【中國 新疆甘肅 16d16n】Day2 南疆 帕米爾高原 (紅山、白沙湖、卡拉庫力湖、慕士塔格雪山、紅其拉甫、塔什庫爾幹縣)

Day2：2017年9月10日 星期日
地點：南疆 帕米爾高原
住宿：交通快捷酒店

頭幾日黎到真係撞晒板，
首先係住宿既問題，之後就到交通既問題。

本身係約左一位師傅呢日朝早接我地，包2日1夜既車上帕米爾高原的。
結果佢8月電話唔見左，wechat d record無晒，
同時係wechat出post話如果有約到要同佢講聲，
不過我又好少上wechat，重點係朋友圈基本上係完全唔睇，
就好似line個timeline咁，一年都上唔到一次個隻。

結果，呢位師傅9月10號係新藏線上玩緊。。

不過佢好好，搵左佢個朋友黎代佢帶我地玩，
可以去既地點同之前一樣，同時收既價錢都不變。

我地最初既PLAN係咁：
「紅山、白沙湖、卡湖、雪山、四號冰川、塔縣、石頭城、金草灘、濕地」
但原來四號冰川8月尾開始，有考察隊去考察，就封左，結果改左
「紅山、白沙湖、卡湖、雪山、紅其拉甫、塔縣、石頭城、金草灘、濕地」

至於點解之前唔去紅其拉甫 (即係中巴邊境)，

係因為幾年前開始，港澳台外籍不准通過前哨站前去國門、界碑，

近半年聽講對中國人都嚴左好多。

不過既然無得去四號冰川，去一去紅其拉甫都可以。

同時，就算去唔到國門，都可以到塔什米爾地區一遊，
同埋企係幾百米之後既前哨站，遙望國門、巴基斯坦土地位置。

呢個地區，係比巴基斯坦、阿富汗、印度、中國所包圍，

一直都係爭議之地。

除左有歷史既因素，同時因為佢位於帕米爾高原更高海拔既地方，

加上係喀喇崑崙山之中，周圍都係雪山圍住，個景都好靚。

星星既地方就係沿途路線同景點，而佢包圍既地方就係巴基斯坦、阿富汗、印度。

返返去呢日既旅程，

我地朝早大約北京時間九點，係大路既停車場同師傅會合，

然後就去食早餐。

呢度d鋪頭、餐廳，全部都係鎖住唔比人入，
如果你要食野，係門口同佢講聲，佢就會開門比你，
跟住就叫野食咁。

呢度食既野有少少香港既感覺，有油炸鬼、豆漿。
不過都有佢地既酸菜、包之類。

係出面食，附近個景。

大碗豆漿

油炸鬼，幾香口啊

酥皮，OK既

埋單$26rmb。
師傅話新疆多數都係食肉，所以有菜食要食多d啊。

呢度遇到一個烏魯木齊黎喀什工幹既人，
之後聽好多人黎工幹都係同石油有關既行業。

師傅同佢傾傾下，發現原來以前係「只差一點點即可以再會面」，
佢地係同一個地方逗留過，識過同一堆人，結果佢地到依家先相見相識，
於是佢地互相留左電話，話師傅返左黎之後同佢聯絡。

另外就係，果個工幹既人，話去過廣州，未去過香港，

不過佢話覺得香港人見識會多d，
同時對於南方覺得係比西北呢邊繁華。

都傾左一段時間，之後就出發了。
沿帕米爾大道進入中巴公路，途中經過幾個鄉。

我地問有關高原反應既問題，師傅買左堆生果，話食藥不如食生果，補充糖份。

去加油站，同香港一樣，入油唔會留係架車入面，
所以係入口落一落車，係出口等車出黎。

生果檔，好多款生果都有，如果可以每樣試少少就好。
佢比左塊哈密瓜比我地食，哈哈，都幾甜既。

而之前個日係喀什老城買左提子，都幾大袋，朝早拎左去洗，
諗住天氣乾燥都可以食黎解渴，幾好味。所以都叫有生果，唔洗點買。
於是最後只係買左兩個布冧(最後無食-_-)就上車了。

去程呢日沙慶頗大，雖然上高原之後藍左好多，
但回程先發覺原來呢日大部分雪山都比雲遮住左，搞到前段紅山個PART覺得唔算太靚。

天氣好真係會靚好多。。呢日無乜話大感覺，只係覺得d山幾型。

山既色代表佢有既礦產，有紅色、橙色、綠色、黑色(媒)。

成條路限速60km/h，但其實無乜司機會理，不過一陣發生d有趣既野。

再一路向前。

經過左紅山，上到一定高度，過左一個高位，架車開始落少少斜個下。
「哇」。。。白沙山、白沙湖！！！

之前睇人地遊記既相，係度諗，下，真係有個咁白既地方？
然後當親眼見到，覺得呢度真係好特別。

白色既山，唔係雪山，而係幼細既白沙。
湖水本身係天然既，而依家其實係水庫既水黎，個水庫叫做布倫口水庫。

聽講因為起左水庫，白沙山上既沙越黎越少，
以前係成座山白色，依家會見到少少石既山體。

可能唔知幾多年之後，就無左白沙山了。

白沙山白沙湖有兩個可以睇既地方，
第一個係紅山入白沙山既一刻，個度有片空地可以睇，
好多人都會係個度停留。

而第二個點，係再行入d，會再近白沙山多d既地方，
係個度，直情可以同白沙湖既湖水企埋一齊。

d湖水又係好清、而且好冰凍的，
係個度執左兩三粒石黎儲起佢。

過左白沙湖，就係一大片荒草之地，
之後就會經過濕地。

然後越黎越接近卡湖 (卡拉庫力湖)。

由於中巴友誼公路係雙線行車，每個方向只有1條線，
限速60km/h，但又疑似無人理，
於是大家都行得好快，結果無啦啦出現一架警車，
以60km/h係條路度慢慢行，所有車都唔敢超車，
於是就出現一條超長龍，大家都要跟住架警車行。

有人超車比警車鬧，叫佢跟番後面，
去到某個位，佢地換更了，換返黎果個就無咁嚴，
之後就一個個超過架警車走左了。

卡湖係慕士塔格雪山下，所以基本上，見到卡湖，
亦都等於睇到慕士塔格雪山。

超濃羊湯。

乾包。

放d包落羊湯，d包超級入味，好似食緊羊肉味既包，
其實真係好想食食食食，到左夜晚又好掛住呢煲湯同羊肉，好想再食。。

勁好似，支羊腳有筋有肉，無調味但超濃，又唔騷，又唔痴牙，嗚呀。

全部加埋，埋單$60rmb。

食堂入面既格局一角。

但慕士塔格雪山唔係一定會出現，
好似富士山咁，成日都有舊大雲係佢個山頂。

於是我地都等呀等，仲係蒙古包既食堂食埋野，先再出去再睇，
不過呢日雲都係多，個頂都唔係好出，之後回程就清好多了。

遠睇。

之後沿住湖邊行，又上下山丘高處望落去，都唔錯。

不過都係個句，如果雪山出晒黎會更加靚，
去程睇卡湖係有點普通，所以對回程時評價高好多。

另外，呢度d湖水就係冰山冰川流落黎，又係超冰凍~~~。

而且仲依然係好清。

d相影唔到佢有幾大，好多都影到佢好細，所以就唔貼咁多了。
之後行行下見到有人即場宰牛，如果d動物係即場宰，
咁頭先食既應該係超新鮮既羊。。

係度連埋食野，應該有兩粒幾鐘？
之後就出發去紅其拉甫了~~~~~

雖然車程好長，但沿途既景都唔差，
可惜可能開發緊，間唔中都幾多泥山、同埋挖地。。

令到咁個種，人地口中講到，度度都係景既感覺。
例如，雪山明明好靚，但前面座山就好似好單一既顏色，無乜層次咁。

可能要等落下雪，令到無植被既山體有層雪彼住，咁就會好靚了。

不過見到咁大座雪山就係面前，個感覺都幾特別，同埋不枉此行。

慢慢就經過卡拉蘇口岸，如果過呢個口岸，就係去吉爾吉斯了。
呢度海拔4000m左右。

接近塔縣，當然就有親愛既安檢。
呢度海拔落番3000m左右。

沿途都有呢d標語。

踏入更接近邊境既地方，國旗都越來越多。
呢條係巴基斯坦既冰山水，流入中國國境之內。

卡拉其古係玄奘取經後既東歸古道，而紅其拉甫係中巴公路中國段既終點站。

我地會去左紅其拉甫先，返黎再兜一兜卡拉其古。

其實呢個時候太陽開始準備落山。
兩座山中間既地方，就係阿富汗既國界邊。

我地問師傅，維語其實係接近邊一種語言，
師傅話：「同巴基斯坦唔太似，反而同阿富汗近似d。」

佢話以前就係呢度打仗，塔利班就係個山谷度走出黎。

雪山亦都越黎越密。
以前d人打仗，係翻過雪山咁黎，諗下都覺得太厲害。

經過呢度之後，就係之字形上山路，海拔上到4400m。
呢度司機係度瘋狂食提子。XD

無幾耐就上到去前哨站。

師傅不斷問前哨站既人可唔可以通融下，
可惜都係唔比去國門個邊。

唯有遙遠咁望過去國門既另一端。

過左遠方既國門，就踏入巴基斯坦。
如果有睇以前既遊記，係會見到d人可以去到國門，
穿過國門十幾米左右，到達中巴界碑。

呢度因為太陽已經落山，同時海拔4400m，所以係OK凍凍凍凍~~

不過有另一樣野幾開心，就係本身怕自己4400m會有高反，但今次係無事的。

雖然可能因為留係4000+m唔係好長時間，
身體仲有足夠氧氣，但我傾向希望自己係無高反... XD。

係度逛逛下，無話有咩特別野睇，反而沿途仲靚，
所以好快就決定要回程了。

頭先講過，去完紅其拉甫，就去卡拉其古。

如果太陽未落山，呢度一定係好靚。因為呢度後面係一大排雪山啊啊啊啊啊。

呢度聽講不久既未來就會開發，因為係真正唐玄奘取西經行既路，
可以發展旅遊業，賺錢錢錢錢錢，佢地話：何樂而不為呢？

睇完都已經好夜，可能都有十點了？
呢個時候，大家都好眼訓，師傅仲好努力揸返塔縣，好佩服。

大家都好想快d返到酒店訓教之濟，明明今日見到都唔多人，
覺得塔縣既酒店住宿應該仲有好多位，
但搵左三四間都話FULL左、得番套房、唔收外賓、之類。

結果就簡左交通快捷酒店，佢無熱水之餘，仲要無乜水。
而且……因為得閒家庭房，所以有差唔多四張床既位置，
於是我地係會同師傅一間房，$230rmb。

返到呢度，師傅去食個晚餐先，
由於個洗手間門唔係好實，於是要去廁所又好、梳洗又好就襯呢個機會！
一陣師傅返左黎就唔會想用了。。！

算，聽晚會有好酒店沖涼架啦！！雖然已經連續兩日個體驗咁樣。。
有時回想返，呢次新疆之行真係幾乎放棄左沖涼呢回事。。

好彩夠眼訓，於是都訓得唔錯。。。
好，又一個希望快d到第二日既晚上。


是日總結係：
雖然卡湖係帕米爾高原既重點，
但我更加鐘意 白沙山 同埋 接近紅其拉甫時既沿途景色 。


- Day2 完 -