當然一大早起身，其實要周圍行下先去松花江邊了。
於是乎，就首先再戰琴晚去過既聖索菲亞大教堂。
 |
| 沿途其實都幾(俄？)(歐？)式建築。所以同係南方或者北京、成都、上海既感覺都唔一樣。 |
 |
| 敢唔敢試？XD 雖然我唔食腸，但係界得幾靚。 |
 |
| 見到一男一女帶住隻雞係度行，仲係度諗點解會有……好可愛，但真相係殘酷既。 |
 |
| 佢下面圈左個雀鳥養殖區，可能因為咁，d雀成日圍住個教堂飛飛飛飛飛。 |
 |
| 比左15$rmb入場睇教堂內部。係講哈爾濱既歷史。 好得意佢展出既相根本全部都係俄國人黎，連d食肆、店既名都係俄文， 呢度唔知幾時開始變到全部都係中國人呢。 |
 |
| 頭先個張有隻雞既相，隻雞原來就係咁黎，唔知幾多錢一隻，但好慘喔。 好似話係因為母雞可以生蛋、d肉又嫩d。但公雞就無食用價值唔需要咁多隻， 所以只要孵左隻公雞仔出黎，就會拎去賣或者掉左佢……於是放係呢度既，全部都係公雞仔。 幾錢一隻真係唔知，但就算你覺得佢地好慘，你又可以做到d咩呢。 |
講起，發覺呢度都勁多整容既廣告，
去親大陸邊度都係整容廣告，之前蘇州又大大開咁放係園林隔離，
依家地下街、架空Banner都係整容廣告，
真係超級多……
除此之外，黎到中國東北居然仲見到寫住「澳門特產」既野賣，
以為珠海就sell澳門野、深圳就sell香港野，但到左東北都會見到…
行完聖索菲亞大教堂，就去左附近一個街市既地方，
除左有正常既蔬菜肉類賣之外，就係哈爾濱紅腸。
因為琴晚個餐，唔食腸既我都覺得d腸既味道係唔錯的，於是睇一睇。
但係佢話保存得幾日，仲要係好低溫之下保存，就放棄啦。
不過係度見到一間豆漿店，d豆味超濃，本身買一杯$1.5rmb試試味，
一飲，sorry，買多3杯…飲完，到左第二日要返黎再戰幾杯。
因為真係好飲XD
 |
| d蛋糕開始有番d水準，唔係一堆cream同奇怪既公仔了 |
 |
| 好飲既又好有豆味既豆漿 |
講漏左，係哈爾濱同瀋陽呢幾日，真係要戴番個口罩先出到街……
街上面其實都有人戴口罩，
要知道一個有流感都唔會戴口罩既國家都賣口罩要防霧霾，
就知道呢度既霧霾真係一件幾咁嚴重既事。
行完街市之後，就向番中央大街進發了。
當然係無食早餐同午餐既情況下，買番個$15 + $1蛋既雞肉卷黎醫下肚先。有dd辣。
一路食一路經過中央大街向松花江畔進發了。
去到中央大街盡頭，右手邊會有個獻血站，好正叫做獻血。
跟住就要落隧道過對面馬路，
一上隧道就係防洪勝利紀念塔、斯大林公園、松花江畔了。
松花江係冬天既時候會凍冰，上面會有雪雕、冰雕同埋有人係江上溜冰。
而依家4月，已經算係春天，冰已經融左一大半，所以依家都係睇撞冰。
係江邊都留左一段時間，雖然風有d大，但整體都係好舒服。
不過都係個句，霧霾真係勁到呢。。。
仲有遠處有片白色既冰，但靠岸個舊冰係黑色既……
當然仲有冰既時候，係唔可以渡輪過江既，於是就簡左坐索道。
索道仲有個好處，就係可以高空睇松花江了。
於是一路向左邊行行行，行去城堡個邊坐索道了，
索道唔平，唔係居民、唔係學生既話，
$50rmb單程、$80rmb來回，$90rmb來回連俄羅斯風情小鎮。
咁我地就買左來回票。
 |
| 絕對唔係凍霧，係霧霾！！ |
淡季無乜人，兩個人就可以坐一架纜車，無幾耐就過左對岸了。
索道一落就係景區入口，好方便。
不過其實大陸景區就係咁，索道收了錢$80rmb、到左大景區入口再收$30rmb，
入冰雪藝術館再收$140rmb……真係好貴啊！！！
點解叫淡季呢，因為無室外大冰雕大雪雕，但價錢其實唔係爭好遠。
如果冬天，好似大約$310+rmb就會由酒店車你入到冰雪大世界睇室外冰雕雪雕展。
不過淡季時，冰雕雪雕會搬入一個叫做冰雪藝術館既地方，結果就$140rmb了。
買呢張票既情況都幾有趣，因為淡季真係乜人都無咁濟，所以個館已經好似關埋門，
個入口係封左欄杆，我都呆左呆，推下呢個門、推下果個門，
過左陣有人走出黎問：「有無門票呀？」
我地話：「無呀。」心諗，唔係要係出面唔知邊度買左先掛。
佢話：「出口隔離買左先。」
咁就行到出口附近，有個關左門既窗口，我行近，佢無啦啦打開，勁似玩緊鬼屋。
講起鬼屋，其實成個太陽島係淡季都好鬼屋feel。
首先係乜人都無，工作人員都唔見多個，間唔中可能有一兩個既。
周圍融一半又未融既湖、冰、雪，好似一個荒野、戰後無人既境界咁。
跟住d樹又未生葉，全部都係枯枝，好似經歷左場山火、所有野化為灰燼咁。
之後去既所謂乜乜熊樂園，d公仔又斷腳、d機動遊戲無開、激流無水、
過山車既車卡係地下等等等等。
其實，我真心覺得係唔應該收入場費………XDDDDDDDDDDD
另外，呢度可以踩單車，有一人、二人、三人單車，但一個鐘一架車~$60rmb，
真係……唔好再貴d？XD
 |
| 入場有棉褸，唔洗錢租，著完都幾暖。 |
 |
| 完全無人，包了場，瘋狂玩水泡滑梯。 個職員開館只係serve兩個人，唔知叫寫意定其實佢心諗：你地幾時行完？？我想訓教了。 |
 |
| 其實有d嬲嬲地，冰雕sell既係晶瑩通透，你加色加到實色做咩姐…… |
 |
| 佢有幾條梯既，不過有d放左公仔係上面，所以封左唔比玩 .\_/.，想試唔同既梯rrr。只係試到一條咋！ |
 |
| 雪雕。嗯，感想係，其實呢度真係好中國特色，係既，因為呢度係中國嘛。 其實都係…… 所以當我覺醒之後， 我覺得一定有更加好既雪雕、冰雕地方，而唔一定係哈爾濱。。 |
所以都唔算影左好多相。
出到去之後，飲左杯已經唔熱既薑茶之後，就離開左個館繼續睇太陽島了。
其實館入面既人都幾nice，好似係。
 |
| 上左個好似叫做太陽山既地方，係度會望到遠方既一個滑雪場。 唔知係咪就係叫做亞布力滑雪場？我以為好遠添，定係另一個滑雪場黎？ 除此之外，仲有個播佛教音樂既播音機， 應該係d人自己掛上去的，係個太陽花既裝置。 |
 |
| d標語超正 |
個遊樂場真係好有日本個套動物好友既樂園FEEL，全部都好似荒廢左咁。
荒廢到一個點係覺得「就算旺季都應該唔會開放掛」既感覺。。。
如果有一日冬天黎，而呢度好熱鬧，我應該會呆一呆。
不過未有再黎既意慾，所以個機會應該甚微……
行完太陽島公園差唔多日落，就坐索道回程了。
食完野已經入夜。有時候我覺得入夜既感覺係比日頭好。
係呢度影相，同埋睇人放天燈。但有d賣天燈既人勁煩，唔買又lur人買。
仲要人地唔想理佢，已經行開仲要跟住晒。於是算，走人了，真係太煩。
其實中國少番d跟住番既人，個感覺真係會好d……
回程就係中央大街再兜下兜下，又諗住去哈爾濱火車站度望望，
不過最後無達陣，亦都無搵到食野既地方，
於是係士多買左杯麵、再去麥記買左個餐返酒店食。
聽日，本來係去長春，不過呢一日覺得未行夠，
決定skip長春既偽滿皇宮+偽滿州八大部 (其實基本上對晚清都無咩大興趣…)，
咁聽日玩多半日哈爾濱，就直接係哈爾濱西站坐高鐵落瀋陽啦。
- Day2 完 -
沒有留言:
發佈留言