地點：北疆 阿勒泰地區 —— (輕裝徒步) 賈登峪 往 半路客棧
住宿：半路客棧
到左布爾津客運站大約9點幾10點，
之後就諗辦法點去賈登峪，同時一落車，
就有人問去喀納斯定禾木。
呢個時候，禾木仲係好綠，有諗過好無去完喀納斯先再去禾木。
不過諗諗下，我地徒步既話，應該仲有兩日時間等佢轉色，
於是就跟番原本既諗法，由賈登峪徒步兩日去禾木。
呢個班車一日兩班，就係兩架烏市黎既車到左之後，直接駁佢去景區既兩班車。
回程喀納斯都係兩班，早上10:00am同下午4:00pm。
( * 走個日，問喀納斯景區旅客中心話
Confirm左3次所以唔係聽錯，但就搞到回程中伏MISS車-_-
因為事實上係10:00am有車，唔係12:00nn。
不過如果知係早上10:00am有車，景區內9:30am先賣區間車票，車程40m - 1hr，
無預售，所以都出唔到景區..... )
去喀納斯班車 $35/人。
去禾木班車，$60/人。
車程都係大約3個鐘。
依家係布爾津縣，
去賈登峪/禾木都會經沖乎爾鎮同喀納斯機場(不停站)。
將行李放上車之後，就去售票廳買定回程既車票。
其實呢日未知幾時回程，但怕如果留七日，返到黎無飛，
所以就買定左第七日既飛，如果真係早左返就退票改簽，收10%即係$20/人。
呢日睇塊板，回程得一班車，而且得番13張飛 (只有3張下舖)，
但司機話：不用那麼早買，票多得很，不過唔博了。
因為如果返唔到，回程之後個日就去唔到敦煌，
咁果兩張一定要預訂、否則唔可以入場 、於是8月尾就訂左既$400rmb門票就會無左。
(而後來回程係發現有2班回程，同時20:00出發，所以真係多位的。)
買好左之後，再係客運站便利店買左幾支水，然後上車。
開車了，因為好多人話北疆北部既沿途已經係好靚，
於是都幾期待，不過頭一個鐘車程其實我都有發呆：說好的好風景呢。
車上面有個大叔，有同我地傾下計，
佢話佢細佬係廣東做野，所以佢都知少少廣東話，
跟住講笑話時又加插下d廣東話咁。
之後係休息站有人賣哈密瓜，佢就買左黎食，
其實都幾大盒，不過我對哈密瓜一般所以無興趣買。
架東開始上山，景觀開始好d，但對住石山都是唔太大感覺。
大叔不停話好靚好靚，而我就諗，唔會呢d就係沿途絕美風景架可。。
雖然係OK但未去到話靚咁。
大叔話佢黎左3次，但對住石山話好美好美好美，
搞到我對北疆北部既"絕美"風景有點擔心。
上山之後接近沖乎爾鎮，望到d樓只係少少少少少少少少變黃，
心諗：雖然好多植物，幾靚，但是奶野了，好綠。
沖乎爾鎮，好多扮歐洲小鎮既建築。
係呢度既休息站落車，望望d水，由$1.3 - $2 一支既水，變成$5一支。
繼續行。
繼續上山。
心諗：上山就好，海拔高d，應該會黃d掛。
同時，之字型既路我真係幾鐘意，因為睇景係會廣闊好多好多。
上到去，開始見到好多馬、牛、羊。
呢度幾開心，因為佢無帕米爾高原個種：沿途開發中，於是好多爛地、挖地既感覺。
呢度真係一片開始入秋既草原，上面好多動物食草周圍走。
不過呢度時候個山都仲係光禿禿。
沿途都係咁，左右都係，好廣闊既草原景。
之後慢慢，我個邊就變左山景，
另一邊窗睇既就係山谷、山谷下既大平原、同滿滿樹既植被。
(圖片)
再過多無幾耐，我就訓左(嗯)，一覺醒來，就到左喀納斯。。。
但……其實我想係賈登峪落車的。
要折返5KM先到賈登峪，但問題係 今日行15KM，咁行埋呢段就20KM，
所以決定去搵下有無得飛的。
結果問得太少人了 ~_~ 問左個開價$40/人到賈登峪，
我話：下我黎都係$35咋有無得平d。
佢話：班車唔同呢d車啦。
雖然我都知，但係5KM (幾分鐘都唔洗就到)咋嘛，2個人即係$80..... -__- 。
(而之後係呢度返布爾津，3個鐘都係$80/人之嘛 -__-)
上左車之後佢好快就到左賈登峪，然後問我地係咪騎馬，
於是就幫我地聯絡個馬伕。
之前上網有睇過，馬伕既馬都要我地比錢，而馬伕本身都要錢，
所以結果係要：租2隻馬、1個馬伕，租2日。
而之後去喀納斯點，就到左禾木先決定。
咁徒步點解要租馬呢，因為唔想重裝徒步，所以將所有野掉晒比隻馬孭住。
如果想慳錢，當然可以將d重既野寄存，唔洗帶住去，睇自己點決擇。
因為好多相機、仲有差電(應該重過晒兩個加埋既其他行裝)，
所以都唔係孭係身了。
呢度下晝35度，夜晚就5度，所以衣著要準備充足。
係呢度開單租馬。
跟住有人問香港用咩紙幣，然後問可唔可以同我地換張港紙，
我地話得張$100，佢就話「太大了，有無細面值d」，於是就搵到張$20。
佢問：有無wechat支付。
而我係未開RMB既(之前買車票時諗過開，但懶就無開了，搵左人幫手比)，
於是就無。
所以佢都搵番張人民幣比我地。
話說佢地比左落雪既小黑湖相我地睇，我地問：「幾時架？」
佢地話：「琴日」！！！琴日小黑湖落雪！！！
 |
| 價目表，不過佢唔係好跟個表。有d位會平左、有d位又唔同，應該只係參考。 |
 |
放番張徒步地圖先。《網上圖片》 |
睇番地圖，我地徒步既路線係由中心 賈登峪出發，
沿紅色虛線，經布拉勒漢橋(禾木收費站)到半路客棧 住1晚，
之後經三河交叉口，再沿禾木河到禾木村。
寫好單之後，交換wechat，佢話：你向前行就得啦。
心諗1：一陣你唔跟上黎，我地d行裝點算。。
心諗2：其實行邊，唔識路。
因為未知邊條路係起始點，所以行左段路sd左圖問佢係咪咁行，
佢覆向前行就係，過左鐵門有2條馬道，行右邊就得。
點知我只係望到左邊有個鐵門，本身以為係向個邊行。
不過同行望望下，右邊似係馬道多，於是向右行。
而事實證明，同行係岩的，佢個邊有個牌指住係賈登峪起始點。
向前。。。
開始時間係下午一兩點。。。
之前網上睇話，基本上經過一個山頭之後就係平路。
搞到我係咁以為係咪行錯路，但望maps.me又明明係岩。
我只能夠講，頭一個無錯係有個矮山頭，但之後個d唔係平路 -__-
當然話係山路都有d誇張，但叫有上有落咁。
嗚，有電單車外掛。。
上左第一個山丘之後，就見到喀納斯河了。
我第一個反應係：哇，真係好淺藍啊！真係淺藍架！
轉個角就落山。
同條河越黎越近。
但同時心諗：咦個山咁光禿禿既。
幾步路就到左山腰，見到班羊想上山，但見到我行過去就好想掉頭走，
跟住後面有個騎住馬既叫d羊向前。
之後我就企係邊邊位，d羊就行另一邊兜路走，
經過我時就急急腳走左去。
肥羊經過我，上山了。
落到山腳就見到流晒口水的售票亭。
呢個時候馬伕當然已經一早超越左我地，去左前面個客棧嘆。
跟住同我地講：「過橋繼續行啦，我後JOIN」。
OK，當然好，我地就走去河邊。
d水好冰凍又幾清，冰川水~~。
嗯嗯嗯，係水源。
雖然條格有個以寫危橋，不准通過，
但唔過橋就去唔到對面，所以大家都係行呢條橋的。
馬、人都係行呢條格。
雖然已經唔係木橋。。但都叫佢木橋。。
過橋之後，係一小段沿河既平路，幾寫意。
之後開始上山。
嗯，點通過好呢。
不過每個呢d水灘上面，都會有一排大大舊石，
應該係前人鋪黎比之後既人踏住行，
所以隻鞋係唔會入水架~~~~
我就係行右邊個排大石過對面的。
之後一直都係高處望落喀納斯河。
有時候，河道窄d，河水會急d。水聲好好聽啊~~~~
背光既位置，用眼睇會靚好多啦。
不過，真係好綠。。-_- 得個頂頂位係黃。
但都好，起碼知佢係開始緊變黃。
山頭仍是禿禿的，但有山色、河水色、樹色，都幾唔錯呢。
本身我以為今日會去埋三叉口的，怕太陽落山先去到會唔靚，
於是行番正常步速(本身完全係係龜速)，
結過好快就到左半路客棧-_________-
心諗：下？到左啦？？15km咁短架咩。。
如果早2個鐘出發真係一日去禾木算，慳一日馬錢 -___-
咁岩有兩個重裝徒步既人都到左，佢地話，三叉口係後面啊。
再心諗：早知唔行快！！
今日徒步個景係幾舒服，而且d水真係靚。
不過大家都講到太誇張！！所以我既FF都係好誇張！！！
搞到覺得理想同現實有段差距XD
我會講呢度係靚、係舒服，但未去到個種去左仙境之類既感想。
可能係因為d樹仲係綠吧？
之前睇遊記，5月去既人都唔少，d樹全部都係綠，d人都寫左好多形容詞~_~
唔通係我唔適合睇山水~_~所以無咁大感觸？
抱住好多人話禾木呢段超靚，
不過之後更靚，所以我都好期待之後既路程的。
講番旅程，路上遇到既佢地，
本身想去三叉口露營，但見太陽就落山，
決定問半路客棧比唔比到平台位佢地露營，
因為可以，所以佢地stay係半路客棧度札營了。
太陽一落山，大家聚埋係平台吹水，
同時馬伕未到，所以我地都JOIN埋一齊傾。
其實有4個人係度，不過印象深既有2個，
主要就稱一個做 大師、一個叫 煩惱人啦。
大師：「見唔見山頭有雪？其實4月6月就有，
但9月平時無，溶晒所以無咁靚架，
因為琴日呢度落雨，上面就落雪，所以雪山就出現啦」
大師：「夜晚會凍架，你呢條褲一塊布咁薄，有無厚褲架」
跟住我話一陣會換番雪褲XD。
傾左一段時間都唔見馬伕，幾驚佢走左，不過再過多陣佢就黎左，
所以就同老闆講住係度了，
一晚$150/人，計埋係$300，佢比左間房我地住，四人房住兩人。
同包車唔同，係唔洗包馬伕既住宿費的。
同馬伕傾計，佢問我估佢幾歲，原來佢係91年出世，
我「0口0」佢比左張身份證我睇XD 佢係哈薩克族，
話4歲(定9歲?!XD 爭好遠tim)開始就學騎馬，一開始上馬時都係唔知點騎的。
呢度就係半路客棧，其實d野算係咁，真係有種山上生活感覺。
1. 有發電機，所以係有電可以差，不過過左11:00pm就CUT，明天請早。
2. 有水源，來自山泉水(超凍)，超清甜(聲稱山體幫手過濾晒既沙石)，
可用黎刷牙、洗手、過濾飲用。
3. 洗手間係老遠既屋仔。
4. 沖涼、洗頭？無的，不過如果洗頭有洗開5度左右既水可以試下既。
5. 雖然應該無暖氣，但房是暖的，唔會半夜凍醒。
6. 有樹/木架，可以晾衫，天氣好乾燥所以勁快乾。
呢個時候已經入黑，係房度差下電之後，有人問我地去唔去食飯。
本身只係打算食乾糧既我地，
諗諗下都可以試下，係手抓飯呢，當然唔係用手拎住食。
$40/碗，幾粒肉，好多蘿蔔，我會叫佢做蘿蔔飯，
其實都幾大碗，但叫左2碗，其實應該1碗就夠。
一路食，大家就一路傾計。
大家講起之前去左邊度，煩惱人去完喀什再過黎，講左喀什好多好野食。
如同網上所講，大家都話「北疆睇景，南疆睇人民」之類。
但同時原來大家係覺得南疆好危險，甚至係個種好想去但唔敢去既地步。
甚至話：有班人好想去南疆，但唔敢去到太入，所以到左庫車就折返…
我同同行都有d驚訝原來佢地係覺得南疆好危險，
甚至係去到呢個程度。
講完喀什，之後大家講自己黎旅行既經歷，
講講下就講到旅行時間既長短，同埋自己生活既煩惱。
大師聽落係以前有返工，後來就開始全職炒股了，
所以佢話佢時間好自由，「多的是」。
至於煩惱人，佢其實係出發前三日先同屋企人講去新疆，
因為之前同屋企人講想去南疆已得到大大既反對。
另外佢就係話今次旅程其實都算係散心之旅，
一路上都諗左好多野。
其實都不外乎係同工作有關，升遷、能力、關係背景既問題，
同時大師話佢可能只係睇到人地既缺點，放大，
無覺得人地有優點，所以好執著覺得自己樣樣都比佢好。
雖然講既野同好多書講既理論都好相似，但其實都有佢既道理，
好多道理其實大家都知，
只係想唔想去相信，同會唔會去實行，往往先係最難既事。
講真，咁易做到，個個都係聖人了。
不過係執迷既時候，都好容易會諗埋一邊。
山中既一日，比市區既人少好多好多，但感覺大家都好CLOSE。
好耐無試過了，聽一大班識左唔係好耐既人講野，坐埋同一台，講到接近深夜。
唔經唔覺就傾到11點，本身話要好早訓既大師結果都係要11點幾先訓XD。
呢度夜晚超正，因為完全無光害，係度睇到人生第一次親眼見到既銀河，
同埋好似去左太空館個d咁，一舉頭，成幅觀星圖出現咁。
有特別光的，有無咁光的，好一大舊的，有散開的。
原來夜晚既天空係咁豐富呢，成個天都係星，
唔係只有一部分有，而真係成個天都係星圖。
睇完星之後，我就好好訓一覺了。
而同行就繼續留係戶外，同幾個人睇星、影星。
- Day6 完 -
沒有留言:
發佈留言