地點：伯連納快線 Bernina Express (Chur → Samedan → Pontresoina → Tirano)
住宿：Hotel Drei Könige, Chur (庫爾)
呢一日應該係瑞士之旅入面，真正有Plan過既一日了。
雖然係出發前一兩日先去認真度一度，不過呢一次，
真係超完整咁諗究竟最好坐邊架車、
Miss左呢架仲有無Backup等等，都要計好晒。
因為只要錯少少，係班次唔密既情況下，
之後既所有想落車既站都可以直接SKIP，唔洗再落車，直接坐返Chur。
講起呢條路線，佢有好多唔同既橋同隧道，
但真係唔好以為得最出名個兩座橋先至特別。
以為坐4個鐘就係為左2個橋既位會好唔值？錯了錯了。
呢條路線就算上落差有千幾海拔，
都完全無用過齒軌登山，完全係靠佢不斷咁迴圈上落山，
所以係同平時既登山火車有完全唔同既體驗啊。
中間經過一d好特別既隧道，8字型咁上落斜，
個體驗好正 (一陣會提及) 。
於是，對於可以成功醒到，
踏出成功既第一步，我是非常興奮的。
講出黎都怕嚇親自己，
今日第一班坐既車，時間係：6:58am！！！
當然好多人都可能覺得好容易、好可以。
但係我呀！係我呀！
我居然唔止係6:58am醒，係6:58am上火車呀！！
係乜野驅使我可以6:58am上到火車呀？
係愛呀？定係責任呀？
係時差呀呀呀呀呀呀呀呀呀！！
睡意？真係無呀，
因為前一晚黎到Chur，咁大風咁涼都係因為多雲，
因為前一晚黎到Chur，咁大風咁涼都係因為多雲，
明明天氣預報都話瑞士東部多雲，
而且係飛機上面望一望同行帶既一本講瑞士既書
書上面寫瑞士東部無雨季之分，因為一年入面大部份機會都會落雨。
所以今朝一起身見到個天咁藍，係極興奮呀！！
不過為人比較小心既我 (思維上小心，行動上大意，OK？！)，
都抱住「一陣有4個鐘車程，天氣會點話唔埋」既心態，保持住冷靜。
好啦，講真話，你睇我其實都真係幾眼訓，
影左張唔知睇到乜既相出黎。
睇相，會睇到IR字眼，即係InterRegio。
講起呢樣，瑞士有分幾種車。
高速鐵路ICE (Intercirt-Express)
城際列車IC (Inter City)
中長程區間列車IR (Inter Regio)
區域快車RE (Region Express)
區域慢車R (Regio Zug)
近郊火車S-Bahn (Suburban train)
通常來往繁忙大站都係坐ICE或者IC，
Bern、Basel同Zurich見到IC既機會比較大。
至於IR、RE、R 就係相對無咁繁忙既大城市，
S-Bahn就更加係一個區入面既各個小站啦。
順帶一提，ICE、EC、IC、IR，
通常時速都超過200km/h。
聰明既你，
如果係plan緊瑞士、又或者係睇緊Bernina Express觀景列車，
當然知道6:58am其實係無Bernina Expres開出架。
不過如果係更聰明既你，
應該會知道觀景列車係同普通列車行同一條線，
顏色亦都係一樣。
而且有以下原因點解我坐普通列車而唔係觀景列車。
1.
用Swiss Travel Pass 坐觀景列車雖然係唔需要比額外車票既費用，
不過觀景列車係每個人要比 > 12CHF強制訂座費，
雖然呢個唔係重點，如果值得當然要比喇，可惜就…繼續睇落去。
2.
觀景列車係採用車頂都係玻璃、主打各角度既景觀。
缺點係：無得開窗。
係呀，無得開窗！！無得開窗！！無得開窗！！
好大好嚴重既缺點呀！！
先不論係影相既問題，當睇景時隔左層玻璃，
都無咁好feel喇。
雖然話觀景列車通常會連住一兩卡二等座普通車卡，
不過如果要坐二等座普通車卡，咁坐觀景列車黎做乜？
3.
因為我地想早過Bernina Expres去到Tirano (意大利)，
其一係影Bernina Express入城喇。
4.
其二，Bernina Expres到Tirano後，
距離我地最遲可以坐回程既火車只係得番唔夠一個鐘。
但我想係Tirano食意粉同意大利雪糕 XD
5.
咁做乜回程唔坐Bernina Express走呀？
因！為！我！地！要！係！Brusio！落！一！次！火！車！
Brusio係咩黎架？就係最近 世遺條環形橋 既一個火車站。
至於詳情一陣會提起。
咁點解去程唔去左Brusio先呀？當然係因為班次問題啦，
如果去程去Brusio，就要11點左右去左Brusio，
等11點幾Bernina Express景觀列車經過，
然後你就可以係Brusio等番2個鐘，1點幾先再有火車去Tirano，
um，又或者坐TAXI啦。
之後點回程？唔知呀，無車架啦。
唔係既，都可以原車返既。
6.
當然Brusio上車後，
回程仲有要係一個叫St. Mortiz既鎮落車遊覽喇。
而最後就係成個鐵道旅程完結之後，最理想係大約8:03pm返到Chur。
因為呢一晚，瑞士時間8:00pm開始，
就係世界杯分組賽 瑞士 對 哥斯達黎加。身在瑞士，點都要感受一下吧！
呢個就係最緊要點解想8點返到Chur既主要原因呀！
結合其實唔止以上既原因，得出既結論就係，
我地決定左唔坐觀景列車了。
好啦好啦，講咁多其實都知無人想知，
睇番行程概覽個一篇，
會貼個當時 Plan 好 (後來其實都叫做實踐到) 既完整時間表出黎。
開車啦，開車啦。
普通列車，個人認為唯一既壞處係比較多既轉車站，
不過全部都係呢個月台落，對面月台上。
而且只要有一架火車有delay，另一架都會等埋你轉到車先會開車。
因為由Chur去Tirano，中間有個大站St.Moritz，d車通常分2段。
Chur > St.Moritz 同埋 St. Moritz > Tirano。
而中間有條線會連接2條線路，
咁岩又可以令到成個鐵路時間縮短20分鐘。
唔知我up乜呢，就係咁：
 |
| 唔好理紅框， 望望右邊綠線、上面藍線、下面深紅線。 我地由上面Chur去最底Tirano。 藍紅線都會去St.Moritz。 但中間有條綠線會穿過2條線既中途站。 即係話，如果坐藍線，中途轉綠色線，再駁紅色線， 係會快過坐藍線到終點站先轉紅線。 亦同時話，想快，就要轉多次車。 至於plan麻唔麻煩呢？一d都唔麻煩，因為有SBB Mobile APP， 講晒比你知最快要點坐。非常好用既APP，請一定要DL。 |
講解完以上，雖然仲有好多野想講，
但之後會一一補上，繼續講旅行先。
琴日都無專登去影Zurich去Chur既火車板，
都醒唔起係咪有呢一個範圍既地圖。
所以今日要影一影啦，
我地係Chur去Tirano的，呢塊板都有寫條路線係點架。
唔止，佢塊板上面咪有幾格既，
係講緊沿途要注意既觀光景點位置 ~
( 想睇清楚d可以 Click 圖片放大睇 )
係呀，好眼利！！你見到麥當勞個紙袋？
琴晚個CBO無食呀！！！太眼訓喇！！！
今日先食啦，食完無肚痛，唔怕唔怕。 T口T ...
頭先提及過，唔坐觀景列車係有得開窗，
要咁岩連住架 RE 先得 ... 嗚呀 ...
但第一程係IR，結果都係無得開窗 Q口Q！！！
之後轉車後既車程，先有得開窗 Q口Q
好彩呢條路線頭呢程重點唔多 ...
打開SBB Mobile寫話有Photographer既車卡，
於是決定一陣去巡遊下，但見到幾個特別既位。
見到有咁既車卡，前面連住既係火車車頭了。
(不過火車車頭又再另住另一個火車車頭，
所以呢度只係成條列車既中間位置。)
有一卡係咁樣的，自己一個人去巡車卡有少少淆 (唔知點解XD)
跟住見到有個座位擺放咁特別既卡更加係個心離一離好想快d走XD
明明係一個好正既車卡黎 > < ！
遠睇係咁樣既。
之後呢個，個玻璃窗極大，
塊玻璃可以話差唔多由天花板落到地面既高度。
望下出面既景先。
係正正常常既草原小斜坡，但我已經覺得好正！！
呢個時候既陽光又打得岩岩好。
係瑞士間唔中都會見到直升機飛黎飛去，好多架，
呢架，無記錯應該係睇住佢由地面起飛到天空的。
坐左大約個零鐘，會經過Thusis既站，
然後無幾耐就會經過Solis Viaduct。
(圖片 待貼)
之後係就黎到 Filisur 之前，
會黎到 Bernina Express (同時也是 Glacier Express) 其中一個好出名既景點位：
Landwasser Viaduct ~~~~~ 太可惜呢個時候無得開窗呀！
 |
| (網上圖片) 大約Filisur位置，地圖既中間。 ****P.S. 呢個唔係瑞士地圖，只係 瑞士東部既地圖。**** |
d反光勁到呢 T口T ...
無辦法，幾反光都會影，
只不過想講既係如果車卡再長一d，會正d，哈哈。
就咁樣，好快 (我估 6 秒啦) 就入左隧道，
所以如果唔係本身知有呢個位，應該會一不小心SKIP左。
( 有種台灣南迴線經過多良車站既感覺，又係好快就過左 XD
所以係就黎到既時候都有緊張咁望實 XD)
 |
| 上圖係冰河列車全線路線圖。 而話說冰河列車其中一段 ，係同 Bernina Express 既 Chur <->St. Moritz 重疊。 P.S. Bernina Express係 St. Moritz之後，會再一直南下直到意大利 Tirano。 |
好多人認為呢條橋 (Landwasser Viaduct) ，
係 Glacier Express 冰河快車之中最特別既一段 (Chur > St. Moritz) ，
但係 Bernina Express 黎睇，呢段只係前哨戰而已。
回頭望，就知，條橋其實唔長，
而且都唔算太壯觀 (火車上既角度)，
因為火車入面好難望到條橋有幾高。
如果想有壯觀感覺，應該有幾班會有開窗既望會好d (？)
又或者可以係附近既站落車，然後搵路過黎附近，
再望過黎火車過橋會更靚吧？
不過我見好多影到條橋好型既相都係 航拍角度 ...
火車繼續經過斜坡草原。
同行係神不知鬼不覺既情況下，遙遠咁用長鏡影到一列 Glacier Express。
嗚呀，點解我見唔到架，同行其實你係咪先係鐵膠，
次次都比你發現到火車既。 緬甸又係、今次又係 Q口Q ~~
不過當然，見到就好，咁連帶我都會睇到 ^口^
沿途仲有好多其他既橋，不過無剛才個座咁知名。
講起橋，仲要講下隧道。
個人覺得 Bernina Express 最出名既2個位都係橋，
但其實有個位，雖然唔算太出名，
可能因為影唔到佢個種 8 字上落山既感覺，
但係當你坐係火車入面既時候，經過呢段路你會覺得好正。
條線路係咁樣既：
( 向左係 Chur 方向，向右係 St. Moritz，虛線係隧道
我地依家就由左向緊右邊行緊 ~ 一直上緊山 ~
全程由 Chur 500+m 上到 St. Moritz 1800+m，之後再上 2000+m，最後落到 400+m )
 |
| ( 網上圖片，按圖放大 ) |
即係邊一段呢？可以望下 Bernina Express 路線圖節錄：
 |
| 左上角係剛才話 Bernina Expresse / Glacier Express 最出名既兩條橋之一 (Landwasser Viaduct)， 過左之後，就開始有隧道。 中間一堆GuluGulu就係我講既範圍啦 ~ |
如果有機會坐，經過呢段，記得要好好感受一下！
無幾耐就到左轉車站 Samedan。
一落車，即刻 Feel到海拔之差，因為呢度好涼爽啊！ ~
呢架車 08:48會到 Pontresoina，
其實Samedan去Pontresoina只係 15 分鐘左右車程，
就如呢一篇一開始講過，純粹係為左 Skip St. Moritz 而轉既一條線。
因為班次接駁問題，咁樣坐可以快差唔多1個鐘到 Tirano 架 ~
於是我地回程先去 St. Moritz 啦 ~
上車之後，好快係 Pontresoina 再落車，
然後呢一程就會直接去意大利既 Tirano 啦 ~
距離上車仲有少少時間，於是我地就周圍行下。
比我地見到箱根登山電車 XD
原來1979年時，RhB 同 箱根登山鐵道 互相成為 姊妹鐵道，
原因係兩條路線，都是非齒軌黏著式登山鐵路 既代表作 ~
就係剛才提及過，全程無用齒軌上落山，
一直靠不斷地打圈黎抵抗海拔過千之差既坡道。
上車了，呢一段既風景真係好精華，
因為由 Pontresoina 開始 (或者可以話 St. Moritz開始)，
就係開始向 Bernina Express最高點進發。
 |
| ( 網上圖片 ，海拔爬升降落圖 ) |
依家位置係 St. Moritz 附近既 Pontresoina 站，即係 1800m 左右，
向 Ospizzio Bernina 2253m 進發。
呢一程車雖然係普通列車，但佢同觀景列車一樣，
係某一d位會慢駛，同埋會有廣播介紹沿途既景觀。
呢條線點解叫 Bernina Express，
最重要當然係佢會經過 Piz Bernina 啦，即係皮茲伯連納峰 ~
而第二程既路線圖係咁既，由St Moritz至Tirano：
 |
| ( 網上圖片 ) |
今次上既車係RE，係可以開窗架，
但對於第二日到步既我地黎講，仲未意識到係點樣開窗，
當時仲以為係無得開。
但好執著我，望住窗上面既把手，
一路諗佢既開窗方向會係打斜向出、定係拉下拉既呢？
又怕佢打斜開，個窗會好似飛出街咁 XD
但唔識窗會好sad！
因為呢一程就係會經過世遺既Viadotto elicoidale di Brusio，
即係布魯西奧螺旋鐵路橋，唔開窗一定會極大遺憾啊！！
呢一程上落既人好多，好多人會去環湖、遠足，
我地上左一卡坐左太部份日本人既日本旅行團，
好多都係上左年紀既公公婆婆，同埋好Nice既導遊，
睇佢地去旅行，覺得好可愛。
同埋個時個感覺會係好開心架！ XD
呢一程火車經過呢度時都幾Full，向住冰河既位置已經坐滿人 T口T
所以都好難去到窗邊影。
而且呢個時候未識開窗，所以影極都有玻璃反光。
當時諗，唯有等回程機會啦 ~
個景真係好正，至少係對於黎到第二日既我，
覺得超正，係咁「哇！~~~~雪山呀~~好近既冰河呀~~~」
但因為唔係面向冰河果個方位 (右邊) 坐，所以嗚啊啊。
見我個樣「="=」，同行就表示 ：
「你之後個咁多日見到既雪山，
都一定大座過呢度，到時有排你影呀。」
其實行程既安排，係簡左坐鐵道之旅先 XD
要慢慢一步步見到雪山由遠至近，靚死自己 XD
山腳呢一排野，唔知咩黎。
望下窗上面就係手把，但究竟點開架呢？
後來先知，原來真係拉一拉，跟住向下推就得！！
嗚呀，如果係呢度有得開窗就好啦。不過因為海拔2200m，所以都應該會幾凍，
加上火車行緊，車入面好多都係公公婆婆，
未必受到呢種寒風。
有一次係1500m+既時候開窗，有個婆婆要求關番，
所以最後唯有去近車卡既尾先開窗 > <
最重要既係，其實落到1000m左右，
全車開晒窗都已經無所謂 ~ 直到迴圈個邊既時候，
幾乎個個窗都係大開架 ~
過左冰河之後，繼續上山。
今日真係勁好天，一路上山時望住岩岩行過既火車路，
覺得真係好正。
另外，因為已經到左海拔2000m左右，
所以呢度既高山感覺開始有點當時新疆北疆騎馬時既個種景色，
大石山、碎石、小草散落一地 XD
經過草原既景，又黎番冰河喇！
如果條河再長d就好 ~~
雪山腳下既水一定超清涼 ~
忍唔住狂影。
Zoom近d影。
火車沿住湖繼續行。
回望過去。
之後就入隧道啦。
不得不提呢個 Halt auf Veriagen，
英文意思：Stop of request。
咩黎架呢？
呢個可以apply落去瑞士 (又或者係歐洲國家) ，
因為好多RE、S既火車，會經過好多細站，
但未必個個站都有人上落車，
所以係某d站，需要 係火車/月台 禁掣，架火車先會停。
SBB Mobile 既App會寫明你想落既站需唔需要 Stop on Request，
見到要Stop on request唔洗怕，佢唔會唔理你走左佢，
佢真係會停低架。
今次旅程，只有一個站需要Stop on request，
就係 Brusio，即係一陣回程會落車睇火車橋既細站，一陣會提及。
除左SBB Mobile App會寫你想去既站需唔需要「Stop on request」，
當佢通知你下一個站係邊度既時候，
你都可以聽到佢講「Stop on request」。
記得係火車到站前按就可以了 ~
係群山之中穿過，難怪大家都話Bernina Express個景觀好正。
不過講起呢樣，呢個季節黎既特色係周圍都有花。
但如果係初春或者秋末黎，個變化會比起初夏黎更加震撼。
點解我咁講呢，因為當初春秋末既時候，
海拔2000m+既雪仲未融，
所以你會由一片綠草原600m+上到2200m+既雪原，
最後落番400m+海拔既草原，
會好明顯咁睇到海拔既差距帶黎既景色變化，
亦都係超特別既一環 ~
冰河融化，而變成一條條小瀑布，
都係初夏黎到既特色景觀施一。
每次見到冰河，亦連帶知道好快會見到冰河而形成既湖。
呢個位停車比較耐，亦係呢程差不多海拔最高既一個位置，
於是我就落一落車，去月台附近影下相。呢個景現場睇好正，我點影極都影唔到當時親眼見到既感覺。
只記得，當時一落車，係好深深感受到呢度特別涼爽既溫度，
真係超舒服。
過左呢度之後，海拔就會一直下降，由2200m+ 落到 400m+，
越黎越熱，然後就會開始唔捨得咁涼爽既溫度呢！
有好多人都會係唔同既中途站落車遠足，
每一次有一大班人落車，都會即刻望望佢地個車卡，
右邊方向有無無人既位置可以坐。
因為一陣既迴圈橋， St. Moritz 去 Tirano方向，
都係坐右邊先睇到架！
上番車，就係呢一刻，車卡入面有人開窗，
亦從此開始知道如何開窗！！嗚呀！！
跟住就話，點解唔早d識得開窗啊！！
開到窗之後，就更加密咁不斷狂影。
係火車落山之際，比我見到呢個咁正既地方。
位於山谷之中，面向湖既一個小鎮，
雖然真係唔知係邊度黎，但係呢個構圖真係好靚。
火車可以建築係山上面，比我望到落黎呢個咁靚既地方，
實在係太幸福啦 ~~ Q口Q！！
火車係山上面行，就咁睇有種幾險既感覺，
但對於瑞士既鐵道，係唔會覺得怕的！
頭先既湖邊小鎮，已由側景，變成前面既景。
然後一路落山，亦都靠得越近。
火車一直打圈、之字形咁落山，
經過唔同大大小小既橋，好寫意既全程4個鐘車程，
估唔到原來可以過得咁快，就黎去到尾聲。
窗外既風景，亦都不知不覺間接近地面。
而溫度既上升，
亦都令到自己意識到海拔不斷咁下降。
好快好快，就已經淨番半個鐘既車程，
亦望到 Tirano 既路牌了。
嗚啊 Q口Q ~~ 原來已經就快要到意大利了。
如果時間許可，其實真係好想去意大利玩番8日，
就算係兩三日都好，雖然唔算好近，但好想兜去 Venice 度逛一逛 ...
不過第二個原因都係重要既，
基於唔想帶全副行裝上火車，會搞到個人唔想郁。
所以我地今次會係Chur來回，
而唔係單程咁去意大利再係第2度返瑞士架。
火車落山後，好快就變左同馬路平排咁行喇。
成個感覺好正。
無幾耐又分開番行。
瑞士既綠、瑞士既藍，加埋瑞士火車既紅，
成個配搭真係極正。 <3
不經不覺又再經過一個湖區。
呢個時候，遙遠見到伯連納列車！！
夏天開始，Bernina Express既班次都幾多下，
所以基本上呢一日，去程、在Tirano、回程 加埋都見到四五架。
呢架Bernina Express係由 Tirano 去St.Moritz / Chur的，
係湖區既時候會好慢好慢好慢好慢咁經過。
大家睇相會見到，我地同迎面而來既 Bernina Express係同一條路軌，
所以呢個時候 Bernina Express係會停左係度，
等我地行分叉路去右邊，之後佢先會繼續向前行。
就係相遇既一刻，相機 Ready！！
到喇到喇！
觀景列車其實又真係幾型既，嗚呀。
彎彎既車窗，可惜你無得開窗，
keke，唔係我都會想坐下。
呢個係二等觀景車廂，同一等既分別除左係座位大細，
仲有就係一等既車窗會更大。
回望剛才經過既 Bernina Express 列車。
佢都開始離開了。
而我地就繼續進發。
又開始貼近地面行。
好似坐電車咁，因為係地面好多平交道，
所以會聽到叮叮叮叮聲，好正啊。
好快又去番山林間穿越。
然後鏡頭一轉。
見到開始接近Brusio站，今次無人係Brusio落車，
由於Brusio係Stop on Request，所以今次係無停站的 ~
Brusio 站，係最近 ：
Brusio Circular Viaduct (Viadotto elicoidale di Brusio) 既一個火車站。
火車一準備經過Brusio，大家集中力都即刻望住右邊既車窗。
已經見到了！！！
好多坐左4個鐘既人 (又或者由St. Moritz出發，坐左2個鐘既人) ，
坐咁耐，主要都係為左呢一刻，坐住火車經過列入世遺既一座橋。
所以個個人既頭、手、相機都Standby晒係車窗外。
呢個就係 Brusio 站。
穿過 Brusio，向住Brusio Circular Viaduct 進發。
望一望後面？ 哈哈。
影完呢張都之後，我部相機就轉左去拍片 mode了。
所以下一張已經係，環繞一圈，穿過左條橋。
超~級~興~奮 !!!！！ XD
可能你會心諗，下，轉個圈姐，唔洗咁誇張下話。
但係我真係好開心呀 XD ~~~~~~~~~~
而且，座橋真係好靚好靚呀。
過左 Brusio之後，亦都代表住車程只係得番大約 20mins，
我地即將到達意大利 Tirano 了。
一陣再見啦，Brusio Circular Viaduct ，
我仲未影夠你呀 XD。
係到達Tirano之前，仲會有一個站，不過上落車既人唔多。
黎到Tirano，就由火車石仔路，到直接變路面電車。
叮叮叮叮聲越黎越多，真係勁有電車feel。
到最後，望到火車站了。
大家都慢慢落車。
而黎到 Tirano ，代表已經到左意大利境內，
所以呢度已經係用歐羅，而唔係用瑞郎了。
於是，帶上應該夠 2 個幾鐘用既 50 歐羅，
我地開始出發意大利 Tirano 之旅 ~
車站有唔同既路牌。
離開瑞士國鐵車站月台。
望到 Bernina Express 既 Poster。
然後離開瑞士國鐵車站。
出車站後，望向右邊，已經係意大利既國鐵車站月台了。
如果想坐去意大利其他城市，可以係呢度上車 ~
當然，我地只係會係 Tirano 市內遊走。
如果想坐去意大利其他城市，可以係呢度上車 ~
當然，我地只係會係 Tirano 市內遊走。
- Day2 Part 1 完 -
沒有留言:
發佈留言