地點：喀納斯徒步 晨霧、鴨澤湖、喀納斯三灣、臥龍灣、圖瓦舊村、喀納斯湖
住宿：喀納斯圖瓦新村 某不知名山莊
今日八點幾起左身，對我黎講都係好早啊，
琴晚試過有兩次無電，好想搵d細燈仔開黎比自己知道唔係盲左，
不過帶去既蛋黃哥燈咁岩無電，明明出發前先換左粒電。。。
首先貼張景區地圖先。
 |
| (來源如圖中所示) |
起身之後，想坐區間車去三灣，
但事前當然係無做足準備工夫所以乜都唔知。
因為琴日黎到既時候，
明明見到個牌寫住北京時間07:00-09:00有晨早區間車直接去三灣，
點知8點幾坐個班車都係去換乘中心(即圖中既「區間車總匯」)既。
不過途中經過條河，上一篇有貼過的，今日居然有晨霧啊啊啊。
大家係區間車入面都不禁講「好靚啊」。
以下既相係大半個鐘之後影的，係車上面睇時個晨霧係濃好多，
何謂晨霧？同一般既霧唔同，佢只係會係水上面停留，
而且霧散時唔係向天散開，你會覺得佢係「消失」左。
當太陽一出佢就唔見左，可能係四散，但睇唔出，亦唔會令到你feel到濕笠笠。
點解會有晨霧既？最主要係因為呢度既夜晚好凍，而日頭太陽準備出場既時候，
太陽既熱力令到河面突然之間升溫，就會出現晨霧啦。
要注意既係：第一，晝夜溫差要夠大。第二，如果個日有大舊雲，基本上都唔會有晨霧出現，所以你黎到想睇晨霧，只能祈求佢日出時係大睛天了。
到左換乘中心，當然就去買區間車票啦，
通常一定會有一塊地寫明幾錢，但呢度係亂到爆，無的。
佢好多唔同既牌寫住唔同價錢，
例如有塊壁報話來回神仙灣係$5rmb，$120rmb去觀魚台之類，
但又有另一張POSTER寫住$60rmb來回觀魚台免門票之類。
個售票廳寫住LED燈牌寫住 白哈巴區間售票處，
點知原來佢都賣埋景區區間的。。。 =_________=
另外就係，我地9:00am到，佢9:30am先開，
問題來了，晨霧好可能就係呢三個字入面就散，所以其實都無乜希望。
咁唯有寄左POSTCARD先，
點知。。個郵筒比膠紙封住左，我心諗，乜料。
而郵局都未開，咁唯有等今日回程先寄。
之後出左去頭先有晨霧既河流，影左陣相，
就返返去換乘中心，見佢9點20分左右就開左了，
就想去買區間車車飛。
我地話：無喎
佢話：你地張門票呢？
我地就比左佢睇
佢話：你地徒步黎架嘛？
我地話：係呀
跟住佢就話，$100rmb兩張。我無為意，就比左$100rmb。
因為頭先塊板話$5rmb來回，拎左張飛返黎見寫住$50rmb單程，
望一望唔對路，明明去神仙灣，點解變左做出景區(往 賈登峪)既車票既，
問一問佢之後，佢話：「去賈登峪期間會去神仙灣，你係個度落車就得啦」
問題係，去賈登峪坐60mins，去神仙灣坐5mins，無理由同價掛。。
於是退左佢，決定徒步了。
如果9點個陣決定徒步，應該可以睇多d晨霧。。。
不過唔緊要啦，諗住聽日應該都有就算了。。。
好，首先就唔識路，於是就慢慢搵要點樣行去，
由換乘中心車道出口，會見到有棧道，一路沿棧道行，好快就到鴨澤湖，
朝早涼浸浸，好舒服。
行到呢度，見到唔對路，咦乜仲有晨霧咩？？仲要未散喎！
即刻行快兩步，佢開始散了。
我唔係攝影大師，所以影得唔靚，加上好可惜佢又欄杆唔比人行得太近，
但係係正面係，佢一層層咁靚真係好特別。
一層係藍天、之後雪山、然後綠色、黃色、白色、再有青黃色，藍色，最後……
係後面座山既陰影 -_-。
如果我係大師，或者行近d個湖大d，應該更加正。
呢d就交比同行吧，於是我就繼續向前，因為好想知神仙灣晨霧會唔會未散！！
點知，向前行，神仙灣晨霧居然係未散啊！！
其實每個湖之間既距離唔遠，但又唔可以話近，2-4km咁，
係朝早行真係好寫意好舒服，下晝回程又曬又熱真係要帶好多水。
行近去，佢就開始散啦。。
佢d水色真係好靚。
有時諗，秋天樹有黃有綠當然係靚，有晨霧更加靚啦。
不過春末、初夏時，佢地上既草係綠油油，可能都好靚啊，
甚至趕走左秋天乾草個種頹感？
當然我無後悔呢段時間黎，因為秋天，
尤其「金秋(雖然今次唔算金，因為都多綠XD)」，最靚係太陽日出同夕陽時分，
係果段時間，真係望住個景都覺得好靚。
佢就係散得咁快。
好快就由一大舊，變成得好薄既一層。
如果好早黎到，可能要等，因為太厚睇/影唔到野，
好好彩係呢段時間到。
好有溫泉既感覺呢？？
無幾耐，太陽越升越高，晨霧全部散晒，而湖水既色又有d唔同左呢。
其實呢，我就ZOOM近左。
而當初第一步見到佢咁，我有dd失望，亦都好怕其他都係咁。
係啦，其實佢好遠的。
我個陣諗：「係咪其實三灣係格硬改名的？下…好流喎。」
呢個諗法後來我係推翻左的，繼續睇落去。
無錯，ZOOM近d真係好d ... XD 網上好多圖都係咁 T______T
無錯了，佢唔係湖，佢係灣，所以佢出名是佢唔係直直既河流，而係佢轉既灣？
好啦，唔理呢d名既野，靚就得啦，所以呢個時候我覺得神仙灣係未合格的。
當然，成條喀納斯河都係好靚，尤其佢既顏色。
慢慢地，棧道遠離河流，緩緩上坡。
上到連條河都見唔到了。
本身本住去神仙灣都唔耐，咁去月亮灣都好快姐既心態。
最後，我覺得呢d牌係昆人的。
另外就係，同時都知景區內既晨霧一定已經完晒。XD
嗯，幾自然。
間唔中都有人行。
話說，幾時知到下一個灣呢？就係當見到前面棧道無啦啦多左好多人，
只要向住佢地望既方向一望，就會隱約見到個灣。
太陽開始猛了。
繼續上斜。
上到咁上下，又見番條河了！
同時，原來，月亮灣到左啦~~ 係近架！係靚架！
不過呢個位唔係最高個位，回程個陣先上去，
呢個時候，我地沿落山棧道向前行，因為要貼近番條河~~~~~~
呢個位人比較多，棧道較窄，仲要無欄杆的。
個灣真係高處先睇到，落山落到一半已經見唔到個S形了。
d水遠睇時好奶白，近睇時又好清，好得意。
繼續落山，落到咁上下既位就無人了，
因為大部分人都係坐區間，會唔想落到最底又要行番上山坐車。
於是當人唔多時，徒步其實好寫意呢！
落到黎，已經係近到可以掂到水既距離啦~~
呢舊木好多人去影相同玩，留係度應該有幾個字，都有七八個人左右去左影。
倒影好正 >v<
有d石係度點綴下都好靚。
係棧道行時，望落棧道外，無啦啦有條無草又無樹檔住既路，
大家就知道邊度係影相位，要落去睇睇了。
係靚啊，而且呢度好爭起地白樺樹大部分都有變黃XD，係d松樹太耐寒了。
靚靚~~
講起，呢度超多垃圾筒，而且又真係無乜垃圾。
最開心係景區禁煙，所以空氣真係清新到要大大力索，
當然朝早我會大大力索，但由於下午好曬又乾，呼吸太多就口乾得越快，
於是我就保持住正常呼吸的。
大家睇到呢度，有無一不小心變左手動呼吸呢？
有趣既樹，好似拱門。
一直都係黃色、綠色、雪山、河流，
講真去到某個位已經半放棄影相，雖然唔可以話一樣，
但都會覺得自己影咁多都分唔到，
係咪叫做審美疲勞呢？唔係既，只係沿途既驚喜已經唔係佢既雪山同河水度，
反而係棧道附近既事物，或者聽人地傾計。
但黎到呢度又突然叮一叮，因為一直好似無乜點郁既河水，
到左呢個位因為收窄而變得喘急。
呢個位都可以話係沿邊一大亮點。
係呢個位附近，我地遇到前晚係小黑湖毯房既一男一女，
佢地琴日同我地差唔多時間出發，因為佢地落山係徒步的，
行到夜晚七點左右到喀納斯，佢地住圖瓦舊村，比較近換乘中心。
佢地聽晚係北屯坐火車返烏魯木齊，而我地就係後晚布爾津坐大巴返烏魯木齊。
講起哈巴河縣同布爾津之間既五彩灘景區，佢地睇黎嗤之以鼻。
經過呢度之後，我地相信好快就到臥龍灣了。
第一下黎到呢度，唔小心講左句「咦？青衣公園？」
因為呢個角度真係好似XDDD
呢句說話，係我上棧道之後收番。
呢個灣我都好鐘意~~~尤其睇完太多黃、綠色之後，居然比我見到有紅色 ^_^！
倒影都係精髓呢。
去緊了、去緊了。
之字型上山，再望番落去~哇~~真係唔錯呢！~
呢個灣特別之處係中間好似恐龍既島仔。
其實佢係源於幾百年前一次地震，引發泥石流，泥係中間凸起，形成島仔。
係度兜左個大圈，上到最頂就係區間車站，所以山上面又係滿佈人的。XD
但山下既棧道就好似相入面咁，人影又唔係無既，但唔多啦。
臥龍灣係今次徒步既折返點，係時候開始回程了。
回程由臥龍灣，至月亮灣無乜影相，直到上到月亮灣最高點先開始再影相。
回程時，多左唔少人行緊去臥龍灣，
一路行，都遇到應該有十幾個人問：「仲有幾耐到耐龍灣呀？」
因為想行去某個位，所以離開左棧道少少，行到臥龍灣某個山路上。
唔同角度望。
遠處見唔見到有比較急既河流呢？佢係由急個邊，流落大灣，變番平靜既水喔。
回程了，今次行近山既路。
終於，到左月亮灣，上到區間車落客位，亦係較高既點。
哇，真係無樹阻住最上面個灣喎。
完美反S型。
不過d色水好似無咁藍，反而偏綠，同埋係高處睇無左個倒影了。
上到黎，周圍睇下，見到有個叫聖泉既地方。
唔知點解，大陸既人鐘意成日都見水、聖、之類既野，就會拋d五毫、一蚊落去。
係唔同地方都見到咁。
另外，係度問左問停泊左係度既區間車司機，
佢地話一張單程既車飛，可以分段用的，
例如同一張單程車飛，而路線係 A---B-----C-----D，
買既時候一定係 A 去 D全程的，
咁你一日內可以A去B先，玩完，再B去C，最後C去D咁。
再睇下人流，ummmm。
我相信依家未到最旺，一路行，一路諗：唔知有幾多人黃金周時係棧道跌落去…
另外，都物色緊聽朝，如果有晨霧，去邊度影。
月亮灣係三灣之中最多人的，神仙灣係最少人的。
白樺樹真係好正。
聽講內蒙個邊無乜松樹，係一大片白樺林，搞到好想去睇下，哈。
神仙灣，話說回程時，覺得佢靚左。
可能係呢個時候，太陽位置唔同左，佢d河水又閃閃發光，
所以個感覺都唔同呢。
真係，呢個時間黎又幾唔錯喔。
當然，比番個遠既大家睇。
P.S. 月亮灣、臥龍灣都係近既，但神仙灣係真係OK遠既…
佢有d位係幾特別喔。
有d人走近去影同睇。
呢個時候，水開始飲晒咁濟，開始好口乾好想飲野啊。
然後我就諗起換乘餐廳既一堆餐廳了。
呢個時候，都有人行去緊月亮灣既人，
經過神仙灣時聽到佢地話：「這不是神仙灣吧，在前面呢」，
而其實個牌、同區間站已表示呢度係神仙灣，
沿棧道同牌行，前面已經唔是灣，是比樹阻住的河流了，下一個已係月亮灣。
回程路上，同今朝好唔同，加上我好口乾，所以有種覺得呢度好荒涼既感覺。
遠望觀魚台。
到鴨澤湖了，加油啊。。
太陽位置唔同，鴨澤湖感覺又唔同左呢。
嗚呀，就到啦。。
就黎口渴到想飲。。
無幾耐，終於返到換乘中心。
首先去左郵局先，點知個郵筒仲係封左=_=
好彩郵局未收，就入去交POSTCARD比佢地。
之後去買飛。
入去既時候，有人係門口問：「你要去哪？」
因為遇到太多黑車，所以就算景區內明明只可以區間車，
但梗係覺得佢係黑車，唔係好想答佢，就問：「幹嘛？」
佢好好心咁答：「最後一班車是9:00pm，要趕快買票哦」
個陣無為意佢講乜，所以只係喃喃講左句「嗯嗯」就頭也不回走左入去售票處。
依家諗番，都要多謝佢，因為當我思考我要幾點食完晚餐時先醒起佢講乜，
我最後係坐9:00pm尾班車返圖瓦新村的，當時架車未開燈、司機未上，
雖然返新村係唔洗買飛，但如果無佢個句，我應該唔覺得架車係可以搭的。
另外，
係度打算買聽朝既區間車飛，因為聽日會出賈登峪，
所以點樣都要比$50rmb單程的。
不過，個售票處話：「只可以買當日既車費哦。」
咁唯有聽日九點幾買啦，因為九點幾先開。
況且以今日經驗所得，八點半至十點半都係有晨霧的。
返到換乘中心，本身諗住食個米線先，不過見已經七點，
覺得應該要去左喀納斯湖先。
另外就係，係度休息時，同行買野飲，簡左呢支，而佢就飲可樂，
飲完好好飲既青梅綠茶之後，力氣都返晒黎 ^3^ 呢支真係好正！！！
出返去，之後出發去喀納斯湖。
去喀納斯湖碼頭，會經過圖瓦舊村。
好多家訪點，即係比錢入去參觀個d啦。
聽講好多都係翻新的。
呢度既小學，有幾多係度讀完之後，會出去讀中學呢？
睇黎係景點製作中。。
話就話2km，點知行左勁耐。
過左圖瓦舊村就開始行棧道。
原來超貴既喀納斯山莊係呢度。
太陽準備下山了。
喀納斯湖邊，流向喀納斯河。呢個位係接近激流起始點。
呢個碼頭係比人喀納斯遊船的。
因為唔遊船，所以係湖邊周圍行下。
呢個係玩激流既話，橡皮艇會經過呢條軌道由上面放落黎。
因為太陽落山之後無乜光好少影相，加上相機又無乜電，所以影好少湖邊既相。
今日行得太多，而且到有區間車哦，就上車了，好快經過圖瓦舊村，就到換乘中心了。
真係來不匆匆，去就匆匆哦。(誤)
唔洗一陣就到左換乘中心，之後全日無食過野既我，就衝去食米線了。
即管發脹左，
又無肉，又唔抵 (好似$30rmb定$40rmb，明明係香港食到好好味的!!!)，
但有野食真係好開心。
食完，係換乘中心附近買左兩支野飲，就去換乘中心坐車上圖瓦新村了。
本身話無車就行上去，好彩有車，因為係坐車個刻發覺真係唔太近，
上山路不突止仲要好黑。XD
話說，今日總共行左35km，應該唔止關島個時31km 50000步了，
當然係好多人眼中係好短既路，但我不嬲唔行路既人黎講真係一種突破了。
所以其實幾開心的。XD (自虐)
9點當然天已黑啦。
返到去，照樣係第二個站落車，然後跟住之前MARK既GPS路線行，
認返自己出黎時既路，到左我地住既地方。
你以為我地可以沖個靚涼，好好訓一覺？
少年，你咁諗就太年輕了。
當我地返到去，打開我地個房門，有班女仔係度。
「咦？我地去錯左？」
再行遠d望一望，「唔係呀？明明係呢度。」
跟住再打開門，「咦？點解咁既？我地d野呢？」
入面既女仔話：「呀，我黎借廁所架，老闆話可以入呢間房」
跟住我地覺得怪怪地。
「借廁所？咁我地d行李呢？」因為間房d行李唔同晒。
之後發現借廁所比佢地既係另一班人。
「下？」之後係個房外邊既台面，見到我地堆行李。
雖然想搵老闆，然而我完全唔記得琴日幾個帶我路既人既樣。
然後我就去左廚房，問話搵老闆，黎左個未見過既女人。
我地話：「啊。。我地租兩晚，點解間房會比左人既？」
佢就問左另外兩個人，望到就認到係琴日分別帶我地路個兩個，
大家都話：「啊。。無同我地講兩晚，以為係一晚，你應該同我地講聲嘛」
我地話：「我地同馬伕講左，因為佢同你講既唔係PTH，所以唔知佢無同你地講…」
老闆娘就話：「啊，馬伕其實同我地一d關係都無…只係認識所以介紹過黎住…」
我心諗咁夜搵唔到地方添…
於是問：「我地可唔可以有個地方訓？我地訓地下都可以啊？」
老闆娘話：「下…訓地下啊……？你有營嗎？不怕冷嗎？」
我地話：「我們可以的！」
之後佢話，其實今日好旺，d房都full晒，
佢地連自己間房都讓左出黎租比人，
不過佢地今日訓廚房，如果我地唔介意既話，都可以訓。
我地當然就唔介意。
呢個時候，廚房煮緊野、出面燒緊肉，所以未可以訓，
佢話一陣搞掂好，執好之後會話比我地知，我地可以係度坐下暖下先。
我地話「好啊，唔該晒你啊。。」
見有時間，就執下d行李，
聽到好多廣東話~~
仲有同出面燒肉既人傾計，借廁所(XD.....萬分感謝)，
嗚 T___T。
睇下星星，又入廚房暖下咁，
老闆娘好驚我凍，成日叫我入廚房暖下先。
之後大家食完野，佢地又洗完野，就搬左d床、被比我地。
我地都唔係幾好意思...XD
於是今晚就同老闆娘、同佢個仔一齊係廚房訓，
呀，仲有掛住係度既半隻羊。。。
老闆娘好好，問我地要唔要 開水，要唔要差電，
之後無幾耐，我地就熄燈訓教了。
唔知唔係半夜住係標間既人，有d人覺得太凍，
半夜無啦啦有超強燈光照入黎，因為閂晒窗，而且係磨沙面所以檔到下d光。
所佢地敲門。
我諗起之前禾木村，有人話半夜有人入黎check d係咪港澳台外籍，
要去番三星d住宿到住，即係千幾人仔個d山莊住。
好彩，好快佢地就出聲問：「請問有沒有開水？」
跟住老闆娘醒一醒，喃喃講左句：「半夜怎麼會有開水呢？」
之後訓番唔理佢。
其實都係，呢d地方，唔會整部電熱水煲同你長開keep住有熱水，
一定要開爐煲水，半夜邊度黎有人煲熱水呢。
跟住出面既人見無人理，就走左了。
過左無耐，我又訓了，到下一次醒，就係第二朝了。
- Day10 完-
沒有留言:
發佈留言