Day3：2018年9月30日 星期日
地點： 立山黑部 (扇澤、黑部大壩、黑部平、大觀峰、室堂、彌陀原、美女平、立山)
今日係預計颱風會來臨既一日，
亦係被視為最重點行程既一日 — — 立山黑部。
即係傳說中，單程咁玩會用到「六種交通工具」既地方。
不過有三程其實都係「巴士」感覺既「無軌電車」，
最特別既就係另外個三程既纜車喇。
 |
| (網上圖片) |
我地係由扇澤車站，玩到立山車站，
即係 右邊開始、玩到左邊。
雖然呢兩日一直都話立山黑部行程唔會有影響，
但都有擔心過天有不測之風雲，颱風會唔會行快左之類，
而令到有取消行程既機會。
而最受到颱風影響既會係其中一程既「空中纜車」。
原本既行程單張上面寫住：
如果立山黑部因為天氣問題封山，就會改去新穗高纜車。
但當然，如果真係颱風到，新穗高纜車都係唔會開。
好好彩，
今朝一早既消息話立山黑部今日一切如常。
不過因為天氣既變化話唔埋，
所以都係抱住審慎樂觀既心情去迎接今日既行程。
由於早餐時間係7-9am，
由酒店去立山黑部既 扇沢駅 係15分鐘，
而我地扇澤 去 黑部水壩 既車係10 點鐘班次。
所以食完早餐之後，
有大約半粒鐘係酒店執野、行下，到9點半左右先開車。
食早餐既時候，比酒店外面既一排開始變紅既樹吸引左。
所以食完早餐就出去行下。
雖然天空陰陰地，但呢一刻無落雨已經覺得好好了。
離開旅館，溫泉酒店永遠都係目送你離開、
揮手直到你見唔到佢為止。
唔洗15分鐘就到左扇沢車站，
首先去左拎車票，同埋係遊客中心拎張簡介。
 |
| (網上圖片) |
當然，知道大家好鐘意儲印仔既日本，
少不了係簡介上面放上幾個格仔，比大家係每個車站都CUP個印喇。
呢張係今日既車票。
見唔見到個天？係藍天啊！！？？
因為唔知幾時個藍天會消失，所以好心急想快d上到去 ....
係山腳望上山上面，見到開始有唔同顏色了。
上到一樓候車處，搵左工作人員影相 XD
勁可愛呀！！！！
當然仲有要影埋呢個位，隔離仲有個「破碎帶」既藍色牌，
係一陣間既車程會經過既一個路段，
聞說係施工時比較困難既路段。
講起立山黑部，
最初係為左運送材料、建造黑部水壩而開鑿既道路，
完成大壩之後，就用黎做左旅遊景區喇。
10點既班次都好多人，有旅行團同埋散客，
由於有好多架，所以點坐都 OK。
我地就簡左尾二個架黎坐。
呢架主要坐既人台灣既一個旅行團。
開車了，一段路之後就會開始入隧道。
中途會由單線變成雙線，等對頭車過完，最後又變番單線。
大約15分鐘車程，就到左終點站。
 |
| (網上圖片) |
首先，扇沢既位置係 (1)，一小段路之後入隧道係 (2)，
之後會係 (3) 落車，可以向上 / 下 行，分別去觀景台 (4) / 大壩 (10)，
當然，是但出一邊都得，因為出到出面，(4) 同 (10) 其實都係互通既。
另外仲可以經 (5) 落到 (6) ， 係水壩放水時近距離睇折射彩虹。
 |
| (網上圖片) |
我地就係黑部水壩落左車。
同樣有個站牌。
時間係10:15am。
首先我地穿過通道，去左大壩個邊先。
集合之後知道係呢度大約有35分鐘玩，然後解散。
講真35分鐘，呢度一定係完全唔夠玩架！！！
所以就以9秒9既速度跑上觀景台，嗚嗚。
好彩跑上去大約只係5分鐘。
大壩本身都幾型，然後一路向上行，高空睇更加有feel。
剛好大壩放緊水，所以聽到都幾大既水流聲。
繼續向上行，我部相機影唔到好wide啊可惜。
雖然細妹都影左，但未問佢拎相 XD
所以無得貼上黎喇。
雖然黎到呢度藍天範圍細左好多，
但係山脈都依然好清晰，山間有時又有一細舊霧仔。
又舒服又靚。
一路上，一路影。
其實個水壩放水既高度係幾高架，
但唔知點解我影到好矮咁……
再望望遠處既山，好有仙氣呀。
呢種仙氣唔係琴日個種大到乜都睇唔到，
而係岩岩好個種！！
再望遠d，大觀峰個一邊。
其實係好遠架。
好喇，差唔多上到觀景台既最高點，
再望一望大壩先。
仔細睇，放水既底部，
d水好似棉花糖feel既霧雲咁，軟棉棉啊。
觀景台上既風都比較大，所以又係唔係好自拍到既地方……
係度留左唔係好耐，又要跑番落大壩喇 Q口Q
今次係大壩上面行去對面。
回望上觀景台的路。
呢個時候咁岩有微微雨，所以大家都戴住帽。
好彩呢場超微微雨只係維持左一兩分鐘左右，
都無咁驚。真係好唔想好似琴日咁啊 Q口Q
仙氣大壩。
水壩既水庫一方。
座山既形態好靚。
同一座山，前後一分鐘都無，但呢一刻d雲已經唔同晒位。
黎到水壩既中心點，當然要影落去，
呢個位係極大風、同好大既水聲，哈哈。
雖然水流好似好大，但落到去既河流水流又好似好少咁。
繼續向前行。
沿路有輕風，一路咁行好舒服。
最後行到大壩既另一邊，
好快又到左另一個車站 — 黑部湖 喇。
今次係由 黑部湖 上 黑部平 既登山纜車，
大約只係坐5分鐘左右就到架喇。
回望好有仙氣、
但又唔會遮住山頂同山脈既霧氣。
呢種仙氣真係唔錯，如果天上面再少d雲就最完美喇。
同黑部大壩講聲再見。
穿過隧道，就黎到登山纜車既車站喇。
呢度又可以係張紙度CUP個印，
同埋望住入口處個 Live Cam ... Q口Q，
仲有左邊既電視播放住既颱風消息。
個風依家係九州南部呀 ..........
11:05，開閘。
呢個站叫黑部湖，準備向黑部平進發。
 |
| (網上圖片) |
大約5分鐘就上到黑部平。
然後落車，一望出去。 .........
哇！！
已經黎到有黃葉既海拔高度 1828m 喇！！
好想快d出去室外呀！！
黑部平 係我地今日食 Lunch 既地方，
呢個時候其實都只係11點15分左右咋。
食完Lunch就可以自由出去玩，
大約12點15分，準備坐空中纜車上大觀峰。
所以同樣呢度只係留 1 粒鐘咋 Q口Q
本來未上到黎黑部平，
其實只係以前o係LiveCam睇大觀峰即時影像有印象，
所以一開始同細妹都話：
「我想SKIP左個LUNCH直接上大觀峰啊，我驚晏d會有雲」
但黎到黑部平，成個諗發唔同晒 XD
好想瘋狂留係度影相 XD
雖然心繫外面既景，但只係係看台呼吸左陣新鮮空氣之後，
就去左車站二樓既餐廳食左Lunch先。
團體好似通常都係叫呢個九宮格餐，
聽講大約2,000yen一個。
跟次序打：
魷魚仔、玉子 x 2 、醬汁金菇
雞肉、煎魚、蝦
醬汁、豬、黃豆粉蕨餅
因為唔係暖笠笠，加上雞肉有d乾，
我放左入湯度暖左暖先食XD
其他都真係幾唔錯，
山上既食物黎講其實已經幾正啊。
日本米做黎煮飯點都好好食 ...
唔知係咪因為9秒9跑上大壩觀景台，
所以有d肚餓，食左2碗飯。
個湯 OUT FO .. -_- 將就下。
個湯暖暖的，丸子個口感又泡泡的唔知點形容，又幾好飲。
食完飯，仲有40分鐘。
當然即刻出去，上三樓黑部平觀景天台喇！！
觀景台人唔多，好似其實只係得我地團既人，而且唔夠十個上左黎 XD
唔上由至可，一上，哇 ........................
哇 ..............
我都唔知講咩好喇，只係想講真係好彩色啊。
遙望大觀峰纜車站，太光添，將就下 XD
因為係天台觀景台，所以係望到 360 度全景。
每個角度望既景都好正好彩色，紅橙黃綠青藍色都有，
前者當然係山既色，「藍」當然係山下黑部水庫既色喇。
係囉本來應該係加埋天空既藍色架嘛XD
但其實咁樣已經覺得好靚喇！！
而且颱風當日有呢個景已經好滿足 Q口Q
(此人已被琴日既辣殺天所刺激 ... )
彩、色、好、靚、啊。。。
植物種類都好多，
而且山脈既紋理真係好得意，好似一塊塊牛肉。
再近d。
親眼睇既感覺更加正。
纜車一開就好興奮咁影 XD
啊呵呵。
好興奮、唔知影相、定用眼睇、定點樣好了。
望番落黑部水壩個邊，依家大壩個邊，
相比起我地頭先個段時間、無晒霧氣。
係天台留左一段時間之後，
屋企人話不如落去個花園行下。
於是就一齊落左去喇。
落去之前，再影多張黑部水庫站既高空相先。
落到花園，再望上去大觀峰站。
花園有黑部平三隻字既打卡位。
花園都好彩色喔。
而且有黑部峽谷方向既觀景台。
山上。
係隱約既藍色！！
好慘要用少少既藍色黎興奮一下 XDD
係花園度又逛左15分鐘左右，差唔多要坐空中纜車上大觀峰喇。
於是我地就經過一間手信小店，入番去車站。
排隊。
黎到黑部平既空中纜車站。
呢一程好興奮，
因為之前既登山纜車，係瑞士上Matterhorn五湖健行時坐過差唔多的，
但呢程大型既空中纜車係第一次坐啊。
呢一程纜車無散客，所以變左包左成架空中纜車咁。
由纜車入面，我係車尾窗既位置，由車尾窗望出去站外面。
一陣就會係呢片彩色既上空劃過喇！
係空中纜車入面，簡左最後果個位黎企，
空中纜車既頭尾都有幾舊石磚，
作用類似係如果車身無人，都可以做到抗風、平衡。
雖然係厚厚地既雲層，但呢個時候有dd太陽既影子。
係玻璃入面，影既景好暗添。
終於到大觀峰啦，要落車了。
落車都不忘影番張圖，想講呢程車真係超靚景！！
 |
| (網上圖片) |
搭完空中纜車，就到左大觀峰。
大觀峰可以行既範圍唔大，就大約係一個觀景台咁。
落車會再見到路牌、地圖、現在位置。
我地將會坐13:00既隊道巴士去室堂，
所以12:50會係呢度排隊入閘。
時間唔多，但頭先提過，呢度係一個觀景台，
如果唔係有三段紅葉，應該10-15分鐘都可以等下班，
依家有三段紅葉，所以時間黎講都還 OK。
因為呢度係海拔1800m+，所以同平時既紅葉係唔同感覺，
雖然唔係完全紅色，而係有層次既 紅橙黃綠，
但其實依家已經係大觀峰、室堂見頃既時期黎架喇！
一星期前仲係好綠，而再過多一星期，
大觀峰都超過一半變晒樹枝喇。
所以可以係黎到高點時剛好見頃，真係好興奮啊。
好彩色。
又係時候望番落去，頭先就係下面望上黎架喇。
坐完空中纜車，
就唔洗擔心今日立山黑部要中途撒退喇XD
因為點撒都一定係去室堂、立山個邊走，
如果風速突然增強，
空中纜車點都會係第一樣會停既交通工具，
所以唔會退番落黑部。
係藍色，颱風前幾粒鐘都有藍色，
同埋好感激既係，雖然颱風到係好 sad，
但係今日既能見度係超高 Q口Q 又無落雨Q口Q
真係算係咁。
影相、尤其依家貼太多相，所以用左細圖。
就咁睇可能唔知現場真係有幾彩色，
如果可以，click一click佢，放大黎會睇得開心 d！
順帶一提，如果呢度唔係秋天而係夏天，
一片綠可能無咩特別。但秋天真係好靚架。
纜車上落，當然要捕捉一下。
好正既景啊，如果個天係藍色，
水庫既水面有藍色既反射，一定會更加靚呢。
呢個位勁靚，影唔到個種感覺，
好似滑梯咁。
同埋影相影到個斜面比較細，
但事實佢係好大，而且有好多黃色紅色點綴架，
中間加d灰白色既碎石，成個感覺好型。
繼續遙望藍天，哈哈。
大觀峰海拔2316m，
所以呢度係比起日本本州其他地方早左有紅葉 (或者叫秋色?) 睇。
日本黎計，應該係 北海道 同埋 北陸 最早喇，
大約9月尾10月頭就有得睇紅葉 (或者呢度應該叫秋色岩d) 見頃。
頭先講既山坡斜面，一直伸延到水庫。
12:50 ， 我地開始等隧道巴士，
坐大約10分鐘，去今次立山黑部行程 最高點既「室堂」。
 |
| (網上圖片) |
呢度有立山黑部最高點既郵局，
平時去旅行會寄明信片既我，當然都一定會寄喇。
就係大約13:15到左室堂，大家解散左之後，
我就黎到呢度買左5張POSTCARD。
(點知原來每一SET有2張，結果買左10張)
順帶一提自己既紀錄：
寄出時間係2018年9月30日，而收到既時間係2018年10月17日。
係山頂寄既話，郵截係一個印仔，
大大隻寫住「立山山頂」架。
當然其實自己都有其他款既紅印仔可以CUP，
唔執著於山頂既官方郵便局印章既話，落山先寄都可以。
而我當然係要官方郵便局印章啦，
所以買左poscard之後，就起勢係度寫。
本來 13:15 左右解散，13:50 集合，然後坐14:00既巴士。
但我買 + 寫POSTCARD、
去埋印簡介紙既印仔，寫左差唔多20分鐘，
連自己都估唔到用左咁多時間。。。
得番15-20分鐘左右出外面，嗚 .................
來回跑左個室堂車站先知室外要上樓梯，
於是繼續跑跑跑跑上去喇。
順帶一提，
室堂其實除左係最高點，仲有幾個位可以睇。
如果係初夏，4-6月，有最出名既雪之大谷 雪牆，
都係室堂呢一度會見到的要，當然去個一邊就額外比錢。
而去到呢個時候，當然就無雪牆喇，雪都無一滴喇。
一出到去，就有職員想幫你影相，
但影相唔係我重點，以就SKIP左。
今日食lunch個時見到張poster，係講室堂範圍係有個池，
所以依照住個印象黎到室堂之後，覺得呢度會係有個池。
呢d路真係唔係咁好行，如果無石，就可以跑快d XDDD
唉也，點解人地可以慢慢行，
我寫左陣postcard，就搞到要跑啊 XDD
而且明明話4點半落山，可能因為颱風越黎越近既關係，
所以少左時間留係山上面 .. (結果落到山腳係4點都未夠啊!!)
我幾想一陣自己上落車，慢慢坐火車返富山啊！！
室堂其實無所謂「紅葉」，
但個景係幾型。
個「雪山」雖然無雪，但比起一片「灰色」既無雪雪山，
今次係第一次見到呢種山既形態。
除左有灰色，仲有啡色同綠色，
間唔中仲有少少啡紅色，個色彩感覺好特別，
好似用左怪色 / 反差色 既filter咁。
沿住石路一直行，會見到地圖、路牌、或者一d日文既介紹板。
室堂呢度真係可以留 1 - 2 個鐘慢慢行！！
雖然個景唔夠大觀峰靚 (因為有秋色既關係)，
但係呢度幾有火山口個種型型地既feel，平時係其他地方好少有。
室堂有旅館，例如呢度叫立山室堂山莊，
如果想係立山黑部玩耐d，可以係呢度住一晚架。
但我係打算搵個池，所以行另一邊。
d山d色真係好奇怪架，
紅、泥、綠、灰 咁加埋一齊。
其實真係算幾好彩，好多時睇即時影像，
就算係藍天、都有時會有舊雲遮住左個山頂。
而今次雖然都幾厚雲，但係幾乎所有山頂都好清楚。
黎到地圖，一望，無錯，我要去みくりが池展望台！！
呢度附近有個地獄谷，係會噴煙的。
望到呢個位，已經唔知係佢噴緊煙、定係雲霧黎。。
前面群山圍住就係咁既樣。
再行近少少，有個池。
唔，好啦，就係呢個喇，比想像中細好多。
但都叫做到左喇。
望一望，哇，得番10分鐘。。。嗚！！
都未好好咁睇完成個室堂就要走喇。
不過我係無後悔寫POSTCARD架！！
 |
| (網上圖片) |
落番室堂車站，就排隊等巴士。
都等左10分鐘，早知唔跑咁快，又或者留係上面行多幾分鐘。
由室堂落到美女平，車程 50 分鐘。
唔好睇車程咁長，沿途係好正架，尤其係秋天，色彩簡直係滿分。
同樣喇，係包左成架車咁落山，如果係自由行可以中途落車架。
其實我好想好想係彌陀之原落一落車影相，
因為真係幾靚。
巴士一路落車，比群山同秋色包圍住咁行，
係真係好靚架。
( 講起呢樣，順便講埋，新疆喀納斯出入景區時，
坐區間車個段路同樣都係好不得了！！兩種感覺唔同喇，哈哈。 )
就咁影車窗外，影唔到個種感覺，
所以影架巴士內部，望下同時見到「左、前、右」既景係咩感覺。
哇哇。
真係要講多次，d山既色真係好奇特。
話說坐巴士既呢幾張相都係手機相。
日本最長既瀑布係呢度，巴士經過呢度會慢駛，
同時巴士既電視都有廣播。
唔好見圖好似好短，因為有雲海，所以遮住左XDDDD
因為係盤山既路，所以會一路左、右咁行，
之後到左呢度，簡直要 哇哇哇哇哇哇。
因為一直落緊山，個景係會好廣闊。
然後望到窗外一片彩色，唔「哇」真係唔知講咩好！！
手機影唔到個種彩色，但親眼睇真係好正，
仲要架車一路行，個景就係你眼前一路以唔同角度去望。
繼續行行行。
個山坡有種「天線得得B」既秋天版 FEEL。 XD
遠方既雲海，真係好遠好遠好遠，美女平個邊。
經過一座又一座山，
落到去森林既一刻，周圍開始起霧，
代表我地開始接近頭先見到既雲海帶，同時即將到達美女平站。
森林既樹好直好高，好靚啊，
細妹話有「阿里山森林公園」個「杉林木棧道」既感覺。
到左美女平駅。
呢個駅係乜都無，有間手信店，
同埋有得幫張立山黑部簡介紙印印仔。
所以黎到之後，比大家hea陣之後，就係等下班車。
 |
| (網上圖片) |
坐埋最後一種交通工具，就代表今日既立山黑部之旅完結喇。
聽到聲。
到喇、到喇。
之前上山個架纜車同呢間係有d相似，
不過黑部湖去黑部平既係全程隧道，
而呢間美女平至立山車站就係一半路程係露天既。
今次簡坐車尾。
經過美女平杉林，剛有有「迷霧」……哈哈，但都幾靚。
到了，大家慢慢落車。
呢架纜車既車身係係咁既。
到左立山駅，落車喇。
再見喇，立山黑部。
再見喇，立山駅。
離開車站，會有其他交通指示。
望望個簡介版，今日穿過左座山，黎到山既另一邊。
呢張地圖好正呀。
係立山駅等我地架旅遊巴到，當然呢間時候就影下纜車喇！！
啊啊呵呵呵。
入站喇。
入站喇入站喇。
哎 ... 原來影蒙左。
今日由幾百米高，
上到二千幾米，依家又落番四百幾十高喇。
繼續望下附近既交通地圖，
雖然唔關我事 .......
後來上到旅遊巴，司機同導遊講，
今日較高前美女平一帶落左場好大好大既雨，
剛剛好我地落山前就停左了。
真係幾好彩呢，今日無經歷過落大雨，
即使係微微雨，都只係黑部大壩既個1分鐘既小雨粉而已。
所以，今次立山黑部，我覺得算係大成功了 Q口Q
是因為琴日上高地既天氣情況，所以拉低左要求嗎？
或者係其中一個原因，
但事實上今日既天氣同能見度，已經係好唔錯、好唔錯了。
- Day 3 Part 1 完 -
