係金日成廣場附近落車，
經過之前去過既溜冰館，到左睇軍車巡遊既地方。
坐車個陣我地問導遊，唔係唔可以影軍人架咩？
韓導話：Today is an exception. (今日係例外)
原來影軍人都有分例唔例外既日子 XD
由於本身既地方逆光，所以衝過去馬路對面。
呢個時候仲未有軍車黎，大家都係兩排咁樣企，
間唔中有車經過下，或者有人衝過對面之類。
 | |
| 頭兩粒字係 主體(주체 ju che)，最後四隻字係 永恆太陽(원한태양 won han tae yang) 中間2粒字估唔到 x_X |
仲有好多，不能盡錄。
返到香港之後睇新聞，見到d人係好認真去分析呢次閱兵有咩軍車係新式，
又或者佢地既作用，去推斷佢既實力之類。
所以其實覺得自己唔識睇，係幾晒料的XD
不過對軍事野唔熟既我，好片面咁講，都係感受下個氣氛，
d市民唔知係咪好似我地當年08奧運睇人黎香港傳聖火時個種心情，
定佢地真係好崇拜軍人，
佢地會對住軍人大叫一堆韓文，似係加油、愛你、感謝個類。
睇左陣之後就周圍行下了，除左睇軍車仲想睇下d人。
湊完熱鬧，大約兩個幾鐘之後，大家都無朝鮮人咁長久既熱情，
於是就無繼續睇，轉移左去保齡球館。
而保齡球館其實只係隔離街，所以慢慢行過去就到。
保齡球館一眼望就知，因為佢門口大大個既保齡球樽模型放係館外面既頂部。
雖然有朝鮮人，但感覺遊客多過當地人 XD
買左野飲，再玩左一局保齡，要換鞋上場。
頭三次落坑，之後開始正常。打完保齡就篤波。無乜特別野要講。
係度玩左個幾鐘兩個鐘之後，都唔留係個館太耐了，
就轉去凱旋遊樂場。
凱旋遊樂場，聽個名就知同凱旋門同凱旋地鐵站有關。
無錯，今朝係凱旋門見到果個，就係隔離咋。
一到夜晚，呢度就勁多人，可能體育館又有野睇？
由入面既機動遊戲玩到出面，首先係呢個。
團入面有7個人去玩，包括小金，由於旅行團所以可以打尖…… $35rmb一次
跟住就好似長隆住客有fast pass咁，係出口入去。
因為4人一架，所以有1架會有朝鮮人去玩，
咁岩係個帶住一大班學生既英文教師。
佢落黎個陣對住佢學生大叫：I am still alive！
哈哈XD 如果係大陸應該會guess講佢講緊d機動遊戲無出事
不過係朝鮮 就應該係講佢無嚇破膽XDD
跟住同佢同一架既團友話，佢係朝鮮既英文老師。
佢：shout and release the stress!!
另外仲有，
佢：where are you from?
團友：hong kong！
跟住個老師話，佢去new zealand時，係香港轉機有落地8個鐘架~
聽完有幾樣幾驚訝，第1係，咦？老師去new zealand，
之前聽個實習生講出國旅行好麻煩的，通常出trip先會出國，
而老師去過nz，好想問佢係去旅行定出trip、出國手續麻唔麻煩添。
不過佢落車後想同我地傾計，但傾傾下比人拉番佢番去佢班學生度了。
另外就係，因為係個車入面應該幾震，
小金佢好似整親個頭喔。
之後玩呢個，好似得三個人玩，小金同韓導都有玩喔。$35rmb一次
另外有一班人去左玩碰碰車。
$20rmb一次，但個碰碰車反應遲鈍，搞到成件事好貴啊。
之後就係呢個了，小金同一位台灣團友上左去。
本來跳樓機應該係慢慢上到頂，再落幾下的，
睇之前幾round都係咁。
不過唔知是咪專登，今次是一野飛左上天，再落幾下，
然後再上最頂等，再落落落。
由於咁奇特，於是睇下佢地落黎之後既反應，
台灣團友個樣係「>口<」，而小金係「: )」，
落到黎仲要話：「一點也不怕~~」。
我地就話，唔通佢壓力太大，
所以要學頭先個老師話齋，瘋狂玩黎release stress？
玩完之後就開始黃昏入夜，要走了。
大家又行行行行行，上車，跟住到左餐廳附近，
韓導定唔記得小金問：
「黎緊大同江會有煙花，但未知幾點，不過知道係一個鐘之內，
你地肚唔肚餓呢？如果想睇煙花先既話，我地依家就行過去，
十五分鐘左右路程，但未必一到就有得睇架，可能要等。」
當然，大家都會話唔食飯住，就算肚餓，點都去睇左煙花先喇。
於是就行左十五分鐘左右，到左平壤大劇院前，
即係馬拉松個日mass dance個度。
由於未開始煙花時間，所以我地就影下相。
韓導話驚我地走散，本身話約實一個時間係劇院門口等，
但之後都話不如一齊去個日飲coffee附近既酒店既大堂，
睇住電視直播，見到就黎到煙花匯演就去大同江睇。
不過有兩個女仔已經周圍走，唔知去左邊度，
而我同同行就係劇院門口影下周圍既相同周圍既行人，話唔想入酒店住。
佢地就去左酒店度先，過多十幾分鐘，影完相，
而且佢地個邊應該近大同江邊多d，於是就向酒店大堂進發。
大堂既電視播緊金日成廣場d人跳舞，
如果係羊角度酒店個間房望出去其實應該望到架！
另外就係煙花既場地都係可以係間房望到，
不過當然，羊角島個位係遠好多啦，依家落到地面睇近好多大好多。
跟住有個估計係KITC(朝鮮國際旅行社，即係我地跟緊個間)大粒野，
黎左，跟住同導遊傾計，可能係講大約幾時開始個d，
過多陣，就帶埋我地大隊一齊出去大同江邊，面向主體思想塔既方向。
呢度係片沙地，但唔係沙灘。
佢唔係向海、係江邊，岸既盡頭係直落的，唔係沙灘個種斜斜地落水。
去搵靚位，呢個時間見到橋上面都有一大排人企左係度，
期間有d旅遊巴會經過，佢地都會見到，但應該無特別安排睇煙花，
所以個d旅遊巴上面既人都幾好彩XD 比我地近睇到煙花，雖然唔係睇足全程。
煙花匯演都應該有20分鐘，完場之後大家原路行番番去，
同朝鮮既人一齊行，因為太肚餓，大家都同朝鮮人既離場速度有得揮，
大約15分鐘就到餐廳門口。
朝鮮的蛋糕。
 |
| 未上晒菜既台面。 |
 |
| 日式咖哩？？？居然日式？？？但個醬好潔，食左幾啖就唔想食。 |
於是乎今日大家都傾左比較耐既計先走。
然後同台有個人係度講香港d用語，其中一個係：
跟住坐係附近既人都笑到氣咳。
食完之後，就返羊角島了，由於聽日小金同韓導會帶住我地，
由實習生送佢去車站，所以，今晚就係團友最後一日同小同、韓導相處了。
於是大家都同佢影相，同埋話聽朝會早d起身搵佢影相。
其實原來只係小金帶我地，另外再加一個導遊，咁韓導同實習生就會帶住團友，
不過原來妙香山係要permit的，而另一個預計會新加入我地既導遊拎唔切permit，
於是乎，就由原本既韓導+小金帶我地了。
呢日返羊角島之後，因為唔算太夜，
就係羊角島度周圍行下，但首先返左房放低d野先。
就係上lift時，lift入面有個人問：「你地係香港人？」
我地話：「係呀」
佢話：「聽講美國同北韓係出面擺晒陣喎…」
我地話：「下？？」
佢話：「你地幾時走？我星期二先坐飛機走，諗緊好無早d走……」
我地話：「我地後日朝早(星期一)走呀。」
跟住架lift到左42樓。
佢話：「咁都算快呀，好啦，我上餐廳度收下風先。」
我地話：「好啦，掰掰」
返左房之後，我話：「咩叫擺晒陣啊？」
同行話，前幾日團友都有講起，話朝早起身睇羊角島既電視英文台新聞，
講美國有軍艦向緊朝鮮方面行。
不過因為覺得船黎講應該無行得咁快掛，
於是就嗯，得番一日半姐，無野掛。
然後放好野就上去同落去行下。
上左47樓既旋轉餐廳，
經過7樓既全黑層(for staff既一層，應該係慳電唔開燈，只有少少光)，
落到-1樓，樓底好矮，係娛樂室個類、有篤波個類玩。
有聽到廣東話人話：呢度一定係有咩事時做防空洞啦！
我諗，防空洞應該無咁矮，地鐵做到咁深就應該真係防空洞啦？
係lift度聽到好多廣東話，好多唔同團既人，
有人係丹東、北京定唔記得係大連報$2500人仔既火車四天團，
之前有search過大約係第1同第4日係火車出入，
第2日妙香山既國際友誼展覽館+普賢寺，第3日就平壤市區幾個點咁。
有人係香港報，包埋機票來回香港瀋陽，費用大約皮幾，唔知幾多日。
如果夜晚係羊角島瘋狂留係lift度搭，應該會聽到好多野。
不過其實我個人對於呢個世界所有既lift信心不大，
所以成日搭lift都想拿拿林可以出lift。
行上行落好快就無咩野睇了，
而基本上日日都可以出街行既，就唔玩咩衝出羊角島了。
於是就早d訓，因為聽日又神咁早起身 -_-
- Day 12 Part 2 完 -
沒有留言:
發佈留言