地點：北疆 阿勒泰地區 —— (輕裝徒步) 半路客棧 往 禾木村
住宿：禾木某不知名山莊
琴晚馬伕話不如6:30am出發，我地O左嘴。
跟住原來佢係講緊新疆時間，所以同我地改口講番北京時間8:30am。
雖然都好早，不過因為琴晚都算早訓，所以起身之後都未話好想繼續訓。
而且相對琴日，今日d葉有黃少少少少少。
而且一起身，面前係一大大舊晨霧！！
不過本身都係出到去兜兩兜圈，刷個牙。
到我的起心肝，拎部相機行出去個下，
太陽都出黎了，所以個霧無當時睇咁大舊。
傾多陣計，就再散多d。
呢個時候，大部份人都食左早餐飲左羊奶，
煩惱人同佢朋友兩個首先出發，大師就唔趕，諗住hea多陣先出發。
而馬伕食下早餐咁，最後hea到10點左右出發。
雖然無路去三叉口，但破矮林4分鐘左右之後就到左涼亭，
涼亭開始就有棧道，好快就到三叉口了~~
無錯，點解得兩叉呢，
因為我技術問題左下影唔到。
返返轉頭。
馬伕無啦啦兜返轉頭，話係馬道見唔到我地，以為我地迷路。
其實我地有maps.me。。
又係過河時間。
又有過河時間，大石既路好明顯。
不過每踩一塊都要睇下係咪實，佢有時有一兩舊會鬆鬆地。
馬飲水。
過完林，就係比較闊既景。
越接近目的地，色彩越來越多。
有時我都唔知應該叫佢青綠定青黃了。
今日只有10km，所以都係龜速行，不過都大約三點就到左。
馬伕問：「你地搵左住未？」我地話未，於是佢就帶我地去一間山莊住。
床位100/人。
另外就係，因為完左兩日徒步，依之前想法，黎緊兩日就騎馬。
佢問我地之後會留一日禾木定直接出發。
禾木村好細，所以我地都唔STAY多日了。
佢話如果直接出發，佢就要班多隻馬返黎。
我地就話OK。
佢首先到住宿個邊，我就話會係度影相，玩夠就落山。
我地就留係山上玩到夕陽時間，
馬伕間唔中wechat問我地落村未，於是要間唔中覆佢未未未。
其實我唔想玩緊個陣都要顧住覆MSG既感覺啊啊啊，
好似覆佢未就阻住人，但又唔想自己要好急住走個種feel咁，
但更加唔想唔覆搞到無黎交帶咁啊啊啊啊啊。
之後主角出場，唔想呃人，
先出張理想與現實圖。-______________________-
可能下晝三點，第一眼唔係望夕陽時間，
仲要咁光禿禿，所以個樣就係咁樣：「下？=口=」
如果要照騙，即使仲係青綠，
cut走上下，留個中間好多樹個PART都OK，可以扮隱世小村。
但因為太「震撼」，一定唔可以出ZOOM圖，要出張廣d既圖。
我地係呢度，坐係舊石度，思考左應該有二十分鐘人生，
呆左係度，到清醒番先話不如周圍行下，上高d再望落黎。
其實，先唔講佢係綠色、青色定乜色。
而係因為當初上網睇個個人影禾木，都係影到禾木村係林中，
好隱世小村既感覺。
然後當我上山望到。。。
嗯。。。
咦。。。
完美照騙。。。
心諗：做乜事。
點解係光禿禿既山中間，咁岩d樹圍住條河，
所以個一帶特別多樹。。
而遠睇，係光禿禿的。。。
嗯，即係就算佢彩虹色，我都應該會話樹靚，而唔係林中既禾木村靚。。。
唔係話唔靚，只係覺得其實好多村都係咁。。。
所以「中國最美村落」、「神的自留地」，嗯。。。
其實，如果公道d講，好多古城都靚過佢。。。哈哈。。。
好啦，都可能係高處睇唔覺，不過入村後，個感覺係幾舒服既。。
(不過當然，是非常宰遊客的地方。。。)
暫時唔落村，繼續往山上走。
落番山了，開始走入禾木村。
由於係徒步，所以唔會係景區大門口入，而係其實已經入左景區了。
河流。
有人係度札營，幾寫意，其實真係幾唔錯。
話唔定好過住木屋。
黃昏時，同頭先相比，條村既感覺都靚左。
對呢個景象，都有興奮左一段時間。
白樺林早d黃，加埋夕陽打燈，好正 ^ ^
見到呢個景象，對於下晝個(=口=)既感覺消除左大半。
不過覺得呢度同蒲甘差唔多，係中午、下晝唔適宜黎既地方，
唯有夕陽呢個短暫既瞬間，先實現到佢個種味道。
終於，入村了。
係度逛逛之後，同馬伕會合，第一次見馬伕揸電單車，
帶我地去佢聯絡左既屋主度，個陣佢換緊馬蹄鐵，於是都同時可以睇個更換過程。
不過唔係留左好耐，就出發去住個度了。
居民開始煮晚餐，於是坎煙慢慢升起。
落到黎，就算無夕陽，周圍既樹都好似比係山上望落去黃。
不過有d位都係好綠XD。
光禿禿 -_-。
仲有好多棄置既廁所係地下。
到左我地間房門口，雖然係床位，不過三人單，所以都係變左完全自己間房。
廁所係共用MOU廁，所以都唔多想去。
另外浴室好有d似桑拿房，d水又夠熱，呢樣就幾舒服。
放低d野之後，就出去繼續行下。
有d山莊幾靚，會種下花果。
上「上村」。
其實應該無上村呢回事，只不過禾木村佢前面同後面既高度唔同，
後面要上一上少少坡先到，所以我就當佢分開左上同下村啦。
下村，近景區大門，比較多野食、餐館、紀念品店。
上村，比較多住宿，同時比較多細細間既「超市」。
好快就入黑了，呢度既光害當然比半路客棧多，
但望天都有唔少星。
不過銀河既位置就偏左去，所以無係半路客棧個陣咁係正頭頂，
只係得半條，而且無個陣咁明顯。
入夜開始涼，又匿入房度hea，最緊要係相機電話差電、同埋食乾糧。
- Day7完 -
沒有留言:
發佈留言