地點：南疆 帕米爾高原
住宿：天緣國際大酒店
朝早起身，就去食個自助早餐先。
簡單咁食完之後，就返返上車。
之後就再去入油，然後就去附近，超近既金草灘。
沿途遇到時小朋友，本身怕醜，之後比粒糖佢就過黎傾計影相了XD。
其實一直覺得第一日既行程已經去左我本身想去既地方，
但估唔到原來金草灘、石頭城都幾有驚喜。
冰山前就係石頭城，石頭城前就係金草灘。個佈局幾靚。
金草灘，顧名思義，金色既草。個灘好廣闊。
唔洗門票。
好清既水。
平靜既水，可以見到倒影。
好得閒既牛牛。
木吊橋，後面係石頭城+冰山。
金草灘既金草。
之後上石頭城，望落成個金草灘。
石頭城入面其實無乜特別，門票$60rmb，係下面望上去仲靚。
不過石頭城上面就係睇金草灘，金草灘上就係睇石頭城。
同行表示：你話我知係緬甸我都信。
的確幾似係小山上面個POGODA望落inle lake咁。(呢個位：https://goo.gl/eDvpPD)
睇完之後，就離開塔縣了。
有趣既係，呢次限速唔用警車擋住，
而係計你由「塔縣」開始，到「奧依塔克鎮」有195KM，
如果以時速60km去行，大約5pm就到。
「如果你早過5:00pm到，代表你超速。」
幾好唔錯，大家都唔急住返到去奧依塔克鎮，
於是師傅繼續飛車，係塔合曼濕地放低我地去玩。
其實就係個觀景台上面睇。
高原既冰山草原咁，有條長長彎彎河流，幾靚喔。
唔知算唔算係小型既巴音布魯克大草原呢？應該都有段距離吧。
之後經過冰川之父，即係慕士塔格峰既冰山冰川，
亦都即係我地本身諗住去徒步，結果考察隊黎左所以封左既冰川公園。
好大座冰川就係眼前，好可惜無得再深入落去，企係冰川下，掂下舊冰。
由於冰川水溶緊，所以呢度超凍。
而且因為呢日準備落山，所以已經換左薄既衫了。。
但親眼望到，真係好近，幾壯觀。
呢個係近幾年先整既門，以前係無門口，d人直接就入去了。
落山，又係一大堆之字型既路。
每次行之字型路都覺得好開心，因為代表住你將會睇到山腳下面既大景。
一路落山，個感覺好自由同遼闊。
落山沿途，右手邊就係頭先既冰川了，之後無耐就黎到接近卡湖既地方。
師傅係住呢度，佢要去搵老婆拎野，於是就兜左入去小路。
同時放低我地係路邊，比我地係另一個角度睇卡湖、同埋牛、羊、駱駝、馬群。
高原地方，同時呢個位又唔太曬，又有風，好舒服呢。
圖入面遠謝有條藍色既就係卡湖，近睇好大，遠睇幾乎唔覺有XD。
再經過番白沙山、白沙湖。
一直走。
回程個天好好多，令到紅山個景正左好多，
到今日係紅山，先覺得周圍都係大冰山圍住既感覺。
對比琴日既紅山，簡直係超大分別，
好好彩呢一日天氣唔錯，
否則我就以為紅山係一個帕米爾高原內不太值一提既地方了。。
唔知係咪叫有少少甘肅張掖丹霞山既少少感覺呢？
當然應該無個邊既七彩丹霞咁多色、咁多層了。
天氣好既時候，紅山都唔錯呢。
終於返返去每隔幾步就一個報警點既喀什了，當然入黎又係要安檢。
安檢多到數唔晒，入超市、入市集、入食街都要安檢，所以唔多講了。
不過呢度既建築又變番新城區既感覺，
其實都幾好呢，一個地方有住得舒服既新城、加埋有歷史感既舊城。
可惜香港乜都重建，應該好快無晒「舊城區」了。
checkin天緣，拎早餐券，之後返房，真係覺得好似去左天堂咁。
唔係因為佢超過五星級酒店，
而係之前個兩日太太太太太太太太差了，
呢度真係好大對比。
呢度會住兩晚，有點感動，
過左呢兩晚，就係去北疆，應該都係無得點沖涼！！
返到酒店都差唔多入黑，就出門去覓食。
逛左一陣之後，就去到呢間。
叫左兩樣，係 過油肉拉麵 同埋 大盤雞 (細)。
好好味啊個拉麵係即時拉好黎，好好咬而且本身都有d味。
加埋d汁一起撈 ~_~ 好正。
其實有少少香港小菜感覺，但食得好開心。
可能係因為住得好左，食物又好味，
所以食都有胃口同開心d。XD
見到又好肚餓了。埋單$80rmb。
好滿足過左呢日之後，聽日繼續喀什遊！
- Day3 完 -
沒有留言:
發佈留言