地點：北疆 阿勒泰地區 —— (騎馬) 禾木村 往 小黑湖
住宿：小黑湖毯房
朝早懶懶閒，同行出左去影坎煙，
到自己想郁既時候搵唔到同行，所以就走左上禾木觀景台。
大大粒蒲公英。
早起的馬兒有草吃 (雖然遲起都有。)
呢個時間都好多人，不過係落山
坎煙已止，但仲彌漫住坎煙
後面是咁的，呢度色彩豐富d，如果山下都是咁就好了。
河邊。
幾長的，所以當初睇雜誌，佢張相係連住兩板紙。
但唔ZOOM近睇 / 用眼睇，感覺上有大大條流水、依山而建個d古城靚d。
寫既時候都已經10月3，有去睇禾本既TAG，發覺現實既金秋入面，
即是白樺樹完朱變金，松樹都是綠的。
再睇番雜誌張圖，松樹變金(啡？)時，白樺樹基本上就只有樹枝了。
所以，佢既最靚時期究竟係幾時呢？
或者要去只有白樺樹既地方，先感受到真正純金秋吧。
嗯？可能是內蒙？要諗諗了。
開始散走。
觀景台棧道。
得番好少人。
呢個時候10點左右了。
大家都起身了。
估唔到一來一回就用左個半鐘，返到黎時要出發了。
經過禾木村村口，馬伕話循例要買騎馬保險，
佢同我地講：「一陣佢地問，你地話騎一日就得了。」咁即係其實不如你唔好買 -_-
入到去，比張港澳通行證佢，佢地話唔係中國居民二代身份證，無得買。
都幾好，自己都無乜所謂，因為本身有買旅保，有包騎馬。
另外門口有個價目表。
有合理懷疑如果唔係跟依家呢個馬伕，無二代身份證可能無得騎。
出發時頭半段路都係去禾木觀景台既路，之後就會係分叉口向第二條路行。
可能未食野，頭先又上落左禾木觀景台一次，
今次行上山好快就想飲水、食野、休息。
呢段路回望禾木村。
好似無琴日咁禿，難度是角度問題？
望番過黎山上，又係禿禿的。
上馬了。
上馬再望禾木村。
好遠了，要講BYEBYE啦。
**** **** ****
題外話：
係 布爾津 前往 賈登峪 既班車上，
遇到有個人，黎過呢一帶三次，
佢係好鐘意村落個d，佢覺得禾木超超超超靚、
亦都覺得我地(港、澳、台、外國人)去唔到既白哈巴好舒服，
佢話：「喀納斯去1次就夠啦，但禾木、白哈巴可以黎好多好多次」
所以有d地方，對於有d人黎講真係好正。
又或者另一個角度，有d地方，即使對我黎講好正，但只要去一次就夠。
而有d地方，未必好震撼，但係會可以一去再去，慢慢細味，
每次都可能咬到唔同既味道出來。
**** **** ****
如果條河係村中間，會靚d，但依家係村口，就無乜特別。
如果我係個畫家，一定不留餘力，畫條彎彎曲曲既大河係村既中間。
呢日會由1300m海拔，上到2600m海拔，
路程係15km，所以唔少既路都係懸崖黎。
一直睇BLOG，d人都話騎馬會騎到好攰、好酸、寧願落馬行都唔想騎係馬度。
所以呢日上馬，係有d心情複雜。
初初係馬背上，覺得都幾輕鬆。
不過個陣ZIP腳踏位時，佢好似轉左一圈，搞到我feel到隻腳要r入去咁，唔係好舒服。
後來我再穿過隻腳就好d了。
呢日其實有好多機會可以影相，但係。。
我張卡係呢個時候唔爭氣，
搞到要del相先影到，del相又要用雙手，隻馬上崖又唔可以唔捉緊，
加上當時陽光又猛唔係好睇到MON，
結果無乜刪相，同時等於無得點影相。
仲有，d馬好鐘意飲水，當然唔會唔比佢飲啦，
但馬伕就好鐘意叫我地拉起佢個頭叫佢繼續行，
又要我地要「砸肚子」。
........ 喂啊，比佢飲下水唔得咩。
一路上既馬道都其實係碎石路咁製，而且仲要係上斜，
馬蹄鐵唔係膠係鐵，抓地力當然唔夠鞋好，
結果d馬間唔中跣下腳，你都咪話唔驚。XD
慢慢上，d樹色再有d變化。
雖然騎馬不太寫意，但風景都是幾寫意的。
有山、有樹、有河，夫復何求？
呢日騎馬既途中，
望到太陽照落色彩繽紛既樹上，衷心講左句「哇，真係靚架喎！！！」
之前睇遊記，好多有由禾木去喀納斯既人，都話沿途風景比賈登峪去禾木好，
自己未去時一直都有懷疑，因為睇相個個都係影小黑湖，
好似風景得小黑湖咁，又無乜沿途既相睇，
反而顧賈登峪去禾木大家就影左唔少相。
到呢刻我發覺，係因為上山，大家都顧住留力去行，所以都唔影相，
但如親眼所見，呢段路風景的確係比前兩日更靚。
(以下略，要搵搵相先..)
- 張卡無位，於是唔係影到好多相。
- 隻馬適合跟人行，唔適合自己行，但佢又間唔中越線玩超前，無啦啦唔知點解我變左帶隊，做最前，但行到一堆石仔既分叉路，有時見到盡頭係無路就會拉佢行第二度，但有次前面全是石路，結果搞到行左去崖邊，仲要係流動既溪水，同時都係瀑布黎，d石係斜落去d水度。。同時隻馬馬唔聽話，想飲水，就想行落流動緊既溪水度飲水。。我又拉唔返佢走，結果要馬伕拉番走佢。
- 上其中一個崖時，隻馬係之字路轉彎位甩腳，成個人傾後少少。馬伕話：「安全第一」，於是我落馬行上去，佢就帶隻馬上左個段之字路。由於馬係行之字，人係可以一字直上，相信其實如果唔係孭住野上山係幾好既選擇啊。。我開始覺得自己要做多d負重運動。。
- 上到某一個位之後，就有得食下野飲下野，都係羊奶、開水，唔洗錢。大家都停低休息。之後同行決定徒步一段路，佢表示徒步輕鬆好多。
- 由於佢係徒步，於是佢會行先，之後我同馬伕後追。馬伕勁驚同行走失，係咁問「知唔知佢向邊行？」我瘋狂指住山上佢又唔信。我話「佢唔會行錯架喎。」佢又唔信。我直情話佢有地圖，佢都唔信。之後行過一間屋仔，又問人見唔見有個人行過。之後又專登跑前望，見唔到又返返黎。最後我指住山上面話：「佢咪係度囉」黑色果個係咪佢，佢先正常番d。
- 之後完左瘋狂上崖段，就開始慢慢上山段。轉過一個又一個山頭，馬伕都話「就到啦」，結果再轉多兩個山頭都未見有湖。一路諗：「會唔會轉過個山，就見到好大個湖呢」之類既ff。
- ff既時候，當然係陽光普照啦，咁就諗一陣應該會好寫意坐係草地上面睇小黑湖。結果最後上山段無啦啦超凍，涼浸浸既風吹過黎，結果我就完全打消左「寫意睇湖」既ff。
- 到左，落地，問左一晚毯房幾錢之後，由於之前孭住背囊，膊頭開始酸之外，仲因為凍，所以好想快d入毯房。呢個念頭一出，就衝左入通鋪度，鋪一鋪個位、再蓋兩張被。明明應該好暖，但唔知點解d凍既感覺係由心入面出黎，個陣係度諗：「如果呢個時候病，我今晚點算好、聽日走又點算好呢。」同時又心諗：「唔係就到目的地先黎病掛」。乜都唔理了，訓一覺先，可能只係冷親啦。
- 聽到貓叫，有隻好靚既貓走左入黎。又可能見到張被暖，就痴左埋黎一齊訓，而我都唔敢郁醒佢，所以都係張被入面暖住同埋準備訓一覺。
- 因為呢度都有四五個人，到步之後大家都會好似半路客棧咁吹水。同行話同到步既人一齊去小黑湖，問我去唔去，唔知點解覺得好凍既我就好唔想郁，想係度休息下，所以就唔去了。之後同行問食唔食飯，我覺得如果有暖野落肚應該會好d，所以話「好啊好啊」，因為會今晚先煮，所以到時再叫醒我。
- 就咁樣，我決定蓋多層被訓，而當我再次起身時，就係食飯時間了。
- 好好彩，一教訓醒，我變到.... 超級熱，但又完全無流汗，係熱到我係毯房外 可能得三四度 我都可以仲覺得自己係熱的。當我想去廁所時都係覺得熱的。到我入去飯堂既毯房 個度開住火爐，我係諗：「咁樣會唔會降唔到溫，我有d熱，想出毯房涼一涼先」。。。
- 因為太熱，所以個陣心跳得有點快，唔敢食野食太快。一開始都係慢慢食。去到慢慢個身體開始降溫，就有番食慾食多左。
- 食飯係係一張台仔圍住食，有一個人好勁，成日周圍徒步、又係去好多旅行個d，佢係用好短時間可以行好長途既人黎，但佢話佢同佢既朋友比起黎，只係「新手」。另外就係，黎到呢度，感覺到。。黎得既人好似都好得閒、好多假期、好多時間 (除左我) 咁。但係佢地既旅遊經歷都係好豐富、同時好得意，見識又好似好廣咁，可以分享到好多野，又講到歷史、地理、人文、食物咁，雖然唔知係咪準確，但好有自己既一套見解。好多都係黎左好多日，即使係二十日既旅行，對佢地黎講好似只係一個好細個數字。
- 食完飯，飲完暖水，又到左完全無燈光既時間，但由於出面係凍既，所以係出面留唔到好耐。我開始諗，頭先好熱個陣應該留低睇耐d星星。
- 今晚依然係萬里無雲，一望上天就好似睇住以前上網睇個d星圖咁，唔係相機影出黎個種，而係有星團、又有好似霧既星雲個種感覺既野、仲有就係再次親眼見到條成銀河。。呢度既光度同上次係半路客棧既山中一樣，我諗我呢一世應該無幾可見到咁闊 咁清 既天空、仲要係0光害個隻(直情係無電呀)。
- 我都唔係睇左好耐星，就入番去訓教既毯房。然後因為岩岩訓醒，所以都幾精神，同d人傾下計，呢度d人會交換wechat。因為同行相機設備太豐富，所以呢度既人都問佢可唔可以sd d相比佢地XD
- 黎到新疆，聽到佢地最多講既係喀什，從佢地既口吻聽到佢地真係覺得南疆係個好危險既地方，同時都係比較怕維族人咁。有一個人，佢同我講維族人並唔係唔好，但出事時，睇佢地既族種的確係維族人，令佢地對維族既人感到有點不安全感。
- 另外就係，有個8月尾玩到依家既女仔，都係去左南疆，而且時間比我地當然長得多，佢去左被稱為中國最美公路既「獨庫公路」，佢既形容係「太美了」。獨庫公路係指由北疆「獨山子」經天山到南疆「庫車」既一條公路。呢位女仔話，其實「獨山子」去「那拉提」既路係靚，但由「那拉提」去「庫車」一段先係精華，所以如果無時間，可以「那拉提」去「庫車」。又係上雪山再落山既路，有機會都想去啊。如果有下次，我會簡6月去，因為秋天已經看過了，對於從來無真秋天既香港人黎講，無錯真係獨特既。但今年去旅行既時間係四月頭、九月中，山頭、草地周圍都係啡啡的，好似有點荒涼。話唔定係春末、初夏時，綠油油既大草原、未完全溶化既雪山都好靚好靚、別有一番風味呢。
- 傾到咁上下，大家都鋪被訓了，因為呢度最少有15 SET既被鋪，而我地只有五六個人(有d人係其他毯房 / 遠少少既木屋仔)，所以大家都可以拎兩張被黎蓋，會更加暖呢。
**資訊：烏魯木齊碾子溝長途客運站有長途巴士去獨山子，不過到左之後，要搵單程去庫車既話就唔知了。。因為無去，如果有資訊可以同我講聲啊XD
- Day8 完 -
沒有留言:
發佈留言