【瑞士 9d8n】Day0 香港國際機場、多哈國際機場、蘇黎世機場 買Swiss Travel Pass

Day0：2018年6月25日 星期一
地點：香港國際機場HKG、多哈國際機場DOH、蘇黎世機場ZRH

今日係幾特別既一日，呢次旅行都係一個幾特別既旅行。
有各種原因啦。

- - - - - -

( 以下一堆廢話，可SKIP。 )

另外就係，今朝細妹去機場，經AMS飛蘇黎世，
然後就直接去瑞士Basel、法國Colmar、
之後南德、西奧、最後瑞士，總共18日。

而我就係今晚食完飯先出發，只玩瑞士、9日。
同樣係飛蘇黎世，不過旅行期間我地完全唔係附近，所以係見唔到面。

今次旅行，雖然係一月、仲返緊上一份工時買既機票，
不過到左五六月，又剛剛好係裸辭轉工既時期。

而去完呢個旅行，長假期正式結束了，
開始下一個新既挑戰。

有時諗，既然都有一個半月長假，
點解唔拉長個旅行，又或者去多d地方啊？

不過係呢一個半月入面，其實真係日日都咁忙。
你咁我放長假有乜咁忙呀？我都想知點解咁忙XDDD

如果要紀錄，主要係其中有一兩星期要教三個中學生既數，
亦同時有兩個星期係PT舊公司影相，
呢d都係好即時，突然出現的，
亦都有諗過好無推左佢比自己HEA。

另外就係假期期間，都有為旅行之後既事打算一下，
以免旅行後零動力，更加唔想返香港。

除此之外，有多既時間就係周圍食下野，
LUNCH又好DINNER又好，好少可可以咁自由，想去邊就去邊。

呢一個半月，無咩唔慣，反而好自在 ~
我想做既野，其實都做唔晒。：P

一個半月話長唔長，話短唔短，好多人休息都起碼三個月以上，
只不過我知道我拖落去我應該會繼續拖，
所以當有心去計劃一下時，就GOGOGO吧！

- - - - - -

而既然旅行後都已經有打算，咁就無憂咁去今次既旅行吧 ~

上了機場巴士，開始覺得原來真係要去瑞士了。

到左機場，又係時候Checkin，因為班機好Full，無得簡窗口位。

今次要著行山鞋！最主要係因為預計要行雪地。

買左應該起碼有半年，終於第一次真正咁著住佢。

當然為左唔好重蹈當年去歐洲著Timberland搞到腳瘀既覆轍，

我有一日係香港係有試著半日，OK先著去旅行架！！

不過真係幾好著 ~~~
係我暫時既人生入面價值最貴既一對鞋 XD

候機，細妹呢個時候上網了，原來佢岩岩land到AMS，

係當地6點，天仲好光，於是佢就出左市區玩，夜晚再返機場。

佢既航程係11個鐘 (HKG->AMS)，之後飛1個鐘去蘇黎世ZRH。

而我去多哈，只係一半航程就已經8個鐘啦，

發覺下次都係直接歐洲轉機好似仲好，加埋飛既時數無咁耐。

本來睇中瑞航直飛，6月中$4600hkd來回連稅，

但居然撞正其中一日一定要留係香港既日子.. 

而7月瑞航已經極貴，要7千幾...

結果唯有買7月Qatar轉機 ~

不過亦都可能因為咁，所以先至遇上咁完美既天氣！！

Qatar d 機幾新幾靚 ~ 

不過同行個位個USB位壞左無得差電，用左我果個USB位差XD

不過我無乜用電話，唔係好洗差電 XD

開始肚餓，不過好快起飛，都好快有飛機餐食。

成程機好平穩，勁似係平地咁，但可惜都係訓唔到。

食左2餐飛機餐，然後就到了多哈。

今次轉機唔洗安檢，直接黎到候機既超大堂，

因為早左1個鐘land，所以本身已經勁多時間轉機，變到極多時間轉機。

3.5 hrs 變 4.5 hrs...

如果係第二程機早左，我會開心d囉 ~！

玩下佢二樓既無人駕駛車、又用下佢wifi上下網，

又望下多哈機場d「景點」。

其實都黎過5次，所以都無好興奮咁周圍遊，

都係慢慢咁行下睇下。

因為飛機上面完全訓唔到，於是係呢度又恰左半粒鐘。

之後就登機啦 ~ 

當我上機時，細妹都差唔多登機了 (無錯佢係AMS係過夜轉機)

本身過Gate，經過然後話「咦？細機呀？」

但行近d又唔算細機。

跟住望望個引擎好似787咁鋸齒尾 ，

(btw 明明上機時見係鋸齒尾，

但後來落機後見唔到個鋸齒，唔通我個時望錯左另一架？？)

之後一入去d排位又係3-3-3，架機又好新好靚咁，

以為真係787啦！

我地唔係窗口位，而因為787既窗口係好大，

坐中間既3-3-3應該都會望到出面既景，

所以一入到去，就講左句「d窗比我想像中細喎」

再過多陣，就話，

「唔對路喎唔係話d窗無得關，佢會有自動調節架咩？」

最後即刻係座位拎左張逃生紙睇，
Ok，thanks，係A350-800.........  即刻冷靜左，成件事勁樣衰 :0)

不過都係幾靚既，但以為有驚喜囉 T口T。

呢餐飛機餐係早餐，叫左個麵包布丁食，甜甜的。
但，我都係鐘意蛋多d！！！

有個蛋糕仔同雞批，我只係食左蛋糕食，不要食雞批 > <！

呢個航程6個鐘，都係好穩定，不過我都係訓唔到。

到落機時，唔知係太大風定點，
好似滑翔傘咁好飄~好飄~好飄~好飄~咁落地。

沿途一直望出面天氣如何，由Cloudy，
去到就黎降落一帶無乜雲 *口*。

最後，見到個天超靚，T口T
然後降落到我無諗過會咁快黎到既瑞士。

同時，細妹已經係4個鐘前降落蘇黎世，
並且已經買左half price pass坐左去Basel，準備向法國Colmar進發了。

因為旅程無一日會撞到，所以都係個句「香港見！」

細妹話朝早Zurich 9度，不過下晝開始熱，
而我地降落Zurich時，係下晝2點左右，係22度 ~~

而落地第一件事係睇物價，
因為細妹sd左張相過黎話細水1.5CHF一支好難飲，
其他要3.5CHF。

不過因為當時落機，只有KIOSK呢間便利店，
所以價錢極貴，我地望望d水、飲品要3.95 CHF (~$32hkd)。

後來去到超市COOP / Migros，窮人恩物窮人勝地！！
1.5L水 0.7 CHF咋 ~

而且遲d會講下，瑞士度度都有drinking water免費斟架，
所以係唔怕無水飲架 >  <

天氣，晴！

落機之後搭電梯落去。

然後上無人駕駛列車。

當然企車頭，車速都幾快啊。

順利入境，之後就去拎行李。

經過路牌，去火車站。

然後就去買Swiss Travel Pass，係一個類似Rail Center既地方買，

呢個時候已經聽到周圍都係廣東話 XD。

如果唔介意比多$50hkd (反正張pass都幾千了)，

會建議大家係香港買左先。

因為呢度d人好休閒，好彩我地落機時間算少人 (6-8人)，

2點9左右，都要等20分鐘。

聽過人講，多人時係可以排成個幾兩個鐘....

( 因為遊客想劃位、坐觀光列車之類全部都係呢度會搞埋 )

而我完全無search過，以為排隊幾分鐘就會有，

於是就無諗住香港買左先，無左回事 > <

本身有班係兩點幾開，而因為要搞swiss travel pass，

於是要遲一班車先上到，所以上車時候係3點幾了。

拎到pass之後，即刻衝去月台，

不過直車去Luzern就無啦，要去Zurich HB轉車。

呢度有極多月台，

不過機場南下既九成九都會經Zurich HB。

跟SBB Mobile呢個App，我地落左黎其中一個月台。

基本上架架都會去Zurich HB，但有快同慢之分，

所以最好睇SBB Mobile APP個到達時間為準。

注意既係，呢度既火車，

如果想上落車，係火車停低既時候，佢門口個開口掣會著燈，

想上落車記得要按一按佢先會開門，

如果唔係，佢度門係唔會開架。

咁樣做，聽講係為左唔好令 室外既溫度 影響到 火車內既溫度，

例如冬天，所有門開晒，火車入面就會好凍 ~ 之類。

開車了，望望個景，

係度諗幾時會開始見到靚景呢？

定係會好樣衰架？

機場距離市區好近，十幾二十分鐘左右就到了。

Zurich HB係個極極極極極大既火車站，

而且上下層，嗚呀！！

下一班去Luzern仲有10幾分鐘，有時間可以係度睇火車呀！！！

有個好多黎緊班次既板。

呢架係我地黎緊坐既，大約一個鐘左右會到 Luzern。

因為有時間所以周圍行下。

跑去車站大門望望。

路面電車啊！！！

好正啊！！鐵路之國、單車之國！！

呢個國家有齊晒我鐘意既野 > < ！！

啦 ~~ 啦 ~~ 啦 ~~ 啦 ~~ 啦 ~~ 

好正。

正正正。

口渴了，咁岩Fuse Tea做緊Promo，超冰凍！！
但當時覺得呢度既飲品好貴，唔捨得飲呀 ~~

係車站附近玩左一陣，時間無多，

係時候返返月台上車。

去Luzern既月台，

同出面條街同一個level，唔洗上落樓梯 / 電梯。

上車啦上車啦，以Zurich HB為中心既火車，

主要都係兩層，以紅、白、深藍之主。

之後會發覺，唔同區、唔同線既車會唔同樣，

慢慢會講番同貼下圖 ~ 

係瑞士，望一望車既外表、或者內部一d設計，

就算唔識分車種、唔係鐵道迷，

都一樣識得分自己大約係坐緊去邊 ~~

同好多國家一樣，

火車車門附近會有顯示方向、經過既大站/主要站、同終點站。

車站、月台都會有地圖、同埋同職員聯絡既一d設施。

時間黎到15：30，仲有5分鐘開車。

係靚靚藍天之下，係時候上火車了，向Luzern進發，
開始 Day 1 既行程啦 ~~ ！

- Day 0 完 -