地點：龍坡邦 / 琅勃拉邦 / Luang Prabang
住宿：View Khemkhong Guesthouse
基本上9:30pm - 0:00am都係未眼訓，
之後眼訓但基本上都訓唔到，因為我太高了 (誤) ，有點頂腳。
一如所料4點零就到了，可以落車。
仲要停係一個遠過機場既位置。
貼住每位20,000kip，貴到。
有班外國人堅持唔可以咁貴、然後又話唔會比錢先之類，
而呢個價又的確不太合理，
因為一架車3個人又係每人20,000kip、12個人都係每人20,000kip，
講價完全無效。 (司機心諗：唔坐你又可以點呢？)
不過原來本身架車只係想車我地去city center就完，等我地自己行返住既地方。
外國人同司機講左好耐，寫包單要確保車到我地去住既地方，先肯比錢。
反正咁早，大把時間，所以都唔介意慢慢等。
但結果都係一車大約10人上左去，每人20,000kip，
呢度距離市區大約8km路程，一路上其實係平路，但都好暗。
諗起緬甸個d真係好好多，可能vip bus公司多，
又有高 standard d既車 帶頭做起呢門生意？
雖然個時有d城市都係車到無雷公咁遠，但都起碼叫有各種交通簡。
而且即使唔係打橫訓，但可以拉底椅子，好訓之餘又有早餐盒比你，位又闊。
個時起碼都叫訓到，今次真係可以叫無訓過。
接近市中心時，會望到應該係布施街隔幾步就有當地人賣布施既物品。
講起呢度既布施，都有d野諗到想講，一陣講埋布施情況再詳細d講下。
經過橋、又經過機場，首先台灣人落車、之後係外國人、最後到我地。
大約5點到了。
因為d 房full晒，而且未到checkin 時間，好彩木門打開，
係玻璃門見到有人係大堂訓緊長椅。
拍拍門，佢醒左，就比我地放低d 行李，話：
「你地出去行下先，一陣7半先黎checkin啦」
sleeping bus本身唔係好訓到，已經有點眼訓，
不過更加想既係洗頭...
但都無辦法，無房嘛，就出門了。
去邊好呢？原來5:45am開始布施，
以我既情況，聽朝一定醒唔到5點幾出黎，
所以今日去睇左先都係一件不錯既主意。
慢慢行去布施街，其實唔太清楚實際位置，
但慢慢行發現街上面開始有一兩個人、又行行下又多幾個人，
大家都向住同一方向去，就跟吧。
然後，就望到一排凳。
好少可一個城市，凌晨五點可以多人到咁樣。
sticky rice既價錢。
唔知係咪因為被評為世遺之後變左質，太得意呢度，布施唔係當地人布施的，
而係當地人賣布施既野比遊客，去布施比d喇嘛。
想講變左布施得番黎既野多得制、同時亦極度單一化。
事後睇左篇文，講「寮國龍坡邦申遺成功後古城靈魂賣給觀光業」，
呢句標題，真係完完全全將我當時既諗法寫左出黎。
當一個越市，只能依靠旅遊業黎生財，結果會變得一個點既城市呢？
好似變得一d都唔可愛了。
好多時睇人寫遊記話呢度好純樸，結果我感覺呢度就係以錢為先。
「寮國龍坡邦申遺成功後古城靈魂賣給觀光業 (2016)」文章連結：
https://udn.com/news/story/6885/1527692
節錄：
「傳統民房與小商店卻也幾乎全數消失，變成了旅社、餐館、咖啡簡餐店、酒吧或旅行社。」
「龍坡邦的居民、僧侶和旅行社都還沒準備好面對大量遊客。」
「龍坡邦地價飆漲，3年前8000美元（約台幣27萬元）的一小塊地，如今喊價已經高達12萬美元（約台幣402萬元）。龍坡邦居民紛紛把房產出售或出租給外地人，自己則搬到龍坡邦四周的地區去住，也因此正常的城鎮居民日常活動幾乎已不復可見。」
「我們保存了龍坡邦的建築，卻喪失了它的靈魂。」
「一個城市被列名世界遺產，等同步向死亡。」
「這是宗教隊伍，不是迪士尼（遊行表演）。」錢潮沖走歸屬感 老驕傲沒了」
「居民喪失了對社區的歸屬感、修道院和傳統儀式，一些存在老舊地方的驕傲。要重建這種對一個真正社區的歸屬感，不是一件容易的事。」
呢d字句，都精準咁描述了龍坡邦呢個城市，其實真係好可惜。
傳統民風未被保留，被睇中呢片土地裡有賺錢機會既人好快咁取代了。
又或者係原居民遷移既另一片土地上，有另一個舊時龍坡邦既出現吧。
晚上，回想起真是比日頭更集中更熱鬧。
想講無影既一條長長長街，放滿了一長排凳，
凳上坐住一群又一群既遊客，甚至有導遊話比佢地知一陣要點做。
係度打卡影相，一完自己布施以自我滿足既想像，又或者純粹貪玩。
真心覺得自己在布施既有幾多個？
而，好好奇如果拎自己買/做既食物，作為自己想布施既物品，
放入佢地個盤，會唔會比當地人話唔專重 (賣家)、或者唔比人咁做呢？
鐘聲響，喇嘛出現。
聽講坐係度呢班係泰國來的喇嘛。
唔知甚麼人來。
望左可能只有幾分鐘變了質既「布施」，就已經去睇其他野了。。
呢種布施，喇嘛面對一班遊客，
知道自己每日個盤裡一定盤滿砵滿的，
甚至可能發覺太多了。
會點呢。
呢度會真係有原居民在民居布施嗎？
比起呢度，在mandalay見到的布施比呢度的感覺更為真實。
有時會諗，呢個城市個感覺，會唔會其實好似一個主題公園呢？
一踏入呢個城市，其實只是去了一個冠以世遺之名既佛寺主題樂園？
入了去行。
行番出去。
應該是遊客布施完，見有淨的放落籃，當地人會收起來，聽日再賣過。
籃入面有d係sticky rice，咁即係？？拎去掉的？？。。。
見佢地上山了，應該是向佢地寺院進發。
天開始光，有d博物館、寺院開放。
小心，唔係睇既話唔好行得太入，唔係門口個人即刻好似覺得你偷了野咁，
好緊張同你講「ticket!! ticket!!」
有d就唔洗錢的，兜下望望下。
然後經過早市。
好多都係烤d糯米糕、紫米竹筒飯黎賣，都幾貴，聽到竹筒紫糯米係45,000kip。。。
無耐就行左去河邊。
又是經過一個寺院。
周圍行下。
又到了河邊，早上霧多。
隻貓係堆煙度保暖。
好多壁畫既寺。
好細間呢。
無耐就黎到guesthouse，對面係河畔餐廳。
唔食野住，checkin先。
門口有隻喵訓緊，一舊野，巧打耳。
入到去，坐係度等人黎前台checkin。
無耐有個外國人入左黎，跟住就話：
「hello, checkin ? I am the boss, ya may be I am not like a boss. but I am : D」
跟住就同我地搞checkin手續，
不過因為咁早未有人退房，所以仲係未有得入房。
即係未有得洗頭 > <，仲要已經眼訓到極限。。
好少真係會係集「眼訓」、「肚餓」、
「無力不能動」、「想洗頭」於一身。。。XD
但都明既，無人會咁早起身checkout。。。
呢個時候大約已經8點幾，
老細話8:30am有個private tour去關西瀑布，問我地join唔join。
基本上係類似拼車咁，到目的地落車，然後自己玩，之後夠鐘就上車返黎咁。
我地見反正都未有得checkin，又眼訓到無可能自己租電單車去，
咁好啦就JOIN。
雖然個狀態係勁樣衰，個頭又亂，一定影唔到好睇既(有樣)相，
但都好happy，因為車程係40分鐘，坐van仔我一定會訓得著。
然後快速執出輕便行裝，過多陣就上車了，
果然一上車我就訓得好冧~~~~ 落車醒既時候精神了很多！！！！
秒訓技GET！！
一落車，就見到 Kuangsi waterfall park。
大約9:30am到左，有3個鐘係入面玩，大約12:30pm集合返去。
司機話通常唔洗1個鐘就上到頂，或者30分鐘都得，
所以聽到之後我諗時間都幾足夠的，應該係。
雖則係waterfall，不過佢有swimming area，
係可以落水玩的，朝早通常無乜人，但一到中午就會多好多，
下晝應該就會變成Kuangsi Swimming Pool了。
當然都劃有 not for swimming 既area啦，
不過d人係咪真係唔落水就後話了。
首先望一望地圖。
原來關西瀑布除左有瀑布，仲有個熊出沒注意園。
有好多黑熊係度。
有塊板是介紹唔同地方既熊，最可愛當然係 Giant Panda > w <。
講下以前d人點樣對d熊，希望大家好好保護佢地。
「你不會想被困在這個籠中十年吧，那為甚麼熊會想？」(意指己所不欲、勿施於人)
呢個籠佢寫住可以爬入去試，比你感受下當時熊人既感覺。
講下過去到現在，比較出名既熊。
之後開始進入瀑布區了。
d水真係好藍呢！
因為藍色，所以感覺好高原、好乾淨，哈哈。
雖然實際未必係乾淨XD。
呢度睇相都無現場咁好feel，因為流水聲真係好好聽！！
朝早無乜人，所以唔會有太多人既講野聲。
幾識搵位影相，真係幾正。
今朝仲係有霧，本身以為會天陰咁行瀑布。
但黎到之後，好快就放晴了 ^ ^ ~！
呢個係非游池區。
提醒人唔好係度生火。
好冰池feel。
題外話：
因為都係一層層既流水、淺藍色、棧道、行到最後有個大瀑布，
所以就諗起四川一個叫弁尼溝既地方。
雖然成個景係唔同，不過個感覺有d相似 ~
係水車啊。
再向前行，好快就到左大瀑布啦~ 影相影唔出，其實真係幾高呢，
不過雖然叫算高，不過我覺得佢個賣點係佢d水流得好靚，
唔係直落，係散開一層層，好似紗咁~
係好特別呢~~~~~~
水流個種交織錯落感，好靚。
雖然唔係雨季，但流水量都好高。
一絲絲 一點點~~~
係橋上面望番落去頭先望上黎既地方。
再望向瀑布。
影相同現場睇爭好遠呀......點解呢，現場睇壯觀d，個感覺高好多。
之前就行上山。
雖然maps.me有個pin指住個頂話: NO VIEWS AT THE TOP!
但有時間、又好奇心重，就上去了。
呢個位係其中一個瀑布出水口，但d水唔流動的，可能雨季會好d。
好鐘意佢用木做欄杆，好RPG，哈哈哈。
平時RPG d 欄杆就係咁做了。
望出去，原來我地行左上咁高呢。
望番轉頭。
繼續出現既玩樂設施。
遠方既屋仔，唔通係依家d人搬左去既地方？
有條路係去Cave同去水源既地方，睇MAP話>8公里，所以就決定落山了。
呢條路要用瀑布水一齊落山。
對鞋要小心濕呢。
無幾耐就落番黎。
再睇多次個瀑布，同係度hea多陣。
離開大瀑布，原路返回。
發現Swimming Area已經有人落去啦~ 呢度附近有個簡單更衣室，
就係石地上有一格格木板隔住、有門既更衣室，
比人係個度換衫然後落水~
好正好舒服既感覺。
水深好似話有d位 >180cm，要小心呀。
繼續走，黎番熊園。
之後出返門口，景區門口來回 影相 加埋 上山，用左3個鐘左右。
然後上車回程了，繼續訓。
訓醒又到番龍坡邦。
收錢個時收左45,000kip/人，跟住因為之前guesthouse講係40,000kip，就同左佢講。
本身諗住算，但個司機搵番我地問"your guesthouse said 40,000kip?"，
跟住比番5,000kip *2 = 10,000kip我地。
居然唔是見錢開眼 *_*，有點點對呢個地方改觀 *_*
因為都訓左來回程，唔算太眼訓，就兜個圈先返去 Checking。
龍坡邦d大路係馬路，小路係花園仔咁，真係好靚！！
見到有告示牌貼左幅小朋友畫，唔知點解係PoliceHome。。
成個城市既建築，令到呢個地方感覺好寫意。
行行下，就到左香通寺啦 ~ ~
身為龍坡邦最出名既寺院，收費20,000kip。
呢度比較特別，牆身好多用馬賽克feel既片黎拼。
每一幅外牆，圖畫所表達既都係一個故事。
諗起上年去敦煌莫高窟時，內部壁畫既經變畫，
睇黎佛教都係好鐘意呢一類既圖畫。
原因相信同當時莫高窟講既相似，
因為以前既人，大部份都唔識字，變左經書比唔到佢地去睇/抄寫，
所以佛教徒會將佛經入面表達既故事變成一幅圖，
等人易讀、易明、易了解d。
香通寺最出名既一幅畫，叫 生命之樹。
樹係佛教入面係比較重要既一樣野，原因可能同當年佛陀係菩提樹下得道有關吧？
遠睇。
有sticky rice係度，曬乾左的，類似係獻上既意思？
另外除左佢既貼片畫—外，佢白底金漆既畫都好有型。
入埋去入面望望先，當然要脫鞋。
類似就係咁。
另外仲有間係關左門，係門口個洞望入去，見到幾個佛像既堂。
香通寺靠近湄公河，有好多出入口，我地就係湄公河既出口離開了。
睇完香通寺，就返去CHECKIN，
實在太太太太太眼訓了，恰左一粒鐘先再起身，然後就上山睇日落。
有架好支老既車，好正，如果睇到佢郁就仲正。
上山上山上山上山上山。
未上到頂個風景已經好寫意。
之後經過一個以山體為基石既佛寺，有條地道可以去山體入面，
條路好短，好矮所以要踎低行入去，盡頭也是一個佛堂。
好快就出番黎，繼續向山上進發。
到左ticket booth個位，就有張繪畫地圖。
買飛，也是20,000kip。
右邊就係龍坡邦市區了。
因為永珍、旺陽同龍坡邦都係河邊既市鎮，所以呢次旅程日日都係有河睇XD。
某程度上，旺陽同龍坡邦望落去第一眼有dd相似呢。
對面都有好多屋，估計更加睇到當地生活。
理想與現實——現實篇。
第一次見寮國景點係咁多人!!!!！
大家都爭住
所以就只係呢個位置好多人，其他位置雖然都多，但無咁密。
日落黃昏。
人潮。
太陽落山了。
我無全程睇住，影完就閃左去後面行，因為太逼了。
到太陽落左，人散左，先再返黎影一影。
而期間，去左另一邊，睇類似禾木村出名既坎煙。
坎煙大概就係當地人煮食時，煙囪出既煙形成既一種類似晨霧既東西吧。
其實不比禾木差 (甚至我覺得個大環境黎睇，仲靚d tim)，
當然可能係因為d人講到禾木神咁拜，所以到左禾木，覺得落差太大，
所以先會覺得無呢個咁好睇？？
好啦，總之就係坎煙吧，各有各靚啦。哈哈。
碼頭位置。
變暗了。
亮了燈。
往上望，山頂建築。
天色漸暗，而我地都慢慢落山了。
落到山已天黑。
皇宮，聽日去的。
皇宮前就是night market啦~
其實d野有d都幾靚，如果唔洗煩講價呢d野，可能都會買下哈哈。
去左掃街。
本身話試過寮國自助餐，即係比15,000kip，
你任意係唔同既盤放野上碟，佢再炒埋一碟比你。
想幾多都得，只要放滿一隻碟就得，只限一次。
但所有野炒埋一碟個樣太唔靚，唔食。。
真係好得意囉！椰子(分開左2邊)、芒果、波蘿(仲要起左釘)同香蕉！！
繼續掃街，試波波腸(類似台灣腸既味道)，
同埋雞翼！好香呀！！！！
飲papaya同mango shake，麻麻地，之前旺角間餐廳好飲d，
同埋柬埔寨暹粒個時，間間都好好飲！好飲過呢間！
呢間芒果味唔濃，唔香。。
之後就去左L' elephant吃，係龍坡邦既法國餐廳。
因為曾經係法國殖民地，所以會有法國菜食呢。
前菜，好食呀點解前菜係通粉架~~~好味。
我覺得佢隔離個d汁，加落去通粉先係重點，勁開胃。
前菜，幾難得呢度食到呢種味道。
仲有個法包，我無乜點吃。
(相片待UP ... )
(待續)
- - - - - - - - - - - - - - - - - - - - - - 完 - - - - - - - - - - - - - - - - - - - - - -
沒有留言:
發佈留言