地點：敦煌 鳴沙山月牙泉
住宿：葛老大客棧
今日無得訓到自然醒，不過比預期早左少少醒。
一起身，望一望窗外面。唔知發生咩事？？
不過checkout之後，呢堆野都好似散走晒，咁就係大路截的士，去返吐魯番北站。
呢個就係站牌了，今日最後一班去蘭州西係12:56，
亦都係最後一班去柳園 (我地目的地)既動車。
而我地係坐10:38呢班車~~~。
係度見到，有架Z車去深圳，全線車程要49個鐘。
開始檢票，檢完票，就入去了。
終！於！準！備！同！新！疆！講！再！見！了！
點解咁興奮呢，因為新疆既安檢真係好煩。。XD
有時諗，如果有日自己住既地方搞成咁要下下都出入安檢，真係好慘。。
因為唔係總站，而且佢停係度既時間只係3分鐘，所以落到月台架動車係未到。
而當佢到左，請盡快上車。XD
上車了，今次唔係《西部高鐵——敦煌之星》個架車。
沿途都係沙沙沙沙沙沙沙沙沙，唔靚的沙。
沙漠、沙漠、沙漠、沙漠、沙漠、沙漠、係好廣闊但唔太靚XDDD
開始近鄯善北站 (鄯善國：漢時西域諸國之一，原名樓蘭)，
當然我地只係奶邊，古時既樓蘭城係南好多好多既位置。
(**另外諗起古劍奇譚2去過既樓蘭!!** )
火焰山山脈就係呢度附近，蘭新高鐵段係會經過架，
當然唔係講緊經過個火焰山景區啦，只係經過佢既山脈。
之後仲會見到起碼幾十公里(？？)既「魔鬼城」狀既地貌。
間唔中經過大既山石，會入隧道。
講真，之前青藏鐵路起係高原已經好勁。
而建呢個蘭新高鐵，同樣又真係覺得幾勁，哈哈。
餓餓地，食左最後幾包的乾糧。
坐左三個幾四個鐘，終於到左柳園南啦！
不過唔好以為到左今日既目的地喎，因為要坐多兩個鐘既班車.......
睇番地圖。
> 灰色虛線係省界
> 紅色線係岩岩坐左4粒鐘左右 既 蘭新高鐵部份線段
> 紫色係預計黎緊要坐既2粒鐘 班車 公路
無錯，係一條大直線。
同行表示：
「-_- 呢條大直線行2粒鐘，個司機真係悶死，可以合埋眼訓著揸車，高危道路。」
一出站就見到班車既路牌。
兜過去見到有d班車，$35/人去敦煌。
其實係類似向政府申請做班車司機，然後一日只可以開一次來回咁。
所以佢地係會等人滿(16人)先發車，呢個時候第一架滿左，開走左。
而我地行得慢，上個架車唔滿，結果得5個人。
有個女仔仲要同一個男仔講「我又不是沒有錢坐其他車，怎麼要在這裡等」
幾驚連佢都走開埋，少左個人XDDDDD。
個陣心諗，下，人滿發車，下一班高鐵，
如果睇頭先時刻表，烏魯木齊開出既班次，係最少一兩個鐘之後，
呢度又咁荒蕪，會唔會無人上車，等成粒幾鐘架。
雖然都應該得左三四個字，應該無超過半個鐘掛？
不過有其他接駁巴士、或者唔同方法黎既人上車，於是唔洗半個鐘就開車了。
頭先四個鐘高鐵，記憶中應該有訓過下。
而呢度兩粒鐘，坐左陣之後見風景都係沙漠咁上下既野，當然都要訓下。
到就快到達敦煌時，就係親愛既安檢了。
吐魯番既欄杆係駱駝，
而敦煌既欄杆，當然係佢莫高窟最出名既壁畫元素之一 —— 飛天 。
本身拎回鄉證出黎佢爭d話要落一落車唔知檢d乜，之後有另一個公安話香港人唔洗。
於是全車繼續出發，好快就到左敦煌市了。
一落車，就有人sell佢位置好好既住宿，
又話唔好住月牙泉村個邊，最好住市區可以行下沙州夜市，
交通又方便。
不過之前book好左，所以照原定計劃去月牙泉村。
當初其實係簡左敦煌市先既，叫做敦煌假日大酒店，
當時見$91，即刻衝去訂定先。
跟住過左幾星期，電話打黎話酒店mark錯價，係$2XX先岩。
由於爭咁遠，雖然佢mark錯都係佢問題，
但個陣第一時間就望下有無其他既住宿先。
第二次再簡時，簡左係月牙泉村，
係因為除左價錢平市區市價一半有外之外，
仲鐘意佢近鳴沙山，咁睇完日落就唔洗怕無車返市區。
另外就係見佢有直路去火車站、莫高窟數字中文，
即係唔洗經市區，所以路程差唔多之餘、價錢平一半有多，
而評價又高過市區既住宿，於是就簡左月牙泉村了。
咁簡左，就去啦。
結果發覺路程黎講其實都唔係爭好遠，無乜話好大分別。
架車一路向前行，鳴沙山就係面，越黎越大舊。
飛的黎呢度時，其實個司機都唔知呢間野係邊。
而agoda、google、maps.me、全部d指示都唔同，
司機就問左我地拎電話打過去，又問下人、同望下d路牌咁。
結果眼利既同行望到個客棧門口支旗，於是就搵到了。
點解次次都係佢睇到，而唔係我睇到既~_~。
過左大門口，再行入去，就見到老闆娘係大廳度煲緊劇。
見到我地之後就出黎同我地搞checkin手續，
登記緊之前，洗左d提子然後拎比我地食，叫我地係大廳坐下先。
之後，同我地傾左陣計。
佢問我地黎左幾耐，然後話：
「因為呢幾日係世博會，琴日莫高窟唔開，有兩個人要改今朝去。」
所以雖然訂左飛，但呢度話改就改，搞到都有d擔心聽日無開，
但如果今朝有開，聽朝唔會唔會掛…？
跟住佢問我地，一陣會唔會出去玩。
我地話：「會呀，想去鳴沙山月牙泉。但唔知幾時會CLOSE。」
佢望一望個鐘話：「可能過多個零鐘就無飛賣」
記憶中，因為10:38係吐魯番出發，坐4粒鐘都超過2點半，
之後等半個鐘班車先開，再坐2個鐘、入埋市區，checkin埋，個陣都五點半了。
於是我地問，可唔可以放低d野係度先，佢話好。
然後就開後門，有條近d既路比我地行出去。
行左十分鐘左右到左，跟住買飛、檢票、入場。
佢話如果想二次進場，
可以離場時同張票打個指紋，咁聽日就用番張飛同指紋入場。
而我地就無咁做，因為今日都玩夠XD。
景區入口有鞋套租，$15一對，不過望個鞋套設計，應該唔係真係好防到入沙..
入黎可能拖鞋仲正、或者赤腳，
一黎見唔到有垃圾、玻璃，二黎d沙好幼好舒服。(中午暴曬時另計)
佢有景區區間車坐入月牙泉，但其實條路好短，好快就到。
入月牙泉唔洗再另外買票，
所以入左景區基本上可以stay到好夜，我地呢日日落之後，天黑，到9點幾先開始走。
好多人騎駱駝，對於騎左兩日馬不想再騎動物既我地黎講，係「不了」
景區周圍都一路播住d幾有沙漠風情既洗腦音樂，雖然好洗腦但幾有風味 HAHAHAHA。
一心向住月牙泉進發，沿住路行就好快到，諗住之後就日落先上山。
雖然應該係景區設計，想表現個綠洲出黎，
但向月牙泉行個一part太人工，無乜feel。
之後離開個通道，行沙上，向月牙泉進發。
去到呢一下，突然先覺得：「咦？好似好耐無見過中國彷古式建築了」
無錯，呢度真係真係離開左新疆了。
月牙泉隔離既樓台。
兜左一兩個圈之後，就開始上沙丘了。
呢一邊咁岩比太陽遮住左，所以幾暗。XD
點解特別多人行呢條線呢，因為佢呢度放左條木梯。
即係一條梯，兩邊係繩黎，中間有一條條木。
點解個個都沿住條梯上呢，
因為d沙好滑，你一腳踩50cm，佢會將你滑番落20cm，
所以變相就用多左力同氣先上到山。
如果你係條梯行緊，覺得前面行得太慢，想行捷徑超一超前，
唔…可以試下既，不過我呢行上去呢程，
見到只有好少好少好少好少好少好少人成功，因為d沙真係太滑了。。
終於上到黎，呢度有四驅車sell人上到最高個山丘睇日落。
因為呢個位，係睇唔到架，你會見到太陽係好高既位置就比山丘阻住。
不過我地無坐到，而係爬上去一個高少少既山丘睇。
其實真係好難爬XDDDDDDDDD
明明如果有梯，應該好快上到，但上呢度真係XDDDDDDD
因為唔係official上山路線，所以無梯的。
唯有用了平時的400%腳力，先上到去。
上到黎，無腳印，而且太陽就在前面。
望番落去，d人好細粒。
呢個斜度比較緩和，所以有兩個女仔落山向前深深處行。
話說，好佩服徒步穿過沙漠既人。。點做到。。
不過近黃昏，呢度唔算好熱，又唔算好乾燥，
所以感覺無之前係吐魯番個陣咁口渴。
係呢度，因為隔離都坐左d唔同既人，
聽到廣東話就自然更加專心聽。
不過呢度既廣東話，通常係廣東人講，唔係香港人黎。
有一個男仔來自佛山，之前去完蘭州、西寧、張掖個d黎到呢度，
而另外2個女仔，就包車玩，之後會去內蒙。
太陽落左山之後，再過多一段時間，我地就落番個無梯既山。
上山400%力，落山係10%力。
每行一步，佢幫你落多幾步XDDDDDD 勁好玩XDDDDDD
不過上同落，個結果都係成對鞋入面都係沙，完係係比d沙 包住成隻腳。
已經無晒陽光了，慢慢就入黑，
呢個時候係大約7點幾，即係入左黎都2個幾鐘。
本身諗，哇呢度真係可以玩成日，
但到左聽日發現，原來5點前呢度係熱死的XD
有唔少人留係度睇星，但今日既沙塵都唔算細。
張相一堆黑色，睇唔明呢，依稀見到「滑沙」兩隻字，無錯佢係滑沙場。
只要你有張門票，就可以拎塊滑沙板，滑落去。
如果有機會試，咁你落山就唔止10%力，係唔洗力呢~~~~~~XD
落左山，倒走d沙，慢慢行出景區。
又望下天上星星，呢度睇星好處係，無之前咁凍。XD
雖然望上天都唔少星星，
不過同之前係喀納斯半路客棧、小黑湖個d星空圖feel天空真係完全無得比 > <
所以都無話有太多既留戀地離開了鳴沙山。
返到葛老大客棧，老闆娘帶我地返房，所有行李都一早放係入面了。
之後佢仲送左提子、姜味梳打比我地飲，好爽口呢。
佢話敦煌好多人都好鐘意飲呢隻飲品。
提子，佢地比左好多我地XD 唔止呢盤。
好抵啊，$138rmb一晚，老闆老闆、娘熱情之餘，仲有咁多野飲同食。
返黎其實係放低d野，去個洗手間，同埋將d野差電，
之後就出番去食野啦。
兜左兜睇下有乜食，發現主街上既一堆檔仔。
呢度仲有TAXI，咁聽日咁早要去莫高窟既交通問題就解決左了。
之前黎到見車都無乜幾架，真係有d擔心會唔會連的士都無 XD
但係其實有既~~~！
敦煌要食乜呢？
第一係驢肉黃麵。
驢肉係咩味呢？唔知點形容，但真係好食喎@@
仲有敦煌既餛飩，幾有趣，但一般般，佢個皮有d厚。
呢個就係我地食個間了。
呢條村既客棧地圖，基本上每一間屋都改裝左做客棧咁濟了 。
- Day13 完 -
沒有留言:
發佈留言