地點：旺陽 / 萬榮 / Vang Vieng
住宿：Sleeping Bus 9:30pm
朝早checkout左之後，keep 行李係前台，之後就去了南松河畔hea下。
大約12點幾，
首先去左間向住南松河既餐廳，
食個lunch先。
banana pancake，好homemade既味道，真係好homemade味，唔知點形容。
發覺幾好，難得有樣係大大件既食物，好似係15,000kip，算係抵了掛。
另外飲左杯Lao Tea，苦的。
仲食左個麵，幾好。
呢間就係我地吃野既店。
之後向左邊條路，過橋去對面hea。
就係呢度再hea了。
坐係度hea左3個幾鐘。
睇人kayaking、同埋網下魚咁。
hea左極耐，
之後4點左右就去番book熱氣球既店度等一等架balloon車接我地去場地。
4點幾架車到了，可以上車了，接左20個人上車，
因為人太多了，有人要外掛，所以同行就外掛了。
外掛即是個人唔在車入面，而是企車尾，手抓住扞，
手鬆會除時飛出街咁。
車行到半路，有部電話飛了出街，
跟住外掛個三個入面，有個就叫停車，
問了全車人邊個跌了電話結果無，
最後司機望望部電話，司機說原來是佢跌的，在車頂跌了出來。
(係咪真係呢，哈哈，係既應該)
一路行，d外國人一路係度：balloon ~ balloon balloon~
好搞笑。
到了熱氣球既場地了，有兩架、即是每架10日吧。
見佢地仲整緊，應該有排，就圍住佢行一圈先。
雖然我覺得呢個靚色d，不過個陣我直接話：
「其實我唔介意坐無咁靚色的，因為咁就可以影到靚色果架。」
慢慢望住佢地將一個熱氣球打直。
之後就開始上人了。
然後就到綠色果個。
熱氣球寫住中國臺北乜乜乜的，聽講旺陽只此一家熱氣球公司，
上網有人寫佢地係中國既團隊，不過寫住中國臺北又寫住繁體字，
會唔會係台灣呢？
彩色果個上晒人了，也開始飄飄地，所以d人會壓一壓住。
到綠色。
到我地上去了。
彩色開始飛了。
我地果架都開始整裝待發了。
其實都幾嘈，個噴火位。
不過只係間唔中噴下火，唔係長期開住的。
佢地一路起飛，我地都不知不覺間原來離開左地面。
慢慢咁起飛。
本來會以為會驚，但上升得真係好定，而且個景真係越高越靚，
所以完全只係會興奮、開心，唔會驚的。
由空地，慢慢出去。
係我地個影呀！！！
開始入民房區。
望一望上面。
好正啊。。。真係好正。。。
望一望太陽方向。
好似玩具 ^^ 哈哈。
遠遠有我地的影子。
而長條形灰色空地，就係琴日講果個好似單車公園既舊機場。
再望一望下面。
係琴晚行果個walking street喔。
之後工作人員話，我地會降到very low very low very low，
比我地同河上面既人揮下手。
於是又降落了。
望橋上的人。
落到咁上下，應該真係好低，低到下面講野我地係聽到既高度，
揮手，互影，哈哈。
但其實太矮又真係幾危險，總覺得樹頂就係我地籃底既不遠距離。
有人玩滑翔傘。
個陣我諗，哇，真是同一個天空可以做咁多空中活動嗎。。。
end of tubing 既 point。
要開始升高了，望望我地前面果個熱氣球，已經升到好高喇。
到我地升上去。
想講，係真係好靚好靚好靚。
上到咁高啦，同山差唔多高了。
呢個就係個機場啦，因為升到好高，d屋變到超粒粒啊。
望到個距離就知熱氣球係好慢好慢好慢好慢咁隨風向飄，
其實真係勁靚勁寫意，由矮至高至矮至高，每一個角度都係好正好正好正好正。
真係好正！！！！！好正！！！！！好正！！！！！
當高空睇既時候，就知其實旺陽真係好細，
但可以集好多玩既野於一身，
最緊要係平原附近有好多一層層既山，
無高大既酒店剎風景之類，都令到呢個地方變得好靚。
有聽講過有d人黎既時候係多雲天，會有穿過雲層體驗。
唔知會係點，不過對我黎講，我真係極鐘意今次呢個萬里無雲既藍天。
見到琴日日落多雲，有d擔心今日天氣，但真係好好好好彩係超~藍~天，
尤其係睇景時！我真係好鐘意晴天啊！
一路上升去追太陽落山既速度。
然後聽到對講機既對話，係同前面既熱氣球、同地面既人通訊。
講降落既位置，就係前方既泥色地上。
於是就降落了。
落地落地，要小心d樹。
會有人幫手拉住個籃，唔洗無support、個人要訓底降落個d情況，太好了。
有個驚險情況，就係落地時，我地前面有支矮小柱杆，
爭d撞到，就係千分之一分秒時發現即刻拉去第2個方向，
成功係少於1米之近既距離移開左。
撞之前，其實個腦諗過如果真係撞柱而搞到有咩事，
應該會跳出去，因為超貼近地面，半米距離都無。
不過其實撞到柱應該都係撞一撞即時停低左？？掛？？？
再望望上面。
跟住安全著陸，落地了。
係啦，就係右邊支杆，係陷阱！！
物理題：
如果個籃降落時撞落去，係會向咩方向移動呢？
降落無耐之後，就坐番車走了。
十幾分鐘車程返到市區，已經日落開始天黑。
我地住既附近，有條上山既路，琴晚太黑無行到，
原來都係一堆住宿黎，而且幾寫意既感覺。
我地就係一間餐廳度，由日落hea到7點幾8點，
首先飲左杯 mango shake 同 watermelon shake，好濃好好飲。
然後肚餓了就叫左d野食。
有幾隻狗好應該係係度住開，鐘意走黎走去，成日爬上黎。
之後行陣街，真係勁多韓文，有間K-mart係全部賣韓國野，
而且都好多韓國人係度買野。
一入間店，以為自己飛左去南韓。
呢個正，同translate server error有異曲同工之妙。
先返去拎番行裝，再過對面車站上sleeping bus。
坐呢間車，帶我地去bus station。
呢隻係呢度d tuktuk，頭先hotair balloon都係坐呢架。
上車了，同網上講既一樣，係雙、人、床！！但係勁唔舒服。
首先係因為要放袋，所以隻腳會伸唔直。
第二係其實好似訓地下咁，好硬。
第三係最入面有支杆！！un住你訓！！
第四係上層有窗，下層無，唔知外面發生咩情況，雖然夜晚黎講應該不太重要。
第五係開車之後，架車唔知係咪上山路，所以又左又右，
仲要開得好快，所以係會撞下撞下... (esp. 同頭先講果支巴士杆........)
於是結果就無乜點訓。
建議一個人黎既話，有時間最好唔好sleeping bus，
雖然日頭要坐大約6粒鐘，無左半日，
但是應該會舒服好多，而且行山路應該幾靚，會有景睇。
最緊要係，sleeping bus你會編左唔知同邊個訓，
本身同識既人訓係咁窄既地方都驚整到人，
更何況同個唔識既人，真係唔洗指意訓，
最慘係一陣一打開眼，發現就黎同個唔識既人面貼面就唔好。
床頭有盞燈，開車會自動熄。
佢床位有編號，不過其實無乜人跟，上下格床個價錢都一樣。
而我地今次就係 13 14 號床位。
- - - - - - - - - - - - - - - - - - - - - - 完 - - - - - - - - - - - - - - - - - - - - - -
沒有留言:
發佈留言