地點：敦煌 莫高窟、沙州夜市
住宿：嘉峪關牧馬人旅館
呢日既相唔會睇到d乜，因為數字中心動畫唔可以影、
另外莫高窟洞窟好暗加上唔比影相，好乖咁無偷拍XD
今朝一大早，係6:20am起身啊啊啊啊啊啊啊啊。
點解預訂時，會簡左8:00am既莫高窟門票架架架架架架 ~
好早起身，放行李係葛老大客棧之後，
就去主路個邊截的士了，好多的士，唔怕無。
講起點解簡最早場8:00am莫高窟。
咁又其實有原因既，因為早d去少d人！(雖然係事實，但唔係我既原意)
另外仲有個原因，不過個原因到出發前改動後就變左唔係原因了。
就咁的，本來對於絲路段應該去邊個地方，係有唔同諗法同路線既。
***
因為上年2016年9月尾，西寧 往 茶卡既 Y961/2次仲有開，
(呢程火車，只會旺季先開，大約6-9月頭)
即係可以一日來回茶卡鹽湖。
於是就諗住行程係：甘肅 敦煌 + 西寧 茶卡鹽湖
但如果想去西寧，就係22號 莫高窟呢一日，
12點半前離開莫高窟返去市區、3點幾 係柳園坐尾班高鐵去西寧市，
然後23號一早出發坐火車去茶卡。
咁樣plan其實感覺上有d趕，
一直唔想行莫高窟時凝住要快d睇完咁，想慢慢hea睇，
所以諗住今次唔去茶卡了。
***
最後，到出發前幾日，就決定左9成9會改左做 去嘉峪關，
首先就係嘉峪關本身都有好歷史感重既野睇，
二來就係佢近敦煌，如果第日想玩番未去既地方，
唔洗兜多次嘉峪關呢個比較遠既位，只需要最遠去到張掖就得，
咁日後可以玩短TRIP。
甘肅敦煌 + 甘肅嘉峪關，就係出發前定左落黎，
再望望交通，因為兩三年前睇過，記得敦煌有夜車開去蘭州，
就望望去嘉峪關停既話係幾點。
一Check，簡直係Perfect，夜晚6點幾7點左右敦煌走，11點幾到嘉峪關站，
而敦煌站、嘉峪關站同市區都係超近。
甚至比起如果想坐高鐵去嘉峪關，
就要坐番個2粒鐘班車出柳園南站，再由柳園南站坐2粒鐘去嘉峪關南站，
再轉番入市區，仲多時間，又兜路。
(未計班車接駁高鐵會 錯過班次 / 接駁唔到，走左尾班高鐵之類 )
^ ^~~~~所以火車係好順路、又慳錢、慳時間。
結果就拍板了！
至於點解唔改簽個張莫高窟呢，一黎個陣已經差唔多出發，
每次登入預約網都要sd SMS電話驗證，
而個號碼唔係手，所以廢時叫人幫手改了。
二黎，出發前先改，基本上d門票都比人搶晒，所以都廢事去睇了。
(總結係：呢個人太懶，好似係)
而後來發覺天意都叫我今次唔好去茶卡鹽湖，
因為返到香港再check番今年Y961/2次係9月10號已經停駛左，
即係就算我想去都無專線火車去。
好，廢話(?)講完，轉眼就由的士，坐坐下，黎到莫高窟數字中心了。
無錯了，一開始要係數字中心拎飛、睇片，先可以坐佢景區區間車入莫高窟，
唔係直接去莫高窟架。
另外就係，佢一路播住：「免費寄存行李、免費寄存行李、免費寄存行李」
我地心諗：呢度隔離就係敦煌火車站…
本身唔知係免費、甚至唔知有得寄存行李，
如果知既話，應該寄存行李係呢度，咁一陣就唔洗返返去XD
睇到黃昏，直接去火車站XD
不過睇全日壁畫，會消化不良，應該會眼訓死。
所以當然唔會咁做。
呢幾日既餘票數量，173張好似係2日後既餘票。
雖然係8:00am，但今日係已經無晒飛賣既，
除左係因為無得買即日票 (排我前面果個想買即日，被彈回頭)之外，仲係因為賣晒飛了。
所以如果想即場買，就。。淡季可能有走盞位既。。
預訂左門票，可以係門口取票處排隊拎飛，8點好少人，兩三個排，好快就拎到。
入場了，影得好暗，SORRR。。
因為係買全票，所以拎完飛，未去莫高窟住，要去左呢個數字展示中心睇兩場影片先。
入左去之後，唔洗理張飛寫去邊個影院，佢會寫你既影院編號，但唔岩的。。
因為太早，佢只開左1院，2院無開，所以我地票寫2院，一問之下叫我地入1院。
無留意開莫高窟景區既人，可能心諗：請問你做乜去左戲院 ?_?
因為全票既人，去睇莫高窟之前，要睇左兩段敦煌有關之片先。
同埋，以佢路線黎睇，好似無得你簡唔睇，除非你係買應急票。。
對於應急票，我幾個月上網search過好多，但因為用唔著，所以唔知佢實際操作，
只係 ：
1. 唔洗去數字中心，到左數字中心門口，直接有架車車你去莫高窟。
(呢樣無乜所謂，因為戲院雖然可以了解佢多d，但好多人一場黎到都係想睇洞窟姐)
2. 個日人唔夠多時唔賣飛，甚至旺季7-8月，有時只會隔日先賣飛，無得預訂，請撞彩。
3. 應急票無朝早時間，好似最早係下晝3點打後。
4. 只有4個洞窟 (96、98、100、148) 可以睇， 而如果係 全票 可以參觀 8+ 個。
好處係平一半，同埋真係比你應急啦。
超詳細介紹莫高窟攻略 (我都係今日寫遊記先見到XDDD)，
原來每年9月20-21都文博會，隨時唔開，
而今年就係9月20號唔開，我地9月22號黎算唔算太好彩了.......... ：
入到第1個影院，係平時大學lecture個d感覺。
睇完幾有電影感既莫高窟起源之後，就去下一個影院。
呢個影院比較特別，有d香港太空館既感覺。
佢叫做「球幕戲院」，即係佢個畫面就係頂頂既大半圓，
於是你由頭望向後面，都係比個影像包圍。
至於點解要咁樣呢，本身佢未開始播，我以為轉場係多餘的，
但一播，原來佢係將個洞窟3D化左再解說一d特別要留意既部份，
而球幕既原因，係佢可以覆蓋大部份你眼望到既範圍，
從而令到你好似immerse左係個洞窟入面咁。
不過播之前，當然會話如有不適請閉上眼/尋求協助之類，
因為3D野，好易頭暈XD
播完之後，就係出口直接上區間車去莫高窟。
大約15分鐘車程，原本經過沙，之後開始見到山，再經過一堆無名既洞窟山，
就到了莫高窟既景區。
一落車，唔會有人帶住，你可以自己行，當然就影左張地圖先。
同埋，最早個批既好處係，
呢個時候成個景區只有BOOK左最早8點場既150個遊客。
呢個時候向莫高窟進發，就係最少人了:P
(雖然後來發現其實10點前都唔太多人，應該中午打後先多人了。)
見到九層塔呢一刻係超開心，真係無諗過終於都黎到。
諗起三年前香港一個敦煌展，真係好正，
睇左成個下晝、聽左好多介紹，又走左去個往洞窟睇。
個展最深刻個幾個位既布置仲好有印象。
當時一直都想去敦煌既我，係個一刻更加更加覺得要去。
仲記得個次展覽，去到睇九層塔個張相時，一個阿爸同佢好細個既女講：
「九層塔入面，有個好大既佛架，幾層樓高，遲d叫阿媽帶你去睇啦」
我個陣心諗：「我都好想去睇啊……」
之後都諗左好多會經敦煌既線，例如甘肅青海大環線之類。
係咁望d火車/高鐵有無方法可以玩到快閃遊、
當UO開蘭州就更加興奮好想買飛。
到後來發現變埋黑歷史咁濟，好想去、好想去都講左幾百次，
望住好多人一個個都去左，而自己仲未出發，真係有點灰心。
去到今日，終於終於去到了，真係，嗯，太唔識形容了。
「莫高窟」呢個名，原本其實係「漠高窟」，即係沙漠高處洞窟既意思，
後來講講下，就變左依家既「莫高窟」了。
莫高窟點解會被認為係超級重要既古蹟呢？
因為莫高窟住於沙漠超乾地方，壁畫既色好少比濕氣之類影響，
所以佢保存得好好。
同時佢經歷左好多好多既朝代演變，亦處於古代比較邊疆位置，
佢可以表現到好多唔同朝代、位處於邊疆既人點樣生活、有咩人黎過交流、
絲路一帶既故事、當時既經變畫、當地人們既渴望。
亦表現左好多當時既生活上既用具、
佢地既交通、服飾、頭飾、音樂、藝術、用色、畫風、之類。
甚至係觀星既星圖、古代既機器工具，都會係壁畫度發現到。
所以係好有考古價值的。
如果有睇佢壁畫，除左有地圖、有表演，仲有係介紹頭飾，好似參考書咁，
睇壁畫就好似睇緊一本海量既百科全書咁，講解當年呢度既一點一滴。
如果問我，個感覺係來自覺得佢好宏偉定係乜，
我諗比較大係源自於自己想去太耐，
而經過左好漫長既路程，終於去到個種感覺。
黎呢度真係要專登兜過黎，如果問我會唔會再黎多次？
嗯，係無更方便既交通時，應該就唔會了。
不過，對敦煌有興趣既人，真係點都要黎一次的！！
首先排隊，等入去欄杆入面既範圍。
排隊時，會check飛睇你係咪「全票」，之後就會有人派耳機。
大約10幾個人一組，會跟一個導賞員行，佢會隨機開8個洞窟，
你就跟住佢入去聽、講解，之後佢就會關門，去一下個洞窟開鎖。
完左8個洞窟，佢就會收起耳機，你就可以自由活動。
包括潛入下一批既人度聽講解。所以全票係唔止可以去8個洞窟的，
你一見你無去既洞窟開左門，你就可以入去聽講解。
同時亦代表你越遲入場，你個組就會多左一d唔係你個組既人混入黎睇。
第一個入既係94號洞窟。
呢個洞窟對我黎講印象唔係好深，
因為好多洞窟都係以佛、菩薩、弟子為主，
所以可以叫做係典型既洞窟佈局。
唯一最深印象既係，佢有講過洞窟壁其實唔止一層。
原因係莫高窟經歷左好長時間，
由前秦開始、經歷魏晉南北、隋唐等等。
由於各個朝代既藝術造詣、同埋對色彩既感覺都係唔同，
所以好多新一朝代既人，會抹去上一代既畫重畫，
抹去既其中一個方法，係加一層厚厚既泥覆蓋上去，再畫。
另外就係，當開發洞窟數過多，唔夠位再開發，
古人都會覆蓋以前既畫，再畫。
然後，現代人發現莫高窟時，見到有d最外層部份剝削，
令內層既壁畫重現，就發現左原來係有多於一層壁畫既情況。
莫高窟過去經歷左咁多朝代，
有d洞窟係唔止兩層，甚至出現三層、四層壁畫。
之後就黎到九層塔下，佢係96號洞窟，
九層塔應該每個組既人都會入，所以佢幾乎都長開咁濟。
呢個唔係就咁入，睇完就完左。
呢個洞窟之所以咁出名，
到每個朝代都幫佢一層層加個遮檐，
因為佢入面既超巨型佛像。
當你入到去，會見到佛像既兩隻腳邊，
分別有一個洞，一個係入口，一個係出口。
直到今年都有既傳統係：
每年既農曆4月8號，即係佛誕，
莫高窟96號洞窟會免費開放比敦煌既居民，
敦煌附近一帶既佛教徒都會聚集係呢度，
由一個洞入、兜一個圈、再係另一個洞口出番黎，
係一種禮佛既儀式。
而咁岩係呢日黎既旅客，同時都可以同樣咁做。
(其他日子，就算你幾想入腳邊個洞繞一個圈都係唔比入)
另外就係，如果你有留意莫高窟既洞窟開鑿方法，
會知道有一種係「洞窟入面既佛像，係直接係開鑿時雕刻出黎的」
咁係咩意思呢？即係有時d洞窟入面既雕像，
係首先雕好左個像，先搬入去洞入面。
而呢個洞窟既佛像，佢係係開鑿時，先挑空洞窟既內形，
同時保留中間既山體部份，然後再係洞入面慢慢雕。
原因係咩呢？主要係因為個佛像太大，
係無可能雕好先搬入去，所以就保留山體係入面慢慢雕刻。
出番黎了，去下一個洞窟。
佢呢度因為要保存，所以洞窟門口整到好工整，
如果你有去過其他地方既洞窟，會發覺呢度外面好「人工」咁，
咁都係為左保護入面既壁畫，唔好比日照、風沙之類影響太嚴重。
所以每個洞窟都會有門、同埋有上鎖。
呢個都係重要既洞窟，見到個傘擔就知道了，
呢個洞窟一直都係關閉的，聽講下年會開放。
繼續行，呢個時候真係乜人都無，唔嘈、又好寬闊，好爽 XD
下一個參觀既洞窟係 148號。
呢個又係超經典既洞窟，係涅槃佛，亦稱為臥佛。
佛教入面，涅槃唔係指死亡，而係脫離左生同死，脫離左輪迴。
係涅槃佛既身後，有好多唔同既雕像，
值得留意既係佢既一班弟子，每位弟子既表情都唔一樣。
有d係笑、有d係喊、有d係無表情。
佢既既表情代表住左佢地明唔明白佛既離開唔係死亡，而係涅槃。
你問我係呢個 176 177 178洞窟 見到既野係乜，我既印象唔係好深。
不過記憶中，個陣見到有個係全個壁畫都係佈滿小小既佛像，唔記得係咪呢個，
佢頭邊既金光，係用真金黎做，以前未有保護時，好多人會走過黎唔同既洞窟挖金，
結果搞到d金光上面既金無晒。
洞窟壁畫保留到佛像有金邊既洞窟好少，
當你用電筒側照呢d壁畫，你會發現即使你太暗睇唔清壁畫上面既其他礦物顏色，
圓形既佛光金邊一定一定一定係超明顯見到的。
之後就繼續睇。
第202窟。
呢度畫既係《彌勒經變》，好多洞窟都有畫彌勒經，
至於點解，係因為佢所講既係一個只有開心、無痛苦既世界。
點解係一個完美、大家都好嚮往既世界呢？
因為聽落你會知道其實係好多不勞而獲既野黎，例如：
- 每次你想要咩衫，佢就會係樹上出現，冬天出棉褸、夏天出短袖衫。
亦都有d係和平、太平盛世既特徵，例如：
- 因為唔會有賊，所以大家既屋企門都會唔關。
呢d都係當時既人，好想達到既事黎。
莫高窟即使係亂世中，佛教徒都無放棄咁一路畫畫畫，
所以希望呢個世界可以和平，都係佢地一個重要既題材。
而《彌勒經》本來就係講一個開心、富足、和平既世界。
另外，見過反彈琵琶，但唔記得係邊個洞窟。好似係呢個？
之後就係第244窟。
呢個洞窟最特別就係佢壁畫上面既「飛天」係咁多洞窟入面最大的，
雖然都比自己想像中既「最大」細。
第259窟
入面有一個像，被稱為咁多座像入面，手工最精巧的。
呢個係要係現場睇先發覺特別的，
燈光、陰影可以令到一個佛像既笑容改變。
係幾特別既一個像。
但佢地唔鐘意比人覺得似蒙羅麗莎的微笑，
因為個雕像既歷史係千幾年前了。
QUOTE 節錄:
「259洞窟里最奇妙的要屬一尊禪定佛像。……塑像大多都有殘損，唯有這尊禪定像保存完好。初看這尊佛像並無特別之處，……講解員將冷光手電分成不同檔來調節，便看到佛像嘴角的笑容在陰影的作用下愈來愈綻放。仿佛感受到一個禪修者坐禪達到一定境界時，內心逐漸生出的一種喜悅感受。」
( 原文網址：https://read01.com/Ey7EPM.html)
八個洞窟睇完了。(上面得7個，要搵搵爭邊個..)
當睇到好多睇到既洞窟時，都好開心。
但唯一記憶中有張五台山圖，係唔見的。
於是我就google邊個洞窟係 五台山圖 ，
然後發現係61窟，於是就去睇下有無開。
然後發現佢開左！！仲要之後先知，我係咁岩得咁橋！！
之後佢已經關左了~~~所以去到真係好開心。
五台山圖係咩黎既呢？除左五台山圖，呢個洞窟仲有d乜呢？
第61窟
五台山位於山西，係中國佛教四大佛教名山之一，
而敦煌既壁畫出現五台山圖，代表住山西五台山個邊既地圖傳到敦煌。
呢張地圖講述左五台山同埋佢附近既通道、建築，
係呢度可以睇到當時既建築風格、以及當時既道路。
除左佢最後面既五台山圖，仲有主室上，
好似圖鑑咁畫左當時既婦人各種頭飾，好仔細，同時d色彩保留得唔錯。
另外仲有好特別係近通道門口既兩邊壁畫，
上面有黃道十二宮，即係接近依家既12星座。
聽到當時有人話「有12星座？都唔知係咪呢排d人畫既」
我有d傷心啊 ~_~ 。。
呢個第61洞窟係我既最喜歡洞窟之一。
當年王圓錄係由16窟見到甬道通往17窟，所以發現藏經洞。
當時唔知藏經洞係17窟，如果個陣已經知，一定一定會去埋，睇下個甬道。。
勁想睇，早知做d功課！… : P
另外，其實莫高窟仲有特窟可以去，
不過勁貴，入一個特窟$150rmb或者$200rmb，
所以都係睇正常開放既洞窟夠了。
如果對特窟有興趣，可以簡定去邊個先。
有d睇圖話係可以係洞入面爬去另一個洞的，好正有梯上。
介紹洞窟。
係度上上落落。
行到最邊邊，逛下逛下。
出番去欄杆出面，依家都只係11點幾12點。
於是係景區再周圍行下。
行左去博物館。
望望王圓錄塔。
其實雖然係佢發現藏經洞，但亦都係佢破壞左d洞窟壁畫，
唔太明點解整左個塔比佢呢。
之後出返景區、返到去數字中心。
然後望到架綠色巴士，即係返市區既公交車，$2咋~~。
上車，滿左先開車，等左兩三個字XD 不過我地大把時間等。
返到市區了。
個車就係呢個位附近上落車。
佢會經過既站。
想食野，所以行下沙洲市場先，因為係夜市，所以下晝唔算太旺。
另一個名就叫做敦煌夜市啦。
行左個圈，無係入面搵野食。
講起，呢個物價當然比琴晚高，不過每種食物都只係貴$3-4蚊左右。
去左間大d既店，入去，叫左個涼皮。
試埋個呢度周圍都有既杏皮水，味道就…嗯，酸甜酸甜咁啦。
仲有叫左支唔知乜天涯，點知原來酒黎，無乜點飲因為好難飲XD
仲有再叫每人一個驢肉黃麵，試下同琴日有咩分別。
食完，就走番出黎，又經過呢度。
之後行左陣，無乜野做，買下水咁，又等人滿發車既車，$2返月牙泉村。
望下個旅遊地圖。
又再望望個鳴沙山。
之後就返葛老大客棧，同老闆娘係個客廳睇戲。
套戲叫「滿秋」，
睇個集就講個老公出左城做野，結果識左個女人，起左另一頭家，
跟住個老婆同個仔 + 佢老公個細路出城搵佢既故事。-_-
夠鐘時就拎番d行裝，走了。
慢慢行過去。
第一次見咁多人，排到咁長。
首先去買飛。
去嘉峪關。
睇黎好多人去張掖，我話去嘉峪關時，佢問多我一次嘉峪關定張掖。
見到有車去天水，勁想去，希望第日有機會去啦。
個度有麥積山石窟，雖然都係石窟，但係佢個佈局唔同的。
呢個站幾得意，有d敦煌雕像。
有車了，上去。
檢票。
我地呢架車如果坐到終點站，係會第二朝到蘭州站。
不過我地就坐4個幾鐘，去嘉峪關站落。
有兩架車時間好接近，唔好上錯喔。
睇清楚個站名先上車。
嗚呀！！係敦煌列車哦！！
d座位係餐車feel既。
唔多人坐，大家都周圍走位。
日落了。係地平線日落。好難得咁睇左次，(同時也眼盲了)
真係人生有幾可見到完全無山、同時天氣好可以睇日落既地方。
海平線就多、地平線真係少。
座位。
係車上面，好多人都訓左教，
個陣望望黎緊會住既地方，寫住「中賓」、「不接外賓」，
幾驚唔住得，但d comments明明係來自唔同國家既人。。
搞到唔知搵唔搵過間好，搵過間又要cancel呢間，但我又無電話cancel。
夜晚十一點幾，到了。
落車，$15/2人入市區，同其他人一齊拼。
個陣唔知點解覺得貴，可能以為好近可以行到過去，
但依家諗番其實已經係正常價。
司機問我地聽日去邊，話聽日可以包佢車$160玩一日嘉峪關。
我地話：嗯，諗諗先，太眼訓聽日先算。
之後，就交換左wechat，佢就繼續載其他人，
我地就checkin了。
checkin成功，開心。
今晚可以訓到自然醒！
- Day14完 -
沒有留言:
發佈留言