
另一個人:「有咩出奇呀,印度條恆河都係咁啦!」

哇,點解一黎就出大絕,講到去恆河……


望去民居。


洗野。


唔洗再經山洞,就返返碼頭了。

嗚呀,起碼經多次山洞先出去,比我感覺番篇原文呀。


你睇個天,唔靚啊。

不過山水,蒙蒙地都係另一種感覺 : P。


上岸,望向另一邊。


經過d小屋仔,有桂花酒比人試。


望番去河邊。


幾靚。

但人好多。


山山山,得意。


睇下人山同人海。


影相就覺得好寧靜呢。

因為景區其實唔大,係呢度大約都係一個零鐘左右,
然後就出番去,上旅遊巴,繼續向陽朔進發。


經過月亮山,好得意啊,好想上去個洞度望落陽朔。


係銀子岩景區對面間餐廳食午餐。

食完就去銀子岩景區啦 ~ 
今日陽朔行程,成日都諗起 越南下龍灣 同 寮國旺陽 XD


係岩口既平台望出去。

其實呢個時候已經無日頭咁厚雲,有時有d位會有藍天白雲。


拎住飛,唔洗排隊。


拎埋導賞耳機入場。


好快就入到黎,一開始就落樓梯。

一見到彩色,就即刻充滿中國感,
不過話時話,有d位既燈係太彩色 會唔靚,但有時d燈放係某d位都幾靚。


燈色太雜,唔靚既代表。


呢舊石又係一個景點。


有d位幾有RPG feel。


之前上網睇過話銀子岩好逼,好彩今日唔多人。


有上下層。


只要唔係綠色/紅色光,其實都幾靚。


呢個我覺得好靚,好直直直 XD  佢個名係音樂琴鍵個類既野 XD


呢個係另一個位,瀑布咁 ~


呢個叫做瑤池,我黎到有「WOW」一聲,
但相機唔夠WIDE影唔到,佢個倒影好正,完全好似放左塊鏡係度咁啊。

尤其佢石瀑布夠高,跟住連埋水面倒影,個感覺幾型。


遠少少影。

少不免一定有人會祈福,然後拋銀仔。


佢地話銀子岩申請緊全球最大鑽石牆溶洞,
即係一大片會閃閃發光既鐘乳石,好似呢張圖咁。


只係用一隻色去照,但已經好型。

所以本身靚既話,真係唔洗加咁多色啊!!


前景係一柱擎天,後景係果幅鑽石牆。


行上高d去影。


真係幾大幅。


之後再望望一柱擎天,
呢隻調色其實幾靚,有d RPG feel。


但呢隻就…… 不了。


跟住出口就是購物點。

好,係銀子岩既洞內玩左大約一個半鐘,然後就坐半個鐘車去遇龍河。

本來以為遇龍河係類似世外桃源既景區,應該周圍都係靚山,
但去到之後,覺得個度真係無乜特別。

如果周圍係360度,咁有靚山既地方只有45至90度,
仲要唔係船既左 / 右,而係前方少少。

重點係,一d都唔密。

清遠個次竹筏遊船都靚過佢好多好多好多好多,
個時山又多d、感覺鄉村d。

呢度係右邊一大排現代村屋、左前方有一個「睡美人」山仔,
然後後面係一座普通到不得了既大山。

然後所謂對唱山歌,都只係船上面有一個人自己係度唱……

因為之前上網search過,d人影既位置就係有山既位。
如果知道實景係點,呢個自費一定唔會JOIN,寧願係河邊自己行下 .....


今次坐既就係呢種中型竹筏。


唯一有山既景,呢個係「睡美人」既頭既側面。


呢度已經係最多山既位。

去到最後有魚鷹捉魚睇,
因為魚鷹一日只要食一條魚就夠,
所以當食左一條魚就唔會再捉。

所以漁夫會用橡筋COOL住魚鷹既頸,
等魚鷹捉到魚都唔會吞到,將條魚吱番出黎,
如是者,個日魚鷹捉到幾多條魚,就係漁夫當日既漁獲。

都幾殘忍........



最後回程因為逆流而上,所以將所有竹筏連住,
然後最頭 (即係我地坐緊個架) 由一架車拉住,
而架車係岸上面行,船夫就將船推離岸,
如是者,架竹筏就由車拉番碼頭了。

睇完之後就完左遇龍河既行程,見我無乜影相都知,
呢度真係太太太唔靚了。

好快,大約二十分鐘返到陽朔既市區入,
時間大約4點幾,返到酒店6點先食飯,
所以有個零鐘自由時間。

酒店係正西街隔離,所以我地就決定去西街行下。

題外話,桂林同陽朔都有直昇機可以上高空睇落去,
如果係日出日落時分一定一定靚到顛!!而且只係四百幾蚊。。

黎到西街之後,方便逛街,
所以只係帶左電話,無拎相機,呢度開始相質低注意。

一開始去左陽朔公園,因為酒店對面就係,
但無野睇,不了,秒閃。


開始見番d藍天白雲啦!!!

向西街進發!!


我幾鐘意陽朔,因為呢度一抬頭就見到群山,
而且全部都細細矮矮,感覺就好似自己身處係盆景之中。


呢個時候,忍唔住講左句「桂林輸左啦」…
不過當然,桂林有灕江撐腰,呢度條江要係西街盡頭先見到。


條西街話大唔大,話細唔細,但就幾舒服啦。


而且有得過下小橋,抬頭周圍都係小山,所以加分加分。


雖然一陣食晚餐,但圍餐我唔會食得幾多,所以叫左個涼皮。

無幾耐就黎到西街盡頭,亦即係陽朔碼頭。

通常d古城古街去碼頭都會有個類似城門既位置,
鳳凰古城同埋 d RPG 都係咁 XD

所以同樣,呢度要穿過山水園前面既一個城門 (?) 先至到碼頭。


城門位置寫左唔同年代,洪水引致潮漲水浸時既高度。


慢慢行落碼頭。


回望。

諗起如果有人由桂林 / 興坪個邊坐船,黎到呢度落船,
望到大大隻字陽朔,都幾型。

好RPG!!!(唔好打我!!!)

係碼頭影左陣相、玩左陣、HEA左陣,
都差唔多5點半有多,就返返去酒店集合,去食飯。


呢度係酒店附近既景。


返到酒店大堂,大家都差唔多到齊,
然後就出發去食飯,途中會經過西街其他入口。

穿過左一座小石山 既後面,就係餐廳了,
係入面簡單食完野,就同友人閃去西街了。


上番頭先條天橋過對面。


見有條新西街,叫益田西街,去兜一兜先。


買左杯野飲,幾平,$6 !!

之後因為入黑,手機太廢影唔到相之餘,
仲開始買野,隻手開始多野,更加影唔到相,所以同大家SKIP下西街夜景。

鏡頭一轉,已經係入黑後既幾個鐘,
大約係十點半左右,返返酒店放低左我個8樽玻璃樽裝辣椒醬 同埋 4袋米粉,
然後再落酒店樓下睇下有乜食。

最後簡左前排好出名既螺絲粉,好香好香 XD 好多料。
真係有螺,但其實唔知點食先食到d肉又唔會食到d沙XD。

另外仲有支類似維他奶既豆奶,成個套餐 $16,食晒,好味。


食飽了就返酒店,即刻執下野同埋去沖涼,
個背囊幾經辛苦先塞好晒d野,但真係好重,
好想將個8個玻璃樽用其他方法裝住!!

之後想開電視睇下套戲有無播,
點知係無架,結果就係度睇CCTV13 (?) 播紀錄片。

講左新疆乾屍、巨石陣之謎、仲有好多一時醒唔起,
睇到眼訓就訓著,一覺訓到第二朝了。

- Day 3 完 -

沒有留言:

發佈留言