地點：南疆 喀什
住宿：天緣國際大酒店
呢日唔洗特別早起身，訓飽起身就望一望出面個景，
好正，對住人民廣場、樓下就係公車站，對面就係老城區。
見到廣場對面個毛主席像，有少少北韓旅行後遺症發作，
例如係咪要影全身照，如果自己要入鏡，應該要雙手放兩邊立正之類。
十點左右落餐廳食個簡單自助早餐，就再拎好野出門了。
呢日大約係十一點出發。
爭少少就走車，好彩上緊客，$1/人。
公車一路向香妃墓進發。
又怕醜又怕曬既站牌。
雖然同老城區有一定既距離，不過呢度既建築同老城區都相近，
唔會好似琴晚見到個種高樓大廈。。
經過長長既街，唔少既涼皮店，就快到香妃墓。
黎到門口，當然首先買飛，$30/人。
香妃墓，又名「阿派克霍加麻紮」，
「阿派克」係家族名，「霍加」係領袖/領袖後裔，「麻紮」係墓。
香妃，去到睇簡介，話係乾隆最寵愛既妃子，
又話係維族既少女，就諗起還珠格格個套戲既果個妃子。
之後走去聽d內地旅行團既導遊講下野，原來真係講緊佢。
叫香妃既原因，係佢身體會發出香味。
古時好多人會覺得呢隻味係天然由呢位女子身上發出，
但因為佢來自南疆，南疆係絲路重鎮，而西方黎既主要係香料，
就研究歷史既人懷疑其實個d香味係來自西域既香料 —— 麝香。
根據在於，香妃點解身為最寵愛妃子，但又無辦法繼續升既原因有關，
古代妃子升到咁上下，一定要有後先可以繼續升，而香妃係無後。
明明一星期大半都係皇上身邊，但都有咁既情況，
研究歷史既人就認為，係因為佢使用過多麝香所致。
麝香，網上所講：「麝科動物主要分布於印度、巴基斯坦、中國等地。麝香為鹿科動物麝的雄性腺囊中的分泌物乾燥而成，是一種高級香料，麝香不僅芳香宜人，而且香味持久。中醫學因認為麝香有催產下胎之效，所以主張孕婦禁用，但麝香並不會導致女子不孕。孕婦要注意麝香副作用的傷害，麝香特殊的氣味會刺激子宮收縮，從而影響到胎兒成長，嚴重者會出現早產，流產的危險。」
不過呢d都只係懷疑/推論，實際係點就唔知了。
呢度其實除左香妃墓，其實仲有清真寺，所以都唔細。
呢度好有趣，會有「最佳拍攝點」，所以突然明點解網上面好多相都差唔多角度影過去。
除此之外，佢前面仲有個香妃園。
香妃園無乜人去，亦都唔係門票範圍之內，
甚至通往香妃園條通道，細到只係有個牌標住洗手間。
但一穿過個牌就係大大個花園，
去香妃墓，應該點都要行埋香妃園先叫完整。
係香妃園影過去係靚d的呢。
有個位仲有個長長水池，有d泰姬陵佈局FEEL，可惜唔知點解會有圍板。
睇完之後就拆返，見到架幾有特色既方通工具。
係條街，見到幾間涼皮店，就入左間食。
睇唔明d字，就亂咁簡。
特警。
有個經過既人同佢吹水，原來佢係由四川過黎做特警的。
見好多警察、特警、武警都係外省人過黎做，唔會搵番當地人咁，
尤其唔會搵維族既人，睇黎佢地對維族既人真係好嚴。
外省人入喀什做特警 人工喺其他地方嘅一倍，
通常係兩年期，去過喀什做係易升遷，
而如有事件發生，最近嘅警交局要兩分內到達，否則輕則炒魷重則入獄。
好香好食好咬。
好食好入味，但其實鐘意正常麵樣多d ……XD。
如果多d個正方形涼粉就好啦~
埋單$10。
店面係咁既，d字就睇唔明既。
行行下口渴，同個婆婆買左支水，佢見我地一口氣飲晒，就幫我地掉左個樽，
之後我地就買多兩次黎飲，然後搵佢影相。
呢度真係好乾燥，平時我係好少飲水，都飲左好多水。
之後坐番公車返去，係國際大巴札(/兩亞市場)落車。
紀念品店、家品、淘寶野、五金鋪，
基本上好少野會想買、其實無乜野行，
但又好多鋪頭咁，同舊城區d店賣既野差唔多。
以前應該唔係呢種天花呢種頂，
佢大門係石泥既感覺，但好似將成個巴札內部整走再用鐵板再建咁，
無左種西域大巴紮既感覺。。
有少少bangkok JJ market個feel，但又無好平既衫買咁 XD。
雖然好大，但無乜野睇，兜多兩兜就走了。
呢度好近高台民居，依家三點幾，有陽光，所以再去探一探。
依然係各路都封晒，唔行得太入。
依家先北京時間四點幾，有排相未日落，
於是決定行多陣放低d野，再去超市買乾糧，先再過黎。
買左堆乾糧第日係北疆時食，之後落到樓下見到d咁既野。
唔知點解拎住晒d兵器，好似訓練緊民兵個d感覺？？
我真係有後遺症！！
之後出發去玩命摩天輪。
隻雀勁乖。。好想有隻咁乖既雀。
轉緊上去。
高處睇高台民居，
想講係入夜後呢一邊會打燈，後面就無打燈。
跟住我又後遺症發作。。
即係個d，靚既一面要比摩天輪上既睇，另一邊就無人理之類既想法又出現了。
上到去岩岩見到太陽邊然後就日已落。
琴日個東湖公園。
落摩天輪之後都開始天黑，我地再去高台民居個度望下。
影影下相，有個細路女走左過黎想同我地玩相機，
個男仔就怕醜想走咁，跟住個細路女拎住部相機周圍影，
我地又要睇住部相機唔好走左去之餘，仲要睇下佢會唔會無啦啦format d相…
岩岩入黑，問佢食左飯未，佢地話食左。
我地問佢住邊，佢話住高台民居，
跟住佢又同我地合下影又周圍影下咁，我地話，
「你可唔可以帶我地入高台民居睇下呀？」
佢話「我帶唔到你去上面，但可以帶你地去我屋企。」
我地心諗「有無伏架……」
雖然覺得有伏，同行亦表示個女仔笑得好奸，
不過無非應該都係同錢有關，當比入場費去所謂「家訪」吧。
跟住佢就指住d牛，話係佢地養，有4隻。
然後開佢屋企門，叫我地入去，我地見勁黑，
我話：「你會唔會困住我地架？」
跟住佢就係咁話入啦入啦，指住樓梯叫我地上，
之後佢就跑左上樓梯帶我地行先。
樓梯係一個半平台式既地方，前面有個困住羊既木欄，
之後樓梯轉角就係佢地既「大廳」，佢媽媽坐係度食餅，
又share d比我地食咁。
佢地之間係講維語，得呢個細路女講普通話。
 |
| 岩岩上樓梯之後向左望既視覺。 |
 |
| 呢張相係佢拎住部相機影，係上完樓梯向前望既景觀。 |
之後佢帶我入佢房，見到佢細妹，佢又係咁影相，又自拍咁。
又叫個妹擺下POST，又周圍影佢地間房。
間房其實幾暖又感覺幾舒服。
佢妹應該比較怕陌生人…掛。
係佢屋企兜左兜之後，佢就帶我地落番去，佢妹妹都跟住黎。
跟住我地諗住都差唔多，佢就拉我地去睇佢d羊，佢話要放羊去食草，
然後就一堆堆羊跟住佢阿媽行開左去遠處。
之後佢躲係個門後面，
等佢妹妹係羊房(通向佢地住個度既平台)度出黎，扮「哇」黎嚇佢個d。
再然後，我地比d香港/其他地方既相比佢睇，佢就係度玩下電話咁，
玩玩下就話要餵牛食草，將一個袋入面既粟米皮隊去隻牛度，
隻牛好開心咁食，佢就起勢咁餵，仲好似比牛d牙整到下咁。-_-
我地覺得時間差唔多了，就話我地走了，
佢就BYEBYE，之後佢又問「可唔可以比$5我食飯啊？」
居然係$5，呢度d當地物價應該係超低。
另外就諗，呢位女仔如果係中國式旅遊區生存落去，第日應該會發達。
女仔好開心拎左$5，好得戚咁望住佢妹妹。
之後，我地再影下相，影影下，
見到個女仔同佢妹妹去左個檔仔，拎住張$5買零食，
我地行過，佢地同我地講byebye，
本身想請佢食零食，不過佢地急急比左錢 (可能驚我地會收番XD)
之後佢地買左幾款零食，比左錢仲有錢找。@@
小朋友真係易滿足，個陣諗如果有帶香港d糖出黎，
或者有帶即影即有，佢地應該會更開心。
高台民居夜晚仲係好多人，多人過下晝個隻。
可能下晝熱，夜晚舒服好多既原因。
之後由高台民居行番去老城區。
又係好多細路走左出街玩。
好熱鬧。
連警察都放低左支棍，同細路一齊打羽毛球。
順帶一提，呢度見到既武器，除左警棍，
仲有狼牙棒個類，係個d一打你就一定要吉到你流晒血既武器，
隨街都見真係有d得人驚。
係舊城區另一出口出，就返到酒店了，
今晚試過新疆都多見既快餐店，試下係點的。
因為d香料好新疆，包調味粉好新疆個隻香口辣，
所以個快餐(炸雞包、炸雞搥)都幾新疆FEEL。XD
住埋呢晚，聽日就飛番烏魯木齊，然後再去北疆。
- Day4 完 -
沒有留言:
發佈留言