同行朝朝都夜訓過我，但次次朝早起身佢都醒左，
因為佢朝朝都會睇日出、影日出。
咁岩住係羊角島42樓，又對住日出位置，
所以唔可以自私睇，呢日就的左我起身睇日出。
嗚呀，望住個太陽慢慢升起呀。超靚呀！！！！
左邊柳京、右邊日出、中間係河有橋，一眼睇晒，個景好好呀。
由一開始黎個陣，d花未開，到依家d花都開緊了。
之後係地下餐廳食早餐，出面一片粉紅色花樹。
今日一出發，就係去平壤中央動物園，沿途又係好多花樹。
 |
| 又是地鐵站 |
司機兜左戰事博物館/柳京兩次，唔知係行錯路定專登。
另外就係明明有條好近既路可以去中央動物園，
不過佢兜左上北面、再落番南面，
可能未修好、或者有d咩唔想比遊客睇到？
跟住就到左中央動物園門口了，
會見到好多花樹，另外就係大大個老虎開大口，嗯嗯嗯。
呢個係本身行程無話去，但額外咁加上去，
不過唔洗附加費架，呢次旅程好多地方、活動都係咁，所以感覺幾好。
有個園係chicken，有個園係dog。
唔知點解動物園會有，可能呢度比較少？？
同大陸一樣，比錢就有得騎馬同幫你影相既檔。
首先去四腳爬爬館，個設計都幾得意，有得上有得落。
可能呢個館唔受歡迎，出面唔少人，但呢個館得我地。
之後出去睇獅子老虎。。
其實動物園好大，但係無行晒，好快就走了啊。
雖然對動物興趣唔是好大，但未至於行咁少XD
起碼比我見下d稀有生物先啊。。
睇完動物園，上車向西南方行就到左足球學校。
首先又是睇video講下朝鮮足球發展史、贏左d咩、金氏兩父子黎過幾多次之類。
跟住就帶我地去睇人踢足球，睇睇下話，不如落場踢啦？
於是乎就整個朝鮮對香港了。
佢地勁讓我地團d人踢 XDDD
 |
| 隔離團既團友之一 |
(我想留係動物園睇多陣多d..XD)
之後就兜左去未來科學家大街比我地行下。
如果有留意最頭幾日既遊記，係發現其實之前都黎過的，
只不過因為隔離團未黎、而且一陣係度食飯，所以又再行。
不過上次行既係真係一長條街，係位於中間既大街，行一直線，
今次行既係比較尾尾位置，所以行到尾要上天橋U Turn。
可能時間唔岩，成條街無乜人。
反而上一次仲多人，
個陣有人踩下單車、有人係坐係草地邊既凳度hea下、或者等下巴士咁。
U turn之後就去餐廳食飯了。
其實因為都叫做行過，所以呢刻係想快d衝去食飯XDDD
係PIZZA呀。
本身都無乜野，不過今次少有地有人彈琴表演國語歌「月亮代表我的心」。。
跟住又有跳舞表演，有個靚的，帶住兩個普通樣的。
好搞笑，跳完舞唱完歌就返去整pizza，跟住整一陣就再出黎跳舞唱歌。
呢d個個都，入得廚房、上得舞台。。。
另外pizza都係正正常常，唯獨好特別有個係泡菜pizza，
對我黎講太濃味了，都係其他個d好味d。。
雖然我對pizza既興趣都唔算好大。
話說後來問金同志覺得pizza如何，佢話「我不喜歡」。
食飯時導遊望望d人既衣著先，
有個女仔因為著開條衫，要買過件裇衫。
其實我都有件，不過好彩個日唔算熱所以無著，
而著左件有格仔領既休閒服，佢又比我過關！！
同行琴晚同左導遊講自己得牛仔褲，
於是韓導唔知係邊度搵到然後借出西褲一條。
食完就兩點幾三點左右，呢個時候準備出發去錦繡山太陽宮，
但呢個時候，韓導話佢食野整到外套有少少污糟，
但今日要去錦繡山太陽宮，所以要換過件。
至於邊度黎件新既呢？就是，韓導媽媽出場！
全世界追住韓導，想見佢媽媽，於是就係街上演出左狂奔一幕。
由於韓導住平壤，所以好近唔會好耐就可以拎到過黎。
等左等，後來有架私家車定唔記得的士定唔記得係van仔到左，
佢媽媽就跑左入一間建築物度既一塊板後面，韓導跟埋入去拎衫。
跟住成班對住開左門既建築物入面講：
「"amoni, na, yu 谷 sa la hei"(讀音黎，唔識韓文)」
意思係 "媽媽, 我愛你呀"之類。
跟住佢媽媽伸個頭出黎 ，不斷笑住揮手。
韓導話：「no photo plzzzz > <」
出發去了。
花花花花花。
萬壽台個邊既路。
由於係太陽節前後，多左好多人去錦繡山太陽宮，
於是到達既時候係三點半，但要係車入面排隊排到四點半。
係呢個範圍開始，導遊話唔比影相，應該係講緊唔比影出面。
不過佢見到有個團友係車度訓教，佢就好開心咁影左果個團友。
架車隔離有其他團經過，一望，成班學生黎。
跟住再望，咦，咁似香港校服既，再望，哇係英華書院既中學生。
聽佢老師叫學生集合時，應該有中三、中四同中六既學生。
原來都係GLOTRAVEL帶住佢地，佢地先後去左南韓、經瀋陽再入北韓，
應該係遊學團既形式，團費仲貴過我地。
落車之後，去一個類似集合廳既地方，
韓導問同行，你外套入面件衫係點架？
跟住睇睇發現係類似運動衫，於是話 nooo，
然後，金同志唔知邊度又整件裇衫番黎，於是同行又要換了。
嗚呀，跟住裇衫西褲齊晒，行上街可能無人會阻佢行，暢通無阻。
雖然同行面有難色，但韓導話「wow, you looks good」。
同行話：「點解完全岩身既，
連個骨都岩岩係膊頭邊，褲腳又岩岩好，好驚喎XD」
其他團友：「估你唔到，好fit喎」笑死XDDDDDDD
講左咁多野，究竟錦繡山太陽宮係咩黎既呢？點解咁嚴既呢？
有邊d人黎得？邊d人唔黎得？
唔識做地方簡介既整合，直接wiki節錄：(粗斜體字 是自己加的)
「錦繡山太陽宮即金日成與金正日陵墓，是位於朝鮮首都平壤東北郊大城區域的巨大陵墓。是已故朝鮮民主主義人民共和國建國領導人金日成生前辦公地。金日成於1994年去世後，其長子金正日宣布把父親的遺體永久保存在議事堂水晶棺中。接著金正日於2011年去世，其三子金正恩也比照此儀式。
2013年4月1日召開的朝鮮最高人民會議第12屆7次會議通過了《朝鮮民主主義人民共和國社會主義憲法》修正案，其中明確規定「錦繡山太陽宮是領袖永生的大紀念碑，是全體朝鮮民族尊嚴的象徵、永恆的聖地。」並且通過了與之配套的《朝鮮民主主義人民共和國錦繡山太陽宮法》。按照這一法律，朝鮮政府設立了錦繡山太陽宮特別保護區。
每年太陽節[金日成壽辰]和光明星節[金正日壽辰]等節日時,錦繡山太陽宮對外開放讓人民和遊客參觀和參拜。 << 呢樣真係唔知，有d團每次都有呢個行程，所以未必得呢幾日開比人睇？」
就係咁，所以對朝鮮人黎講，係一個神聖既地方。
於是大家都著得好整齊，呢日呢既時候都好多軍人同外地人。
另外，唔知係因為金仔即位之後既改變、
定係係呢度發生過一d事、或者係接近太陽節，
聽同行講六年前同依家既對比，覺得到所有野都嚴左咁。
由落車，要四人一排，到入場、到入到去，都係要排好隊咁入。
概念圖：
經過幾條好慢好慢既超長長長長電梯，最初左邊係窗，窗外面係個廣場，
跟住再入，兩邊都係金氏兩父子生平既相。
條電梯都郁左幾耐下，然後就到左一個衣帽間類既地方，
首先係佢會將你既隨身物品包括紙巾、相機、外套之類收起。
然後你繼續行，就會經過check身既地方，
跟住就要經過一個洗鞋掃鞋既機，繼續入去。
當繼續行行行，會見到一個超大既廳，廳既盡頭係兩父子既彩蠟，
同好似係放煙花既背景？ (唔知有無同其他地方撈亂，太多了)。
向蠟像鞠躬之後，向一個側門行，行行行，經過走廊，再入去另一個門，
就會行到一個細細個門，或者叫通道，向行過既人吹晒風咁，
應該係解吹走你身上既塵之類既門。
雖然講左好多個門，好似好恐怖咁，但其實唔係的。
因為全部都係超大既廳，樓底超高，闊走廊，同埋金光閃閃，似係皇宮咁樣。
好，過左個通道之後，就會見到另一個大門，有塊布遮住的，行入去。
入面都係一個好大既廳，中間係金日成既遺體，
下方寫住生平年份，四邊有圍欄圍住。
要四人一組，係佢左手邊、右手邊同腳底位置鞠躬。
其實黎到呢度，除左係睇佢，感覺更重要係佢既佈局同裝修，
究竟呢度一個最備受尊敬既人，係離開後，佢後代對佢既最豪華待遇係點。
鞠躬後向出口行，又過一個門，然後就係佢得到既獎章、殊榮之類既館。
然後落樓梯，經過差唔多既野，
就到放置金正日遺體既館，再黎就係佢雖獎章館。
其實有時會諗，係咪真身…嗯，不過唔理了。
睇完之後經過番頭先過黎既路，拎番d衫，就走了。
出口係個廣場，廣場好大好大，有花園，雖然無咩睇但可以行下。
係獎章個館，會睇到兩者係外政內政、同當時局勢既少少分別，
例如多d國家會送野、定係獎章係關於咩國、定係國內有關既野之類。
如果無入，又想知多d，好多書都有講錦繡山太陽宮。
行完廣場之後，就上番車，準備出發去元山市。
因為都王六點咁上下，而去元山市要5粒鐘左右，
於是估計到元山市都10點幾11點了。
路途中，元山市係黃線既盡頭，即係面對住東面既日本海。
慢慢行駛中，好似坐緊越野車咁，個人不斷地飛上天，因為條路太多洞。
五個鐘入面，有團友不停比d旅行靚景相、日劇、卡通比朝鮮跟車實習生睇，
佢雖然有興趣睇多d，但問佢想去嗎，佢居然不為所動。
個位團友好似勁想引佢產生出國念頭，但呢位實習生太呆……
另外就係，佢真係太唔鐘意美國同日本。
話說途中講起手機，當然可能係實習生對科技知識麻麻地，
所以以下講既野只係實習生講，不能以偏蓋全。
有人問過第二團既導遊，佢話佢電話plan係$230應該係rmb(?)一個月，
不過實習生就話頭200分鐘free，跟住每1分鐘幾蚊朝鮮幣，
仲有頭20定15個msg係free，跟住過左就一個個比錢咁。
另外實習生可能中文真係太差，因為當佢話自己中文差，
個團友都忍唔住話：「原來你都知道的呀？」
因為問佢張身份證係點，佢話無的。
問佢咁點證實自己身份，佢話。。用學生證 = = ………
但後來尾二個日明明見到導遊入平壤時，
出示左平壤居民證，或者可能係導遊證。。？
不過我點都唔信呢個國家既人係無身份證。。 = =
呢晚10點幾到左，係海邊食平民海鮮，不過d海鮮好搞笑，
尤其貝殼類個d。。大大舊。。
(圖)
之後係食飯時，知道另一團黎元山市途中封路，
因為閱兵儀式要用既坦克、導彈、軍車要入平壤，
所以佢地未行得住，要等軍車過晒先。
於是佢地最後凌晨一點先到元山市。。
不過佢地話好開心、好多野睇，因為d軍車超近距離咁行過。
哈哈，黑夜見到一大批軍車行，又知自己係安全時，成件事都幾型。
不過要凌晨先到元山市。
回想起個條爛路真是……5個鐘車程已極限。
當時諗，聽日要原路返平壤。嗚。。。
真係千祈千祈唔好漏任何行李係元山，要折返真係不如唔要好過 = =。
食完野，傾多陣計就去唔知係東明旅館定係松濤園飯店。
因為行程最初係話我地住後者，但地圖mark我地係東明，
另外就係經過羊角島變左兩日住西山飯店，所以我覺得應該係住緊係東明。
一開始係驚佢同開城民族旅館個類無乜水唔想沖涼，
點知佢水力好夠，仲勁過羊角島。間野係就係舊d，但係都叫做ok。
同埋，有個廳。。
成間房計計埋埋都好大。。
呢個係酒店大堂地球儀。講起呢度成日見到、代表國家既野，
第一名係國旗，第二名係金氏兩父子，
第三名應該就係標住成個朝鮮半島都屬於朝鮮既地圖。
個鎖匙又係好巨型，可能驚人唔見。
好搞笑，有個團友一見到個鎖匙扣，就笑住同佢同房話：
「拿，我keep左咁多日，今次你keep呀」
跟住行開左，然後「哈哈，先小人後君子先。」
因為個鎖匙真係太大舊XD
(圖)
訓了。
- Day 10 完 -
沒有留言:
發佈留言