到依家為止有時都唔係好信自己真係去左朝鮮，
雖然其實如果有做research都知道要去朝鮮其實一d都唔難，
可能係丹東報個四天團，唔洗五千蚊就可以入到平壤玩到經典行程。
只係，我諗我以前真係無諗過自己係會去到呢個地方。
點解會簡左去朝鮮呢？
要回想番，第一次諗去呢個地方既時候，仲係阿里郎仲存在既時間。
應該係打開關鍵旅遊(當時仲未執)網站時見到地圖居然有北韓呢個地方簡，
而團費包埋香港來回機票都只係6千幾未連稅，
只係當時仲係學生、又無打工既我，當然都係無錢走去報了。
結果今年年頭，有朋友話下年佢生日前後想參加北韓既馬拉松，
於是比左個網址我睇，我望望下見到成個行程好似咁吸引，
仲要有埋太陽節，加上撞正埋復活節連假，就r左同行一齊去了。
團費好貴，再加上想飛機走，附加額外行程更加貴，
但係拖下拖下就真係乜都唔會做了，而且真係好吸引，就拍板吧。
然後，呢個團本身係瀋陽集合，瀋陽解散。
諗諗下，既然都到左中國東北，不過順便去埋哈爾濱囉？
既然走既時候改左係飛去北京，咁不如去北京留多晚囉？
於是今次既旅程雛形就出左黎。
要請既假好多，但擁有既假好少。不過都仲係好想去。
結果轉眼就到左入境既朝早，好早，起了身。
落到集合既地方，首次 (其實都唔算，3月11號其實有個簡介會) 一大班人到齊。
就咁樣，一行人一齊行去瀋陽站，坐7:00am高鐵去丹東，
8:22am就到左丹東站，然後拎Visa、出中國境，上火車。
 |
| 離開的一天是永遠的晴天 |
10:00am開車了，慢慢經過鴨綠江，經過鴨綠江斷橋，經過新義州，停係新義州站。
過左鴨綠江，其實等於入左朝鮮國境。新義州站，係搞入境手續既地方。
唔需要落車，只要係列車上面交passport、visa比check一check，
佢太得閒就叫你開下背囊 / gip、scan下你個身咁，唔得閒就唔理你。
感覺比中國更hea，但過境過程比中國更耐。
隔離車卡領隊比左一支萬寶路比軍人，佢就落車食煙無再check行李。
我地車卡都叫做還好，只係抽黎睇，就算要開gip都係立一立，就叫你收埋。
不過有人scan身時，有支HTC水喉，就問佢咩黎，佢話係相機。
相信朝鮮軍人因為唔係好知咩黎，所以問左陣點樣睇相、點樣影之類，
之後拎走左支水喉，拆左張sd卡望望之後，
就係佢張入境紙上寫左幾句，就比番支水喉佢了。
而寫左d咩呢？唔知。不過之後出境有無麻煩左呢？完全係無既。
出境既時候，係要再寫過張出境紙，全新的，咁之前張入境紙係邊呢？唔知了。
張入境紙係hea到除左名之外乜都無寫，所以張入境紙除左名，真係無資料咁濟…
整體黎講，其實軍人感覺都幾友善，笑笑口，
起碼比強國個d講野好大聲、個樣好惡咁既好。
係過境時，火車震左震，
發現原來佢駁左 強國製既朝鮮列車 係我地架 強國製強國列車 之後。
 |
| 朝鮮列車，不過唔等於載既係朝鮮人，因為有d人前一日係新義州旅行既旅行團 |
個導遊之後走入朝鮮車卡，仲要只係我地個車卡隔離。
之後架車行駛時，佢去隔離車卡搵番個導遊，同佢吹水，互相都仲認得大家，太神奇。
果個導遊問佢當年個團其中一個人依家點之類，佢又問番佢呢幾年平壤係點咁。
原來呢六年黎平壤變左好多、變得好快。
然後，導遊手機換了用緊smartphone了、境內旅行社變多了、香港遊客少了，等等等等。
 |
| 洗手既地方，同廁所係分開既 |
 |
| 入平壤做生意既大連人 |
坐係佢隔離都聽佢講唔少關於以前中國既情況，同埋平壤既變化。
不過佢主要都係講大連、瀋陽同丹東人既生活，
東北口音令到我理解到既內容其實都唔算好多。
講番係新義州過境既情程。成個過程用左兩個鐘，所以我地係落左車睇的。
月台上面有人推左個車仔出黎賣下野咁。
人參係1200人仔，之後係開城見係2300人仔，
不過新義州呢個地方同丹東既連繫好緊密，都係走私好地方，
呢度賣既野究竟質素係如何？無人知。
列車由新義州開始出發去平壤，中途唔會再停站。於是我地就繼續睇風景。
坐既係臥鋪列車，隨時都可以訓教，不過初初入到黎朝鮮，根本唔會想訓教。
一日可能只有一兩班往返既列車，
於是係火車經過田園時，附近既人都好好奇，好多都會回頭望火車。
有細路係好開心咁跑到火車前面去望火車上既人，
亦有耕緊田既人停低手上工作去望，
間中仲會有人對住火車揮手。
明明係五個鐘既車程，唔知點解係望望下既時間下就過左了。
 |
| 雖然睇唔明，但應該都係 金氏父子與你們同在 或者 萬歲 個類。 |
沿途會有學校、田野、郡、市、小鎮。
有間學校唔知係咪有sport day類似既野，係一個好大範圍既空地，
有一大堆學生圍埋好似睇緊足球比賽咁。
 |
| 鐵路便當 |
朝鮮真係好乾淨，無垃圾。
仲有一樣野想講既就係，佢地d屋係有太陽能板的，好環保。
有時候真係估佢唔到，香港或者發達地方恃住自己既電好充足，
唔會點諗點慳電。反而呢度，又或者之前去過既緬甸、甚至我鄉下，
都已經會用太陽能板了。
一黎可能係香港除非成個外牆都係太陽能板先會夠每戶用，
二黎係可能覺得日常用電都好足夠，唔需要諗點去慳電。
 |
| 呢個人係度睇住d行李，跟住發覺超多人影佢，佢勁驚，好快就叫d人黎，一齊咩住d野狂跑走。 有時覺得係咁影真係唔係幾好意思，但第一下到平壤又見到一班人上車，好得意好難唔影…… |
對面有架去清津 (朝鮮東北地區) 既列車，d人勁正，真係排2行隊上車。
超級乖同超級有秩序。佢地有秩序既情況之後咁多日都會見到，
有時發覺佢地係比日本人更加更加更加更加更加更加更加守規矩。
 |
| 10:00車，最後18:19到。原來行左8個半鐘了。 |
一落車即刻充滿朝鮮感覺，大街上播住勞動黨標誌既歌。
係呢度就要上旅遊巴，
首先就兜左兜聽日平壤馬拉松既大概路線比我地睇，
雖然對於迷路專家、路痴既我黎講，當時係其實完全唔知佢行緊咩地方，
直到之後個日，真係落地跑先慢慢先發生咩事。
兜完之後，就向今晚住既西山飯店進發。
本身以為第一晚住羊角島既，因為正常黎講係平壤都會住羊角島。
但原來由於聽日係平壤馬拉松，有好多人都黎參加，於是羊角島太FULL，
就住左係上年翻新既西山飯店度。
係朝鮮，酒店分成幾級，好似其他地方會有五、四、三星酒店。
佢呢度係 特級 (最高) 、一級 (次高) 、……
而羊角島係特級酒店，西山係一級酒店。
其實西山飯店內部黎講真係唔錯，唯一、但亦都係酒店應該最需要好既野 佢做得唔好，
就係沖涼！！！ d水！！ 好似！！！ 岩岩換完水缸咁，噴噴噴又啡黃，
本身以為係因為少人用先會咁，但佢每次耐無開水，再開都會係咁……
搞到成日要放一輪水先敢用水，雖然實際上都唔係好想用，
而且開水放水又好似好晒佢地水咁，感覺呢個地區既人唔係成日有水用……
反觀之後住羊角島酒店，個體驗相比起西山飯店，羊角島真係一定超晒班。
三面環山，於是順理成章，我地間房係向山的，嗚。
 |
| 各層平面圖 |
最後拎埋號碼布 就要返房訓了。
 |
| 凍晒呀~~~~~~~~~~~~ |
聽朝就係平壤馬拉松，又一樣要朝早6點集合嗚呀呀呀，當時都夜晚10點幾了。
好眼訓呀！！
= = =
雖然呢一日完左，不過都介紹返。
今次係分別有3種團，分別係長、中、短線，
當中似乎係包括1個短線、1個中線、2個長線團。
我係屬於長線團，而團入面有16個參與者，
同埋1個女領隊[GLOTravel]、2個女導遊(金[漢語]、韓[英語])、1個男司機、
1個仲有1年就畢業既男實習生 (我地叫佢金同志 - "kim tong chi" / 呀同志)。
- Day5 完 -
沒有留言:
發佈留言