地點：南疆 喀什
住宿：喀什老城國際青年旅舍
落機之後，本身想坐巴士入市區，
但係完全見唔到有公交車站，唯有去坐的士啦。
呢次旅程，所有的士都係唔跳標，直接講價的，
而且少不了就係中途無啦啦上人、又無啦啦落人咁。
新疆既的士同深圳一樣，
有個鐵閘隔開乘客同司機，怕人後面突擊咁。
呢度雖然仲係中國，但溝通使非常之困難，
一係就超重維族口音，講普通話都以為佢講緊維語，
一係就完全唔講普通話，無辦法溝通。
係呢度，我既普通話水平係跌至負。
除左講野，路邊既牌都係維語大塊過中文字咁。
因為之前唔知喀什係點，所以簡左老城區黎住。
落車之後，過對面馬路就到左老城區。
一邊行一邊搵住宿位置，覺得喀什既建築真係好唔內地，
好有自己特色，好似置身左係外國咁，
連呢度既人、衣著打扮都唔覺得係中國，
有時會覺得講英文佢地可能仲會知我地講緊乜多d，
有一剎那見到中文字個刻，
唔小心彈左句「咦乜呢度識中文架？」呢個念頭出黎，
再唔夠一秒先醒起「係喎呢度係中國黎……」
沿途都係呢類既建築物。
好快就搵到「喀什老城國際青年旅舍」，
http://www.yhachina.com/ls.php?id=192
之前係官網訂左二人標準間，於是就去前台checkin。
佢搞左一大輪，都應該有十五至二十分鐘，
又打比大約兩個人問佢地係咪confirm今晚黎住，先同我地講：
「唔好意思，因為無留意到你地係官網落左訂，
所以今晚無標準間比你地，得番單間咋，平d不過無獨立廁所…$90rmb」
如果話係agent網訂，佢留意唔到都算，
當係自己信錯agent所以中伏，
但但但今次直情係官網度落訂，比埋落訂費，都話留意唔到，真係呆左。
成件事太突然，又未出去行過，唔知多唔多地方住，
就算啦，單間就單間啦，於是今晚就係呢度住一晚。
同時我地問，「後日都BOOK左呢度，會唔會有番標準間？」
佢話「我地盡量會比你地優先…」
之後再問「優先即係會有定無？」佢就話「嗯... 有既有既。」
呢度乜都有中國國旗，
係連d街檔仔，每間都要掛住一支。
算啦，咁我地就將d行裝放係房之後，
執番輕便行裝係身，就出去行了。
係呢度行，真係好有中東小鎮既感覺，雖然街上既人好少，
係度諗呢度賣野既人係咪真係維持到生計，
同時覺得：「噢，原來喀什就係咁既樣的。」
因為舊城區都幾大，我地慢慢行。
毛澤東畫像。
佢地真係真心好鐘意的，係咁話多謝佢係咁話令到咁既沙漠，
通水通電又種好多樹、沙漠都可以種田咁，建設咁既城市，話生活好左好多之類。
行行下黎到好似歐洲個d大廣場咁，
有一大塊空礦既地，有d人行下坐下咁。
原來唔經唔覺就黎到艾提尕爾清真寺既門口。
呢度真係超多標語，「聽黨話、感黨恩、跟黨走」之類都唔少，
仲有LED燈、BANNER、大大幅牆畫、乜都齊。
當然景點都唔少得「愛黨、愛國」了。
入到去，佢話要將d大既袋放入佢儲物櫃，
但同行個相機背囊太大放唔入，唯有放係佢地櫃台由佢地睇住。
另外就係，清真寺連老城入場票$45RMB/人，
但其實老城入場基本上無人理你有無買票，
於是亦代表呢個清真寺係要$45/RMB入場了。
有好表現就貼星星個類。
好可憐的泥水鴨……
因為乾了，條渠無乜水，得番泥水……
收支一覽。
簡介。
清真寺唔大，好多兜左個圈就行完。
內堂唔比影相，入去要除鞋。
本身未預今日要入清真寺，而因為岩岩落地又無換長褲，
但佢都照比入……可能因為唔係旺季，而且守得有dd HEA。
離開左清真寺，就繼續行下街。
賣玩具既店仔。
新疆，尤其南疆都好愛玉石、金器，所以就有金器市場。
不過想入去既話，安檢左先。
不過金器無乜興趣，就無入去了。
金器市場外都有d檔仔，都有人係度睇金器的。
至於檔仔上面d文字……唔識睇。
街上的人。
街道上。
中銀的維語。
然後再一直行，行到一個類似夜市既地方，
亦係安檢之後先入得。
佢叫「饢」，大大舊好平，我地會叫佢做「痴烏英既餅」。
香料。
燒串。
 |
| 每串$2rmb。 |
買左兩串羊肉 (好似係)。
幾好味、幾香口。
 |
| 每碗$10rmb -_-？。。 |
仲有兩碗餛飩。
買既時候，係用手語，因為溝通唔到。。
味道一般啦，一碗係肉、一碗係菜，
太厚皮了，而且感覺唔太熟。
留意番，切野既刀係用鐵鍊連住。
(而之後係北疆地區，店主係成把刀交比我地用黎切羊肉食，
無鏈拉住把刀，所以南疆真係嚴好多…)
有d檔已經開始收檔。
雖然天仲係光，但呢個時候其實都下晝八點幾了。
* 當然係北京時間8點幾，雖然全國係統一時差，
但佢地暗地裡係有新疆時間，遲2個鐘的。
所以呢個時候係佢地既6點幾左右。
簡單食完下午茶之後，就向住老城最主要個條巷出發，會經過唔同既巴札。
 |
| 行緊藍色個條路，行到最後會出左老城區，到高台民居。 來源：https://www.google.com/maps/d/viewer?mid=13GsKANJJVolb6JzXEtrP7k3xhYI&ll=39.47227016639439%2C75.98987820000002&z=15 |
一直行，一直諗，喀什呢個地方都好保留到自己風格啊，少有既未同化。
結果好快，一切就改變了。
出左舊城區，就會見到好大座城門。
轉少少彎就到左高台民居，亦係大部份未經改造既、舊時既民居。
佢話改造中(都兩年了)，所以唔比人入去。
一開始唔知佢原來仲有人住。
當你慢慢再睇，會見到d屋係有人出入。
有d蟻窩既感覺。
每個出入口都有個度既住民守住，扮賣野、扮經過咁，
只要你想行入去，佢地就會「不能去，不能去」。
經過橋。
d水。。
喀什大巴札附近，賣花盆的。
之後因為無遠見到摩天輪，就行過去。
去到之後都日已落了。
呢度係摩天輪既入口，呢日無搭到。
好快就離開左，之後諗住沿住條路去隔離個東湖公園行下。
好靚色既棉花糖，真係只此呢度見過，好識配色呢。
之後到東湖公園，入去個公園，又要安檢了。
安檢完，一望，心諗：我去左邊度？
真心，哪兒來的喀什？
今日全日睇喀什就係個無乜水既地方，做乜有音樂噴泉？
d歌係新疆愛祖國個類既歌。
由本身今日好乾燥既感覺，黎到呢度覺得去左華東個邊。
完全無左沙漠城市既感覺。
一路行一路心諗，呢度邊度黎？做乜爭咁遠。
好，但即係咁，即使我今日行大部份都係老城區，
但起碼機場出大馬路個d位都叫係老城區外，明明d建築都唔係咁。
所以呢一幕，比我既衝擊係幾大。
而同時係呢一刻我亦相信，老城區外係另一番天空，
呢度見到既人，都同下晝見到既人唔同。
老城區大大大部份都係維族人既面孔，
而老城區外既面孔係中國人既面孔。
於是係回程既路上，就開始尋覓後日同大後日既住宿地方。
終於搵到新疆天緣國際酒店(喀什)，$260rmb/晚
https://goo.gl/zGGJkx
有埋第二朝既自助早餐。
然後就返返老城既青旅，展開一場惡夢。
由於無圖，簡單d講一講喀什老城青旅。
1. 有兩層，每層2間浴室各1格連廁所，另有2間廁所。
2. 每層有多於4-6間房，每間房都有6-8個床位。
3. 第二層浴室，一間浴室水溫過熱但調較唔到，另一間個花灑頭甩左。
於是，完全唔覺得沖完涼係乾淨左，
亦好想快d到第二日，上高原，同時又可以轉第二間黎住。
- Day1 完 -
沒有留言:
發佈留言